Budyšin (SN). Zwjazk serbskich wuměłcow (ZSW) zhladuje „na kopate połne lěto“. To wuzběhny předsyda towarstwa Jan Bělk minjeny pjatk na hłownej zhromadźiznje ZSW w Budyskej Röhrscheidtowej bašće. Tak wotměchu so mjez druhim „15 čitanjow w nošerstwje zwjazka“ a dwě literarnej rozmołwje „tracTare“. Na kanalu „Serbski TV“ zličichu mjeztym cyłkownje 20 000 klikow. Aktualnje 75 čłonam kiwa „wobćežowace prěnje połlěto 2025. Byrnjež Załožba za serbski lud spěchowanje klětušich projektow přizwoliła, njejsu honorary znajmjeńša hač do kónca junija garantowane.“ Přičiny su nadal njejasne etaty na krajnej a Zwjazkowej runinje. Jednohłósnje spožči něhdźe 30 přitomnych Symanej Hejdušce mandat, ZSW přichodnje w zwjazkowym prezidiju Domowiny zastupować. Dwanaće lět w tymle zastojnstwje skutkowacy Bělk podšmórny, zo „je načasu za młode mocy“.

Nuknica (SN/bn). Towarstwo barakka a Kolektiw Wakuum stej předwčerawšim hudźbno-literarny wječor w Nukničanskim młodźinskim klubje Barakka wuhotowałoj. Jako prěni předstaji Luka Golinski swójskej krótkopowědančce „Do rybow“ a „Bjez titula“, z kotrymajž wěnuje so swójskej identiće jako Serb a přisłušnik queerneje community. Maks Bagańc bě ekstra za zarjadowanje baseń „Dosć měś dosega“ spisał, kotrejež swójsku scenisku recitaciju je natočił a w formje wideja prezentował. Podobnje bě Syman Deleńk postupował, kiž so ze satiriskim tekstom „Obacht, mir platzt die Blase“ ze serbskej diasporu za stajnym blidom w „poklatych Drježdźanach“ rozestaja. Mjez druhim zaběra so z prašenjom, hač „je zjawnje serbować hižo z wurazom patriotizma?“ Trójka Lotti, Alena a Nina skulojći program z wjacorymi přikładami swójskeje lyriki.