Domchowanku swjećili
Fota: Leńka Ješkec
Je hižo zaso nazyma a wšitke płody su zrałe. Dźěći pěstowarnje „Jan Radyserb-Wjela“ w Budyšinje su so za tute wulkotne płody, kotrež rostu pola nas na zahrodźe abo na polach, dźakowali. Kóžde dźěćo je korbik ze sadom abo zeleninu napjelnjeny na našu domchowanku sobu přinjesło. Dźěći ze skupiny „Wódny muž“ su so do kruha zesydali. Potom pokazowaše kóždy, što je měł do swojeho korbika składźene. Čerstwy sad a zeleninu połožichu na to kaž mały mandala do kruha. Spěwachmy a rejowachmy hišće po spěwomaj „W jabłukowym małym“ a „Dźak ći Božo za tute dary“. Na kóncu dachmy sej słódne jabłuka zesłodźeć.
Leńka Ješkec
Tójšto wo hribach zhonili
Něhdźe 30 do 40 dźěći je w nazymskich prózdninach Worklečanski hort wopytało. Wosebity dźeń běše, jako přijědźe k nim fachowča z Drježdźan. Ekspertka je dźěćom zajimawostki wo lěsnych hribach rozłožiła. Tak zeznachu woni wšelake družiny hribow a na čo maja kedźbu dawać, zo móhli hriby rozeznawać. Dale zhonichu wo tym, kak so hriby rozmnožeja a kak wulki je teritorij, na kotrymž rostu. To njebě dotal wjetšinje dźěći znate. Wone zeznachu tež jědojty a jědźny hrib. Mjeztym woni tež wědźa, zo hriby jenož w lěsu njerostu, zo móžeš sej je wopjec a zo je to słódna chłóšćenka za nazymski piknik z pušćenjom zmijow. Na to běchu dźěći jara kreatiwne. Tak je nastała rjana nazymska pycha z přirodnych materialijow. A što je, jeli was doma wulka wostuda trapi? Dźěći maja ideju za wulkotnu paslenku. Móžeće sej małeho njetopyrja paslić abo sej swójski adwentny kalender zhotowić. Kubłarki horta „K wódnemu mužej“ Worklecy
Kuzłarska šćežka
Aktiwni a přichodni wučerjo hromadźe po puću
Pod nawodom Serbskeho šulskeho towarstwa wopyta skupina wučerjow a studentow dansku mjeńšinu w Schleswigskej
Nimo serbskeho ludu mamy w Němskej tři dalše připóznate mjeńšiny. Su to Sintojo a Romojo, kotřiž su po cyłym kraju rozbrojeni žiwi, Danojo w Němskej kaž tež Frizojo. Poslednjej mjenowanej mjeńšinje sydlitej přewažnje w sewjeru Němskeje, w Schleswigsko-Holsteinskej. Tam matej swójske pěstowarnje a šule. Teju kubłanski system rozeznawa so zdźěla jara wot serbskeho a zbudźa tuž zajim łužiskich pedagogow. Za tutych organizowaše Serbske šulske towarstwo z podpěru Sakskeho krajneho zarjada za šule a kubłanje (LaSuB) njedawno studijnu wuprawu do hraničneje kónčiny mjez Němskej a Danskej.
Z podpěru mnohich ma w sprjewinym měsće prěnja Budyska wěža ...
Z njewšědnej ideju chce Njebjelčanske towarstwo Kamjenjak z.t. sprjewine město Budyšin wobohaćić. Nastać ma wuměłska twórba, kotraž skedźbnja na historiski twar a staru powědku. Za to přewjedźe Kamjenjak crowdfunding-akciju na platformje 99 Funken.
Stara wodarnja w Budyšinje je drje najwoblubowaniši fotowy motiw w ansamblu staroměšćanskeje siluety. Techniski pomnik sprjewineho města steji na łužiskim zornowcu. A runje z njeho ma nastać wuměłska twórba, měrjaca so předewšěm na dźěći a wšěch tych, kiž chcedźa so zaběrać z baju wo žabje, kotraž bě swój čas tomu zadźěwała, zo móže woda po rołach běžeć.
Kak mjezynarodne bankowki tež łužiske stawizny wotbłyšćuja
Druhdy so wudani, hdyž dokładnišo pokuknješ. Před dlěšim časom nawróći so moja přichodna mać z dowola w Pólskej a stłóči mi zbytk złotych do ruki. Dokelž bydlu bliže k pólskej mjezy hač wona, změju skerje składnosć, je wudać, kaž měnješe. Mjez pjenjezami bě tež bankowka w hódnoće 20 złotych, na kotrejž je někajki pólski kral zwobraznjeny. Dokelž mějach runje čitanske nawoči na nosu, spóznach mjeno monarcha: Bolesław I Chrobry. Njeje to ...? Prawje, jedna so wo pólskeho wójwodu a pozdźišeho krala, dźakowano kotremuž w lěće 2002 1 000. róčnicu prěnjeho naspomnjenja Budyšina swjećachmy.
Serbske žiwjenje w Hodźiju njewomjelknje, byrnjež tam ličba Serbow ...
Pohladnicy powědaja wo dawnych časach, swědča wo podawkach a ludźoch. Alfons Handrik wotkrywa nam swět, na kotryž smy minjene lěta nimale pozabyli.
Pohladnica z lěta 1904 předstaja Hodźij ze swojej markantnej dwuwěžowej cyrkwju. Patronaj Božeho domu staj swjataj Pětr a Pawoł.
Mjeztym zo steješe na samsnym městnje hižo w lěće 1010 mała kapałka, bu 1076 z kamjenjow murjowana cyrkej nowonatwarjena a wot biskopa Bena poswjećena. Na to bu w běhu 13. lětstotka cyrkej w romaniskim stilu natwarjena. Z toho buchu wokoło lěta 1220 zapołoženy podtwar dźensnišeje dwójneje wěže kaž tež wokno prědneje strony wěže wužiwane. Krótko do reformacije mjez 1505 a 1517 bu cyrkej w pózdnjogotiskim stilu znowa přetwarjena. W lěće 1589 woheń cyrkej jara wobškodźi. Kónc 19. lětstotka bu 63 metrow wysoka masiwna dwójna wěža, kotraž hišće dźensa krajinje bytostnje charakteristiski wobraz dawa, poswjećena.
Wosebity posledni šulski dźeń
Na poslednim šulskim dnju do nazymskich prózdnin pućowachu wuknjacy Kulowskeje zakładneje šule do lěsa při lěsnej kupjeli. Po zhromadnym witanju podachu so na wšelakore stacije. Tam zhonichu zajimawosće wo dźěle wohnjoweje wobory, wuchowanskeje słužby abo hajnika. Starši běchu stacije přihotowali, hdźež móžachu so šulerjo samo wubědźować. To bě wšitkim dźeń połny dožiwjenjow. Lubina Dučmanowa
Rjany dyrdomdej
Foto: Paula ČornakecW lěću sym z wowku, mamu, Lenku a Benom w Budyšinje dowol přežiwiła. Smy wokoło Lubina pućowali. Na jednym městnje słyšachmy samo fecich echo. Po tym běchmy z wowku hišće w kinje. Přenocowali smy w bydlenčku nad hosćencom „Culinarium“. Přichodny dźeń smy po měsće dundali a w dźěćacej kofejowni „Valentin“ pozastali. To bě najrjeńše dožiwjenje! Paula Čornakec, Chrósćicy
