Wbohe to zahrodkowe palčiki! Přehusto so wone politisce, rasistisce a samo seksistisce znjewužiwaja, štož ma so nuznje změnić! Tole měnja přiwisnicy wosebiteje specije, kotřiž chcedźa so kónc tydźenja w durinskim Trusetalu na palči­kowym kongresu schadźować. Přećiwo znjewu­žiwanju mužikow z módrej abo čerwjenej čapku ma so zakročić, woni praja. Tak lěta 2006 załožena Mjezynarodna palčikowa strona z něhdźe 100 sobustawami pla­nuje, nastajić rezoluciju Zwjazkowej antidiskriminaciskej instancy.

Za trochu njeradźeny postrow policistam bu 26lětny wodźer awta w Ludwigshafenje pochłostany. Tak je wón zastojnikow nimojěducy z piwom w ruce strowił a sej samo hišće lunk popřał. Zastojnicy muža hnydom zadźeržachu a zwěsćichu 0,7 promilow alkohola w jeho kreji, za čož ma nětko pokutu płaćić.

Tel Aviv (dpa/SN). USA a Israel su so na rekordny­ wojerski pomocny paket 38 miliardow dolarow dojednali. Płaćenja wot USA měli so w lěće 2019 započeć a so potom­ po dźesać lětach zakónčić. Tole zdźěli dźensa israelski rozhłós. Amerika je najwažniši partner Israela. Zastupjerjo wobeju krajow su přez mě­sacy wo jednotliwych dypkach wura­dźowali. Pjenježna pomoc je najwyša jednotliwa podpěra w stawiznach USA.

Serbiska chce płoty twarić

Běłohród (dpa/SN). Kandidat za přistup k Europskej uniji Serbiska chce tysacy nowych ćěkancow wot swojeho teritorija wotdźeržeć a na mjezy k Makedonskej a Bołharskej płoty nastajeć. Kaž minister za dźěło Aleksandar Vulin dźensa w Běłohrodźe informowaše, je nětko načasu drastiske naprawy zahajić. W Serbiskej přebywa něhdźe 5 000 migrantow.

Kóždy pjaty z listom woli

7,3 miliony eurow za nowe hospodarske perspektiwy we Łužicy

Budyšin (SN/at). Zaměrne dźěło za přichod Łužicy ma financny zakład. Za to přewostaja Zwjazk, Swobodny stat Sakska a Kraj Braniborska 7,3 miliony eurow z hornca za zhromadny nadawk polěpšenje regionalneje hospodarskeje struktury. Kaž zdźěli wčera sakske ministerstwo za hospodarstwo a dźěło, chcedźa sakskej wo­krjesaj Budyšin a Zhorjelc, braniborske wokrjesy Dubja-Błóta, Łobjo-Halštrow, Hornje Błóta-Łužica, Sprjewja-Nysa kaž tež bjezwokrjesne město Choćebuz we wobłuku štyrilětneho projekta z dźěłowym titlom „łužiska dźěłarnja přichoda“ strukturne změny nastorčić.