Budyšin (SN/CoR). Wot tohole tydźenja móžeš sej Budyske wopomnišćo na wirtuelnym wobchodźenju sam wotkrywać. 65 lět po tym zo bě statna bjezstrašnosć NDR (stasi) jastwo Budyšin II přewzała, skića tam nětko nowe přistupy k sta­wiznam domu. Hosćo pohibuja so jako internetni wopytowarjo w 3D-modelu ­jastwa a postaja sami, wo čim chcedźa so dokładnišo informować dać. Wužiwarjo nadeńdu dokumenty, fota, wideja, zwukowe natočenja a objekty, kotrež pomhaja, do časa stasi so zanurić. W srjedźišću ­steja transport jatych, jich wšědny dźeń a dohladowanje. W jenož pjatnaće mjeńšinach dóstanješ přehlad wo stawiznach jastwa a jeho jatych pod režimom tehdyšeje statneje strony SED.

W Kačej Korčmje zwonka Rakec wotmě serbska studowaca młodźina 11. awgusta 1946 swoju prěnju powójnsku schadźowanku. Přitomni běchu tež zastupjerjo pólskeje a juhosłowjanskeje wojerskeje misije při Berlinskej Zwjazkarskej kontrolnej komisiji a sowjetskeje komandantury z Budyšina. Dopołdnja wotkrychu wobdźělnicy před něhdyšim knježim dworom pomnik sowjetskim a pólskim wojakam 2. ukrainskeje fronty, kotřiž běchu při wuswobodźenju našeje domizny swoje žiwjenje woprowali.

Na kwadratnym obelisku su dźakne słowa w serbskej, pólskej a ruskej rěči. Studenća a dalši ludźo běchu pjenjezy za prěni tajki pomnik po wójnje składowali. Dźěle obeliska buchu pozdźišo do Budyskeho Serbskeho muzeja přewjezene. Schadźowanka skónči so wječor z předstajenjom hry Marje Kubašec „Chodojta“ pod hołym njebjom. Dźiwadźelnicy Chróšćanskeje skupiny su kruch pod nawodom Pawoła Kmjeća něhdźe tysac přihladowarjam předstajili.

Přispomnjenje: Twórba Marje Kubašec měješe tež swoju prapremjeru na schadźowance – na jubilejnej połstatej w lěće 1925. Mikławš Krawc

Chrósćicy/Budyšin (SN/JaW). Horca faza přihotow na předstajenje serbskeje pop- opery „Carpe noctem – njeskónčna nóc“ je zaběžała. To zdźěli zamołwity za wuměłstwowe prašenja Syman Hejduška.

Tak su wčera předpředań kartkow za operu zahajili. Za cyłkownje štyri předstajenja wot 10. do 13. septembra w Chróšćanskej wjacezaměrowej hali „Jednota“ móža sej zajimcy zastupne lisćiki pola časnikarja Jürgena Njeka w Chrósćicach a w Budyskej Serbskej kulturnej informaciji wobstarać. „Kartki sej kupić pak je tež internetnje pola poskićowarja eventim móžno“, informowaše wčera zamołwity za zjawnostne dźěło projekta popoweje opery, kotruž přihotuje skupina Trio a kumple zhromadnje ze Serbskim młodźinskim towarstwom Pawk, Stanisław Wowčer. Lisćiki płaća 12,50 do 17 eurow.

155. wustajeńca małeje galerije na Njeswačanskim hrodźe

Njeswačidło (ML/SN). „To je moje žiwjenje – mój swět“ rěka pjata wustajeńca z twórbami 25 molerjow Budyskeho běrowa seniorow a wokrjesa, kotraž bu njedźelu popołdnju w małej galeriji Njeswačanskeho Stareho hrodu wotewrjena. Hač do 31. oktobra pokazuja tam nětko połsta wolijowych mólbow, akwarelow, rysowankow a dalšich žanrow tworjaceho wuměłstwa.

Přehladka zbliža wopytowarjam krasnosć přirody, twarjenjow a krajinow, zwobraznjenu wot molerjow we wyšej starobje. Wobhladowar móže so do twórbow zanurić, kotrež nastachu w měrnym wokomiku w našej domiznje, w dalšich němskich kónčinach a we wukraju. Jedna so wo dźěła, tworjene w času koronapandemije. Tohodla wustajeja seniorki a seniorojo Budyskeho wokrjesa jenož 50 twórbow, hewak dodawachu stajnje na 80 dźělow za wustajeńcy. Tole wu­zběhny Ingrid Konschak w swojej lawdaciji. Molerka z Wětrowa je z dwěmaj wolijowymaj mólbomaj na pokazce wobdźělena. Molowała je wona „Pohlad na Nowu Wjes z Njeswačanskeho parka“ a „Hatnu krajinu pola Malešec“.