Witaja rozsud EU Lukašenka dla
Minsk (dpa/SN). Demokratiske hibanje w Běłoruskej je rozsud Europskeje unije witało, po kotrymž Aleksandera Lukašenka jako prezidenta Běłoruskeje njepřipóznawaja. Nimo toho je wažne, zo chcetej EU a Ruska dialog mjez ciwilnej towaršnosću a mócnarskim aparatom podpěrować, rjekny politikarka opozicije Maria Kolesnikowa powěsćerni dpa. „Trjebamy tež pomoc, dokelž tajku situaciju hišće njemějachmy.“ 38lětna je nimo lawreatki literarneho Nobeloweho myta Swetlany Aleksijewić jedna ze sydom čłonow prezidija noweje koordinowaceje rady za přepodaće mocy w kraju. Dotal pak njeje mócnarski aparat na namołwu k dialogej z opoziciju reagował.
Pozitiwnje su na wědomje brali, zo tež Ruska do towaršnostneho dialoga namołwja. Wonkowny minister Sergej Lawrow bě jako prěni čłon nawodnistwa Ruskeje prezidentske wólby 9. awgusta zjawnje kritizował. Wón bě wothłosowanje, při kotrymž bě so Lukašenko z 80 procentami hłosow za prezidenta deklarować dał, „nic idealne“ mjenował.
Sakska chce jubilejny koncert
Woswjeća znowazałoženje swobodneho stata a róčnicu jednoty Němskeje
Drježdźany (dpa/SN). Sakska chce swoje znowazałoženje jako swobodny stat před 30 lětami a jednotu Němskeje ze swjedźenskim koncertom z 2 000 hosćimi w stadionje koparskeho ligista FC Rudne hory Aue woswjećić (SN informowachu). Ministerski prezident Michael Kretschmer (CDU) je wčera w Drježdźanach nadrobnosće připowědźił. Na koncerće z Drježdźanskej Sakskej statnej kapału pod nawodom Christiana Thielemanna maja twórby Carl Maria von Webera, Richarda Wagnera a Ludwiga van Beethovena zaklinčeć. W stadionje ma 85 hudźbnikow z wotstawkom na jewišću sedźeć. Tež Krajny hórski hudźbny korps Sakskeje změje swój wustup a ma na kóncu zhromadnje ze statnej kapału hudźić.
Po słowach Kretschmera chcedźa na zarjadowanju bilancować, što su w lětach swobody natwarili. Koronawirus je tójšto aktiwitow w tutym zwisku znjemóžnił. Wón potwjerdźi wolu krajneho knježerstwa, wulkozarjadowanja z wjace hač tysac wobdźělnikami wot 1. septembra zaso dowolić. Knježerstwo chce wo tym přichodny tydźeń rozsudźić.
Z požčenym kolesom po Drježdźanach
To a tamne (20.08.20)
Pytajo za picu je so młoda liška do kuchnje zawoda w badensko-württembergskim Immendingenje zabłudźiła – a sobudźěłaćerku chětro nastróžiła. Žona wuhlada małeho rubježnika w kisće w regalu, hdźež wón wotpočowaše. Kolegojo lišku skónčnje wuhnachu. Hajnik zwěrjo derje znaje: Młoda liška njemóže zbrašenja dla sama na hońtwu hić a pyta tuž we wotpadkach a twarjenjach za picu.
Sam so do wobchoda zamknył je paduch w Aalenje. 35lětny bě sej při zachodźe předawarnje žiwidłow wusku škałbu mjez durjemi a škleńcu wutłóčił. We wobchodźe nazběra sej wón tobak, napoje a žiwidła w hódnoće 500 eurow. Jako chcyše wobchod zaso wopušćić, dožiwi złe překwapjenje. Wón bě drje do wobchoda přišoł, přez škałbu pak njemóžeše wjace won. Tuž jemu ničo njezwosta, hač we wobchodźe na policiju čakać.
Heil za štyridnjowski tydźeń
Berlin (dpa/SN). Móžne skrótšenje dźěłoweho tydźenja na štyri dny ma zwjazkowy minister za dźěło Hubertus Heil (SPD) za kmany srědk, dźěłowe wiki podpěrować, „jeli so socialni partnerojo na to dojednaja“, rjekny Heil nowinarjam. Předsyda dźěłarnistwa IG Metall Jörg Hofmann bě to namjetował, zo njebychu trjebali dźěłowe městna šmórnyć. Dźěławym měli pjaty dźeń pjenježnje wurunać. Zwjazki dźěłodawarjow tole přidatnych kóštow dla wotpokazuja.
Zesylnja wěstotne naprawy
Berlin (dpa/SN). Po wojerskim puču w zapadoafriskim Maliju su wěstotne naprawy za tam zasadźenych němskich wojakow zesylnili. Woni pólne lěhwo hižo njewopušća, zdźěli rěčnica zasadźenskeho komanda w Geltowje pola Podstupima. W krizojtym kraju su němscy wojacy we wobłuku stabilizowaceje misije UNO Minusma zasadźeni. Lěta 2012 bě kraj nachwilnje do rukow islamistiskich zběžkarjow padnył. Wčera bě wójsko rokoćiło a móc w kraju přewzało.
Wopominaja wopory nadpada
Zwjazkowy předsyda Zelenych Robert Habeck (naprawo) je wčera we ...
Chłostaja ludźi bjez nahubnika
Merkel a Putin telefonowałoj
Joe Biden k wólbam nominowany
Milwaukee (dpa/SN). Demokraća w USA su Joewa Bidena za swojeho kandidata k prezidentskim wólbam wuzwolili. Bywši wiceprezident je wčera wječor na z wulkeho dźěla wirtuelnje přewjedźenym zjězdźe strony kaž wočakowane wjetšinu hłosow delegatow dóstał. Biden móže tak dnja 3. nowembra přećiwo prezidentej USA Donaldej Trumpej nastupić. „To woznamjenja za mnje a moju swójbu jara wjele, dźakuju, dźakuju, dźakuju“, rjekny Biden w kruhu swójbnych. 77lětny chcyše so dźensa k skónčenju zjězda we Wilmingtonje w staće Delaware wuprajić a nominowanje formelnje přiwzać.
Republikanojo USA chcedźa přichodny tydźeń znowa Donalda Trumpa za swojeho kandidata wuzwolić. Trump chcył na dalšu dobu zastojnstwa do Běłeho domu zaćahnyć. Koronakriza bě planowanja Demokratow za stronski zjězd dospołnje přemjetała. Poprawom chcychu jón z tysacami delegatow w hoberskej hali přewjesć.
Wočakuja jasnu poziciju EU
Opozicija w Běłoruskej zhladuje na wurjadny wjeršk Europskeje unije
Minsk (dpa/SN). Přećiwnicy běłoruskeho prezidenta Aleksandera Lukašenka přeja sej wot wjerška Europskeje unije jasnu poziciju k prezidentskim wólbam. Při tym wočakuja, zo EU wuslědk wólbow njepřipóznawa. Opozicija w Minsku ma swoju kandidatku Swetlanu Tichanowskaju za woprawdźitu dobyćerku wothłosowanja 9. awgusta. „EU je nam stajnje prědowała, kotre zasady a měritka płaća, što woznamjenja čłowječe prawa a demokratija.“ To rjekny bywši minister kultury Pawel Latuško powěsćerni dpa do dźensnišeho wurjadneho widejoweho wjerška EU k Běłoruskej. Hdyž EU tele hódnoty dale zastupuje, měnješe politikar opozicije, potom njemóže wona mjeztym 26 lět knježaceho a masiwneho wólbneho falšowanja dla kritizowaneho Lukašenka jako prezidenta připóznać. „Bych sej tule jasnu poziciju přał.“
