Pólska hotuje so na nowy wirus, byrnjež dotal žadyn pad njezwěsćili

Waršawa. Turisća, kotřiž so wot spočatka tydźenja ze zymskeho dowola z Italskeje do Pólskeje wróća, dožiwjeja na lětanišćach kraja witanje cyle wosebiteho razu: Sobudźěłaćerjo strowotniskeho zarjada w škitnych woblekach jich w dołhich rynkach izoluja. Ludźo smědźa lětanišćo hakle wopušćić, hdyž su prěni test na zwyšenu temperaturu wobstali a swoje wosobinske kontaktne daty zawostajili.

W Europje rozšěrjacy so nowy corona-wirus, zawinowacy schorjenje płucow, je tele dny wusahowaca tema w medijach kraja. Gazeta Wyborcza je problematice minjenu wutoru samo cyłu titulnu stronu wěnowała. „Corona-wirus bliski“, rěkaše hłowne nadpismo. „Liča z wirusom“, pisaše samsna nowina nazajtra. Přichodne dny chcedźa samo w parlamenće wuradźować, kak móhli Pólsku před móžnej epidemiju škitać. Při tym njeje so wirus w Pólskej hišće jewił. Po informacijach strowotniskeho ministerstwa je mjeztym něhdźe połsta wosobow w chorownjach, dokelž maja „wěste symptomy“. Dopokazana wšak strašna infekcija dotal njeje.

Poslednja februarska sobota skići składnosć, w Słowakskej z wólbami parlamenta stat kaž tež towaršnosć změnić. Nic mjenje hač 25 politiskich stron a naj­wšelakorišich hibanjow je sta kandidatow za najwyši zakonje wobzamkowacy organ kraja nastajiło.

Dotalna knježerstwowa koalicija stron Smer-SD, SNS a Most-Híd po poslednich zwěsćowanjach wotpohladow wolerjow nima hižo žane wuhlady na dobyće. Za to je žedźenje ludnosće za změnu wočiwidna. Njepřewidźomna wšak je tež móžnosć, zo ultraekstremna L’udová strana Naše Slovensko (L’SNS) zlě wuwołaneho nacionalista-radikalista Mariana Kotleby nastupajo ličbu hłosow druhe městno wobsadźi – L‘SNS ma dale a wjace přiwisnikow.

Praha (ČŽ/K/SN). W Čěskej gripa po cyłym kraju grasěruje, a schorjenych je telko ludźi, zo Praske strowotniske ministerstwo wo epidemiji rěči. Na 100 000 wobydlerjow zwěsćichu 1 865 schorjenych. Po wudawanju hygieniskich městnow su wšitke starobne skupiny potrjechene. Najwjace schorjenych je w poměrje k ličbje wobydlerjow w južnych Čechach a w Morawskošleskim wobwodźe. Nowiny pišu, zo někotre strowotniske a socialne zarjady gripoweje epidemije dla wopyty wobmjezuja.

W najbóle potrjechenym južnočěskim wobwodźe zličichu samo 2 211 schorjenych na 100 000 wobydlerjow. Tam je dotal jedne dźěćo zemrěło. W Morawskošleskim wobwodźe je na 100 000 ludźi 2 100 chorobnych padow, z čimž je próh epidemije tohorunja překročeny. W Liberecskim wobwodźe je ličba schorjenjow wo 18 procentow přiběrała – na 100 000 wobydlerjow je tam 1 191 pacientow. Po cyłym wobwodźe Ústí je wjace hač 14 000 wosobow na gripu schorjeło. Zwjetša w Čěskej gripa w januaru zachadźa. Loni bě wona hakle w februaru wudyriła. Kóždy króć na nju 1 500 do 2 000 ludźi zemrěje.

RJEMJESLNIKOW je w Čěskej spochi mjenje. Hdyž bě lěta 2017 w susodnym kraju hižo 300 000 rjemjeslnikow přemało było, pobrachuje tam nětko 400 000. We wšěch powołanjach rjemjeslnicy faluja. W twarstwje na přikład pytaja mulerjow, ćěslow, třěchikryjerjow, blidarjow, molerjow a lakěrowarjow. To samsne nastupa instalaterow, klempnarjow a skowarjow. Čěska hospodarska komora a Zwjazk přemysła a wobchada skoržitej, zo je za wšě profesije přemało wučomnikow kaž tež fachowych dźěłaćerjow.

Njedostatk ludźi na dźěłowych wikach zawinuja po hódnoćenju ekspertow někotre faktory. Sobu najwažniši z nich je, zo dale a wjace rjemjeslnikow staršeje generacije do zasłuženeje renty wotchadźa. Młódši pak wotchady zdawna njenarunaja. Tež z teje přičiny nic, dokelž so demografiske wuwiće minjenych dwaceći lět zdobom na te wašnje wuskutkuje, zo je dale a mjenje wotchadnikow srjedźnych šulow. A střeća dyrbjachu zwěsćić, zo je po lěće 2000 zajim wo powołanske šulstwo chětro popušćił.