Łódź (JBR/SN). Njewšědna powěsć Polakow chětro rozbudźa: Arcybiskop a metropolit Grzegorz Ryś je měšnikej swojeje arcydiecezy Łódź klatwu napołožił a jeho z katolskeje cyrkwje wuzamknył. Přičina je slědowaca: Michał Misiak je so druhi raz wukřćić dał, a to w rěce Jordan z rukow protestantiskeho pastora. Wotnětka njesmě wón wjace jako katolski duchowny skutkować – njesmě žane Bože mšě swjećić, žane sakramenty spožčeć, žanu nabožinu podawać, žane swjate woprawjenje wudźěleć ani přijeć.

Michał Misiak je młody a jara woblubowany farar. A to wosebje tohodla, dokelž je w nocy na dróhach Łódźe ludźi spowědał, młodźinske křesćanske reje, t. mj. „chrystoteki“ bjez alkohola, organizował a je samo w bordelach domyswjećenje přewjedował. Wěriwi su zludani a proša měšnika, do katolskeje cyrkwje so nawróćić! A Misiak w internetnym wideju zrudny praji: „Njejsym so z cyrkwju ženje rozžohnował. Lubuju ju a jej dale přisłušam.­ Bych rady mandźelsku měć a z njej hromadźe jako misionar słowo Bože šěrić chcył w krajach, hdźež Boha nje­znaja. Ale cyrkej mi to zapowědźa.“

Wulke podawki so sčasom přizjewjeja. Na Čěsku čaka wulki podawk toho razu, zo woswjeći jeje najsławniši, po cyłym swěće znaty, tež w Němskej a nic mjenje w Serbach woblubowany šlagrowy spěwar Karel­ Gott 14. julija wosomdźesaćiny. A přizjewjeny bu žadny jubilej sławneho „čěskeho sołobika“ tele dny wot najrenoměrowanišeho hudźbneho nakładnistwa kraja Supraphon z wudaćom dweju kompendijow, wopřijimaceju cyłotne spěwne kubło ze šěsćdźesat lět trajaceje karjery Gotta. Jedna z njeju poskića na štyrjoch cejdejkach po 20 titlach „Najwjetše hity 1964–2019“, tamna prezentuje na 15 cejdejkach „Single 1962–2019“.

Peter Čačko rozprawja z Bratislavy za Serbske Nowiny

Wo najwuznamnišim junijskim podawku za naš kraj Słowaksku, wo zapokazanju do zastojnstwa Zuzany Čaputoveje, wuzwo­leneje dnja 30. měrca we wurisanskim kole na nowu hłowu stata, su Serbske Nowiny aktualnje a nadrobnje rozprawjeli. Nablaku je 46lětna prezidentka – mać dweju dźowkow – swój prěni wukrajny wopyt tradicionelnje do Prahi absolwowała­, wobkrućejo z tutej gestu přisamom přikładne susodstwo z bratrowskej Čěskej. Nuzne tež měješe do Brüssela sej dojěć, hdźež ju šef Europskeje unije Jean-Claude Juncker za to pochwali, zo je Słowakska­ „najstabilniši kraj regiona“. Přichodnej wukrajnej wiziće dowjedźetej našu prezidentku do Chorwatskeje a Estiskeje.

Praha (ČŽ/K/SN). Tež druhi pospyt opozicije w nětčišej legislaturnej periodźe, z wuprajenjom njedowěry sejma powalić ministerskeho prezidenta Andreja Babiša (ANO) a jeho wot KSČM tolerowany kabinet ministrow z ANO a ČSSD, je zwrěšćił. Při wothłosowanju na wčera­wšim wurjadnym schadźowanju delnjeje komory parlamenta móžachu ODS, Piraća, KDU-ČSL a dalši oponenća po cyłych 20 hodźin trajacym debatowym marathonje z kontra a pro za swój wotpohlad jeno 85 z móžnych 91 hłosow naškrabać – trjebali bychu 101. Při tym běchu jich rěčnicy Babiša masiwnje nadběhowali a jeho mjeńšinowemu knježerstwu ANO a socialdemokratow njeskutkownosć a njewuspěšnosć wumjetowali.

Premier Andrej Babiš mjenowaše prócowanje opozicije wo powalenje knježerstwa „pospyt, Čěsku republiku destabilizować“. Wšitke twjerdźenja wo jeho „konflikće zajimow“, wo njewoprawnjenym přiswojenju pjenjez EU abo wo jeho sobudźěle ze statnej wěstotu ČSSR wón jako wopačne wotpokaza. Na tamnej stronje pokaza na to, zo njeje so Čěskej republice hišće nihdy tak derje šło kaž nětko.