Erfurt (dpa/SN). Nowy ministerski pre­zident Durinskeje Mario Voigt (CDU) je ministerki a ministrow swojeho knježerstwa pomjenował. Předewzaćelka Colette Boos-John nawjeduje přichodnje durinske ministerstwo za hospodarstwo, ratarstwo a wjesne kónčiny. Minister za kubłanje budźe wučer a zapósłanc CDU Christian Tischner. Juhodurinska zapósłanča CDU Beate Meißner nawjeduje wotnětka ministerstwo za justicu, migraciju a škit přetrjebarjow. Krajna předsydka BSW Katja Wolf je nowa financna ministerka. Georg Maier (SPD) wostanje nutřkowny minister. Mario Voigt na­wjeduje koaliciju CDU, BSW a SPD bjez wjetšiny w parlamenće a bě so minjeny pjatk z hłosami Lěwicy za ministerskeho prezidenta wuzwolić dał.

Berlin (dpa/SN). Dobre tři lěta po tym, zo je Olaf Scholz (SPD) zastojnstwo zwjazkoweho kanclera nastupił, chcyše wón dźensa w zwjazkowym sejmje prašenje dowěry stajić, zo by nowowólby sejma 23. februara 2025 nastorčił. Powołujo so na artikl 68 wustawy chcyše wón zapósłancow prosyć, jemu dowěru wuprajić.

Njedyrbjał-li wón žanu wjetšinu w sejmje dóstać, chcyše so wón bjezposrědnje na to do hrodu Bellevue podać a zwjazkowemu prezidentej Frankej-Walterej Steinmeierej namjetować, zwjazkowy sejm rozpušćić. Powšitkownje z toho wuchadźachu, zo Steinmeier 28. septembra 2025 planowane wólby zwjazkoweho sejma na 23. februar přestorči.

Zo Scholz na kóncu tola hišće přećiwo swojej woli wjetšinu 367 hłosow dóstanje, je tak derje kaž wuzamknjene. Po pušćenju financneho ministra Christiana Lindnera (FDP) nawjeduje Scholz mjeńšinowe knježerstwo SPD a Zelenych. Zo njeby wón z hłosami AfD tole hišće wjetšinu hłosow dóstał, chcedźa so Zeleni při wothłosowanju hłosa wzdać.

Njejasne poměry do wólbow sakskeho ministerskeho prezidenta

Drježdźany (dpa/SN). Sakscy Zeleni ­wo ministerskeho prezidenta Michaela Kretsch­mera (CDU) hižo njerodźa a nochcedźa při toho planowanym wu­zwolenju zajutřišim, srjedu, za dotalneho mějićela zastojnstwa hłosować. We wozjewjenym stejišću wopodstatnjeja Ze­leni to wosebje z wuskim časowym ­planom. Kretschmer bě so hakle minjeny pjatk z wjacorymi načolnymi kandidatami Zwjazka 90/Zelenych zetkał.

„Wězo smy zwólniwi, wo rjadowanych poměrach rěčeć. To běchmy tež minjenych 104 dnjow po wólbach“, w stejišću rěka. W běhu pjeć dnjow pak njeje to prosće móžne. Za spušćomny zakład trjebamy zwólniwosć wobeju stronow. „Tak krótko do wólbow bjez kóždeho plana rozmołwy zahajić, njepokazuje runjewon na chutnu wolu, za zhromadnosćemi pytać. Pod tutymi wuměnjenjemi njemóže ­ministerski prezident z hłosami frakcije Zelenych ličić.“ CDU podawa so 18. decembra „bjez jasneje wjetšiny ze stron demokratiskich stron do wólbow“.

Sćěhuješ-li dźensniše rozprawnistwo medijow wo Durinskej, zdawa so wšitko zaso w porjadku być. Nowy ministerski prezident Voigt je ministrow powołał a dźěło knježerstwa zahajił. Nichtó wjace wo tym njerěči, zo smy minjeny pjatk w Erfurtskim krajnym sejmje něšto dožiwili, štož nima w stawiznach CDU swojeho runjeća: Mario Voigt je so z hłosami SPD, BSW a na kóncu samo Lěwicy do zastojnstwa wolić dał. CDU, kotraž je něhdy we wuchodnych krajach z absolutnej wjetšinu knježiła, so ničeho wjace njehańbuje, jenož zo by knježiła. Njerěču ani wo wobzamknjenju CDU z lěta 2018, kotrež koalicije a zhromadne dźěło z Lěwicu zakazuje. Myslu w prěnim rjedźe na wolerjow, kotřiž su cyle wědomje CDU nakřižowali, dokelž jeje hódnoty zastupuja a stronje dowěrja. Woni su drje CDU wolili, dóstanu pak lěwicarske knježerstwo. Hdyž politikarjo swojich wolerjow dale takle přeradźa, móžemy při přichodnych wólbach hnydom doma wostać. Marko Wjeńka