Berlin (dpa/SN). Němski wonkowny minister Johann Wadephul (CDU) je israelske knježerstwo w diskusiji wo wójnje w Gazaskim pasmje warnował. Wone njeměło Němskej antisemitizm wumjetować a tak ćišć wukonjeć. Bój zwjazkoweho knježerstwa přećiwo antisemitizmej a podpěru Israela „njesmědźa instrumentalizować za to, štož so tuchwilu w Gazaskim pasmje stawa“, rjekny Wadephul w Berlinje. Israel ma prawo, přećiwo Hamas postupować, kotraž ma přeco hišće zastajencow w swojich rukach. Přiwšěm pak dyrbja poměrnosć wobchować. „Mjezu pak su překročili hladajo na čas, krutosć a konsekwencu, z kotrejž israelska armeja tam postupuje“, wón doda.

Dospołnje njeakceptabelne je, zo ludźi w Gazaskim pasmje ze zakładnymi žiwidłami njezastaraja, Wadephul rjekny. Němska steji kruće poboku Israela a je za njón tež zamołwita. „Stejimy pak tež ­poboku ludźi w Gazaskim pasmje“, wonkowny minister zjima. Němska pruwuje, hač Israel w Gazy humanitarne prawo ­ludow rani.

Zo Njeswačanski wjesnjanosta Gerd Schuster dočasnje swoje zastojnstwo złoži, je srjedź meje mnohich zadźiwało. W najnowšim wudaću gmejnskeje nowiny wón nětko přičiny swojeho wotstupa zdźěli – a te hišće bóle zadźiwaja. Schuster mjenujcy njepřestanje strowotnych přičin dla, kaž bě so tukało, ale dokelž wón pjenježne a zarjadniske wuwiće w komunalnym wobłuku hižo sobu njesć njemóže a nochce. Mjez druhim wón wuzběhuje, zo napjate połoženje gmejnow njeje wuslědk špatneho hospodarjenja komunow, ale stajnje přiběracych nadawkow, změnjenych normow a nowych socialnych wu­konow. Jako přinošk Schustera čitach, sej myslach, zo skónčnje raz něchtó porst do rany połoži a nic jenož na njedostatki pokaza, ale tež swoje konsekwency z toho sćehnje. To wuwabja wulki respekt. Nadźijomnje změje zmužity krok Njeswačanskeho wjesnjanosty wšudźe tam wuskutki, hdźež wo přichodźe našich gmejnow sobu rozsudźeja. Marian Wjeńka

Najebać to, zo ma Zhorjelski wokrjes sam financielne ćeže, chce jako towaršnik tři chorownje w Běłej Wodźe, ­Žitawje a Habrachćicach dołhodobnje zachować. Tole podšmórny krajny rada dr. Stephan Meyer (CDU) minjeny pjatk w Zhorjelcu.

Zhorjelc (AK/SN). „Chcemy likwiditu stejnišćow chorownjow we wokrjesu zaručić. Lětsa steji za to po wobzamknjenju wo­krjesneho sejmika dźesać milionow eurow k dispoziciji. W přichodnymaj lětomaj z financnym podźělom 20 milionow eurow ličimy. Tež za to trjebamy škitne naprawy“, wón wuswětli. Drje ma wo­krjes sam financne ćeže, tola zachowanje stejnišćow chorownjow w Běłej Wodźe, Žitawje a Habrachćicach je za dr. Stephana Meyera nuzny winowatostny nadawk a zawěsćenje kwality medicinskeho zastaranja ludnosće. „Tole dyrbimy zawodnje a hospodarsce zamołwić“, krajny rada potwjerdźi.

Po 800 kilometrow dołhej jězbje je 90 tonow ćežki transformator minjenu sobotu rano do Choćebuza dojěł. Energijowy zastaraćel EVC nastroj trjeba, zo by swoju transformowarnju rozšěrił. Porjedźernja spěšnikow ICE, mediciniska uniwersita a nowe slědźenišća na sewjeru Choćebuza su nowe projekty strukturneje změny a trjebaja wjace miliny. Tuž dyrbja kapacitu rozšěrić. Transportowali su wosom metrow dołhi, tři metry šěroki a pjeć metrow wysoki agregat předewšěm w nocy, zo njebychu wobchad nadměru wobćežowali. Nětko dyrbja transformator na při­hotowany fundament sadźić a přizamknyć. Foto: Michael Helbig