Berlin (dpa/SN). Podhlad dalšeho pada pochromy we wokrjesu Barnim w Braniborskej njeje so wobkrućił. Tole zdźěla zwjazkowy minister za ratarstwo Cem Özdemir (Zeleni). „Aktualnje njeje žanoho dalšeho pozitiwneho pada tuteje mrětwy“, rjekny Özdemir dźensa rano w rozhłosu.

Fachowcy Friedricha-Löffleroweho instituta běchu minjenu nóc podhladny material přepytowali. Potrjechena koza njeměješe pochromu, minister zdźěla. Němska drje z tym wot mrětwy wuswobodźena njeje, pochroma pak njeje so hač do dźensnišeho dale rozpřestrěwa, Özdemir doda.

Podhladny pad běchu předwčerawšim, srjedu, w Barnimskim wokrjesu zwěsćili. Wot potrjechenych zwěrjatow su hnydom proby brali a do instituta dowjezli. Minjeny tydźeń bě so pochroma prěni króć po 35 lětach zaso w Němskej jewiła. Chorosć je za skót jara natykliwa.

Moskwa/Teheran (dpa/SN). Ruska a Iran stej dźensa zrěčenje wo wobšěrnym strategiskim partnerstwje za přichodne 20 lět podpisałoj. Zrěčenje wopřija 47 artiklow a rjaduje zhromadne dźěło wobeju krajow na polu wojerstwa, politiki, wi­kowanja, slědźenja, kubłanja a kultury. Fachowcy maja zrěčenje tež za reakciju na politisku izolaciju wobeju krajow, kotraž bě po nadpadźe Ruskeje na Ukrainu widźomnje přiběrała.

Iran je w tym zwisku zdźělił, zo njewobsahuje zrěčenje žadyn wotrězk nastupajo mjezsobnu pomoc w padźe nadpada. Iran je kmany, swoju wěstotu sam zaručić, w Teheranje rěkaše. Knježerstwo USA bě wospjet zdźěliło, zo ma Iran za hłowneho njepřećela na Bliskim wuchodźe.

Berlin (dpa/SN). Zwjazkowy kancler Olaf Scholz (SPD) je w přepytowanskim wuběrku zwjazkoweho sejma wo zawrjenju jadrowych milinarnjow rozsudy z lěta 2022 zakitował. „Z atomowej energiju přestać bě prawje“, wón rjekny. Wjele­lětne podlěšenje dźěłoweho časa tutych milinarnjow by přećiwo konsensej předchadźacych zwjazkowych knježerstwow było, kancler potwjerdźi. Zdobom bě wón w oktobru 2022 po rozmołwje z wobhospodarjemi atomowych milinarnjow a ministerstwami dopóznał, zo je zmysłapołne atomowe milinarnje hišće hač do apryla 2023 dale wužiwać, zo by zastaranje kraja z energiju zaručene było. Pruwowanje nastupajo zawrjenje tutych milinarjow bě po jeho słowach dospołnje neutralne.

Runje na tym kritikarjo w rjadach CDU/CSU, AfD a FDP dwěluja. Woni Scholzej, hospodarskemu ministrej ­Robertej Habeckej a wobswětowej mi­nisterce Steffi Lemke (wobaj Zeleni) wumjetuja, zo su jadrowe milinarnje z ryzy ideologiskich přičin zawrěli.

Drježdźany (dpa/SN). Po prěnich wuslědkach přepytowanjow tak mjenowaneje Dubajskeje šokolody w Badensko-Württembergskej chcedźa za wěstotu žiwi­dłow zamołwite zarjady w Sakskej słódkosć tohorunja dokładnišo přepytować. Pječa maja přičinu za wotpowědne kontrole, socialne ministerstwo na naprašowanje medijow zdźěli. „Zamołwite zarjady, kotrež wěstotu žiwidłow dohladuja, smy wo tym informowali“, w zdźělence rěka. Dotal pak hišće žane proby w krajnym přepytowanskim instituće nimaja. Tuž wokomiknje tež žane wuslědki njepředleža, ministerstwo zdźěla.

Přepytowanja w Badensko-Württembergskej běchu wunjesli, zo su w někotrych taflach šokolody palmowy wolij město kakawoweje butry wužiwali, dokelž je to za producenta tuńše. Nimo toho běchu informacije wo wobstatkach na zapakowanjach njedospołne. Za alergikarjow móhło tole chutny riziko być. W jednej z probow běchu samo plěsniwc w pistacijowej kremje namakali.