Lejna Theurichowa wustaja w SKI

Donnerstag, 11. April 2019 geschrieben von:
„Doma a druhdźe“ rěka titl wustajeńcy z mólbami Lejny Theurichoweje (naprawo), kotruž su wčera w Budyskej Serbskej kulturnej informaciji wotewrěli. Přišli su mnozy swěrni wopytowarjo kulturneho srjedźišća w Serbskim domje a lubowarjo molerstwa. Z wulkim zajimom zbližichu so woni wuměłskim wupłodam nětko w Drježdźanach bydlaceje Serbowki, kotraž jako wuměnkarka zaměrnje swój hobby pěstuje. Inspiraciju čerpa z łužiskeje domizny. Bywša předsydka rady Załožby za serbski lud wustaja w SKI barbojte krajiny a motiwy z přirody w akwarelowej a wolijowej technice. Hač do 30. junija wostanje ekspozicija přistupna. Foto: SN/Hanka Šěnec

Huska (CS/SN). Filmowy režiser a producent Konrad Herrmann bě zwjeseleny a překwapjeny, jako widźeše wulku ličbu wopytowarjow na špihelowej žurli Hušćanskeho hrodu. Na filmowy wječor přichwatali su zwjetša ludźo, kotřiž běchu Němsku demokratisku republiku hišće sami jako dorosćeni dožiwili. Film, kotryž 1948 w Budyšinje rodźeny a mjeztym wjele lět w Berlinje bydlacy Konrad Herrmann předstaji, dótka so ćěmneho kapitla jeje stawiznow. „Honeckerowy trašacy plan“ wotkrywa pozadki w dalokej měrje zatajeneje woprawdźitosće: Něhdźe 85 000 wobydlerjow NDR steješe na tajnych lisćinach. Jich chcychu w padźe wójny abo katastrofow zajeć a do lěhwow tyknyć. Při tym jednaše so wo opozicionelnych, kotřiž chcychu NDR wopušćić, abo wo cyrkwinsce angažowanych. Zasłužba Herrmanna je, zo njepokazuje jenož dokładnje rešeršowane wobsahi aktow, ale zo je zamóhł potrjechenych před kameru dóstać: Tych, kiž stejachu na lisćinach, a tež tych, kotřiž su lisćiny zestajeli. Runje w poslednim padźe bě to njesměrnje ćežko, dokelž bě lědma štó zwólniwy něšto k temje rjec.

K smjerći wuměłca-molerja Jana Buka

Mittwoch, 10. April 2019 geschrieben von:

Serbski moler Jan Buk zemrě 1. jutrownika w 97. žiwjenskim lěće. W rozestajenju z dogmatiskimi nahladami wo tym, što měło serbske wuměłstwo zdokonjeć, a we wotmjezowanju wot kulturnopolitiskich předpodaćow nasta cyle swójske Bukowe tworjenje. Tak sta so wón z reprezentantom nowočasneho serbskeho wuměłstwa. Jeho wuměłski euwre přeswědči z kwalitatiwnej wurunanosću. Z bědnych prócowanjow za čas studija we Wrócławju a w Drježdźanach spočatk 1950tych lět, ze zasakłeho zakitowanja swójskich wuměłstwowych nahladow přećiwo zadźěwkam časa nastachu harmoniske kompozicije krajinow, ćišnow a aktow we wobknježenej formje.

Pokazuja jutrowne znamki a kołki

Mittwoch, 10. April 2019 geschrieben von:
Jutrowne listowe znamki, póstowe kołki a pohladnicy – w dojutrownym wjeselu su wčera w Budyskim žonopowym wobchodźe/muzeju/manufakturje na Mjasowych wikach nowu wustajeńcu wotewrěli. Wot towarstwa Budyskich zběraćelow listowych znamkow organizowana přehladka je hač do 3. meje widźeć. Nimo listowych znamkow z Němskeje a druhich krajow wustajeja tež listy, kotrež je běrow jutrowneho zajaca Němskeho pósta dźěćom wróćo pósłał. Budyski zwjazk filatelistow wobsteji mjeztym 25 lět a ma tuchwilu 39 čłonow. Kóždu prěnju njedźelu přewjeduja woni zarjadowanje, hdźež sej znamki wuměnjeja. Foto: SN/Hanka Šěnec

Wšitke techniki w jednej swójbje

Mittwoch, 10. April 2019 geschrieben von:

Slepo (JoS/SN). Dobra nalada knježeše minjeny kónc tydźenja mjez wopytowarjemi 22. Slepjanskich jutrownych wikow runje tak kaž mjez 35 jejkadebjerjemi a něhdźe 50 wikowarjemi z Łužicy a wot druhdźe. Nalěćo je so ze swojeje najrjeńšeje strony pokazało a mnohich ludźi do Serbskeho kulturneho centruma přiwabiło. Woni wužiwachu mjez druhim składnosć, wobhladać sej wosebitu wustajeńcu, přehladku debjenych jejkow ze zašłych wjace hač 20 lět. Najmjeńši wopytowarjo zajimowachu so skerje za ćipki, kotrež běchu so hakle krótko do toho wulahnyli.

Na žurli Serbskeho kulturneho centruma móžachu wopytowarjo debjerjam při jich filigranym dźěle přihladować a samo dožiwić, kak woni jeja štrusow abo emuwow pisanjeja. Wosebitosć stejnišća Roßbachec swójby z Choćebuza bě, zo sy tam wšitke debjenske techniki wobdźiwać móhł. Dagmar Roßbach wěnuje so wu­žrawanju a škrabanju, mandźelski Wolfgang a wnučk Bruno wob­knježitaj wóskowanje a wnučka Emma bosěrowanje. Najstarša wobdźělnica bě Uta Čižankowa z Horow, najstarši wobdźělnik Kurt Pluta z Běłeje Wody.

Płody swojeje pilnosće žnjeli

Dienstag, 09. April 2019 geschrieben von:

Hudźba w žiwjenju dźěći a młodostnych wažnu rólu hraje. Tak chodźa tydźeń wob tydźeń do hudźbneje šule a wuknu na instrumenće hrać. Zo móhli swoje zamóžnosće dale wuwić, dyrbja zdobom wšědnje zwučować. Płody pilnosće móžachu talenty minjeny kónc tydźenja na krajnym wubědźowanju „Młodźina hudźi“ w Lipsku žnjeć.

Lipsk (SN/BŠe). „Wubědźowanje ,Młodźina hudźi‘ je mjez mnohimi hudźbnymi wurisanjemi něšto wosebite. Wjele wuměłcow dźě słuša k mytowanym. Tole měli sej wšitcy wuwědomić. Hudźba je wam něšto wosebite, za čož wjele časa woprujeće. Waša zahoritosć mje jara zwjesela“, zwurazni jednaćelski prezident Zwjazka wuchodoněmskich lutowarnjow dr. Michael Ermrich, podpěraćel krajneho wubědźowanja „Młodźina hudźi“.

Wulki respekt!

Montag, 08. April 2019 geschrieben von:
Na předstajenje jara naročneje wuměłstwoweje twórby „Israelowa zrudoba a tróšt“ Korle Awgusta Kocora so zwažić mějach za chrobłe. Tež, dokelž bě intendantka Serbskeho ludoweho ansambla Judith Kubicec prajiła, zo njebě ju Kocor za předstajenje z lajskimi cyłkami ženje předwidźał. Tohodla njejsu ju po premjerje před wjac hač sto lětami wjac předstajili. Hakle 1994 bě tak daloko a znowa nětko kónc ­tydźenja w Chrósćicach a Drježdźanach. Wukon je wulce přeswědčił. Dožiwjenje w Chróšćanskej cyrkwi bě přemóžace a přewšo hnujace. Spěwne cyłki kaž tež hudźb­nicy běchu wuběrnje na wustupaj přihotowani, za čož zasłužeja sej předewšěm laj­kojo mjez akterami wulki respekt! Projekt je so wulkotnje radźił, tež dokelž běchu zamołwići sčasom započeli zwučować. Zwjazkej serbskich spěwarskich towarstwow a SLA słuša dźak, zo stej so na to zwažiłoj. Předstajeni stej pokazałoj, što serbske chóry zamóža. Brawo! Janek Wowčer

Socialne prašenje 21. lětstotka

Freitag, 05. April 2019 geschrieben von:

Smochćicy (SN/bn). „Rozmach prawicarstwa“ rěkaše wčera přednošk Sebastiana Friedricha w Smochčanskim Domje biskopa Bena. W rjedźe tamnišeho foruma rozjimaše Duisburgski socialnowědnik a žurnalist z wuraznje „lěweje per­spektiwy“ přičiny, towaršnostne pozadki a hłownych akterow mjenowaneho postupa.

„Spočatnje chcu na to skedźbnić, zo mam wopřijeće ‚ruk naprawo‘ za problematiske. Jedna so skerje wo wlečity proces, kotryž po cyłej Europje wobkedźbujemy“, Sebastian Friedrich podšmórny. Rozmach prawicarstwa zepěra so za njeho na štyri stołpy. „Klasiske konserwatiwne strony njejsu kmane byli, reagować na towaršnostne změny, kotrychž zazběh tworja hibanja 1960tych lět. Wjetšina z nich je so tuž modernizaciji přiměriła a ju zdźěla aktiwnje šěriła“, wědomostnik rozłoži, mjez druhim prawa žonow a runostajenje homoseksualnych wuzběhujo. „Něhdźe 20 do 25 procentow stronjanow pak tele změny wotpokaza, z čehož nasta fundament dźensnišich narodnokonserwatiwnych prudźenjow.“

Ta ćišina tak wulka je

Freitag, 05. April 2019 geschrieben von:
Za zajimcow, kotřiž so na trochu wjetšej bazy hač jenož fifolenju z maksimalnje 240 znamješkami informuja, bě wčerawši přednošk Sebastiana Friedricha w Smochćicach skerje kompaktne zjimanje situacije dyžli žórło nowych dopóznaćow. A byrnjež so wón jara wo wěcownosć prócował a k dialogej tež z ludźimi přećiwneho měnjenja namołwjał, diskusija po referaće je wujewiła, zo někotři docyła na wěcywustojnej rozmołwje zajimowani njejsu. Nawopak: w digitalnej anonymiće tajcy rady hroža, přiběrajcy tež z morjenjom. Friedrich słuša, kaž tež na přikład Budyska wědomostnica Annalena Schmidt abo sportowy žurnalist André Voigt, k zmužitym akteram, kotřiž so najebać wobstajne pospyty zatrašenja jasneho a jakneho słowa njezdawaja. To pak měł jenož započatk być. Jedne z woprawnjenych prašenjow z publikuma bě: „Hdźe wostanje wukřik wjetšiny?“ Mi je tež hišće wo wjele přemjelčo. Bosćan Nawka

Z wulkim wuměłcom so rozžohnowali

Freitag, 05. April 2019 geschrieben von:

Njebjelčicy (SN/JaW). Syła Serbow je wčera popołdnju wuznamneho molerja, čestneho wobydlerja Njebjelčanskeje gmejny a čestneho wobydlerja Budyšina a čestneho čłona Zwjazka serbskich wuměłcow (ZSW) Jana Buka na Njebjelčanskim kěrchowje k rowu přewodźała a so z nim rozžohnowała. Nimo swójbnych běchu tež mnozy zastupjerjo serbskich institucijow a serbskich towarstwow přitomni kaž tohorunja zastupjerjo komunow.

Serbska debata

Neuheiten LND