Pólske statne rěčnistwo symboliske wotprawjenje njepochłostało

Waršawa. Wohidna akcija pólskich nacionalistow před lětomaj w Katowicach nima za nich žanežkuli sudniske sćěhi. Statne rěčnistwo je nětko zdźěliło, zo je přepytowanja wotzamknyło a zo nima akciju za chłostajomnu.

Pólske skupiny „narodowcow“ běchu so w nowembru 2017 na hłownym naměsće Katowic zhromadźili. Ze swojej akciju protestowachu woni přećiwo šěsć pólskim zapósłancam Europskeho parlamenta, kotřiž běchu za jeho rezoluciju hłosowali, měrjacu so přećiwo pólskej justicnej reformje. Po měnjenju parlamenta Europskeje unije w Brüsselu reforma njewotwisnosć pólskeje justicy wohroža. Demonstranća w Katowicach běchu k tomu wulke portretowe fota wonych šěsć zapósłancow symbolisce na šibjeńcy powěsnyli.

Peter Čačko rozprawja z Bratislavy za Serbske Nowiny

Lětuši nowember je w Bratislavje kaž po cyłej Słowakskej a tohorunja Čěskej republice stał w znamjenju wosławjenja 30. róčnicy něžneje (somoćaneje) rewolucije. Bjezmała w kóždym měsće wotměwachu so zarjadowanja, dopominace na přewrót před třomi lětdźesatkami, kotryž wjedźeše naposledk k historiskej změnje w towaršnostnym a politiskim žiwjenju tehdyšeje Čěskosłowakskeje.

W medijach wustupowachu jako swědkojo časa wobdźělnicy rozestajenjow w nowemberskich dnjach 1989. Wobrazliwje dokumentowali su rozsudne podawki, kotrež započachu so z pomjatnej swěčkowej manifestaciju w Bratislavje hižo 25. měrca 1988 a wjedźechu k pochodej słowakskich studentow 16. nowembra 1989, přisamom na předwječoru hłowneho podawka. A to bě demonstracija Praskich studentow na Narodnej dróze, kotruž je policija z gumijowymi retlemi brutalnje podusyła.

Bratislava (SŽ/K/SN). W Słowakskej je ze wšěm hubjeńšo hač w Čěskej. To zwěsća zjednoćenstwo předewzaćelow kraja Klub 500. Słowakska republika porno Čěskej republice bjezmała na wšitkich sektorach hospodarstwa kaž tež towaršnostnym wuwiću zawostawa. „Wot lěta 2014 smy přestali našeho zapadneho susoda nastupajo wysokosć socialneho bruttoprodukta (SBP) dosćahować, zasłužamy mjenje, mamy špatniše zdźěłowanske wuslědki, płaćimy wyše dawki a popłatki a nic naposledk mamy hóršu justicu“, wuchadźa z analyzy Kluba 500. Wot časa rozpada zhromadneho stata hromadźi a wuhódnoća tón zakładne faktory nastupajo wuwiće w krajomaj. „Z aspekta mjezynarodnych normow njejsmy žane jeničke polo namakali, na kotrymž by Słowakska lěpša była hač Čěska“, přispomnja k tomu direktor Kluba 500 Tibor Gregor. „Słowakska je pola socialneho bruttoprodukta Čěsku­ wjele lět poněčim dosćahowała. Hdyž bě słowakski SBP 1994 jeno třećinu čěskeho wučinjał, rozrosće wón pozdźišo na přibližnje 44 procentow. W minjenych lětach pak je Čěska spěšnišo rostła hač Słowakska“, Gregor podšmórnje.

Praha (dpa/SN). Zamołwići w Čěskej liča z dołhimi, hač do Němskeje a druhich krajow sahacymi rynkami nakładnych awtow, hdyž za něšto dnjow dotalny system­ nadróžneho popłatka za nakładne awta přestaja a nowy system zawjedu. Dotal bu runje 251 000 jězdźidłow registrowanych, štož je 55 procentow wšěch wočakowanych přizjewjenjow, zdźěli čěski minister za wobchad Vladimír Kremlík w Praze. Politikar chcył spedicije přeswědčić, sej ručež móžno nowe nastroje za wotličenje mawty wobstarać. K zahajenju noweho na satelity złožowaceho so systema 1. decembra liči wobhospodarjer Czechtoll z kilometry dołhimi zatykanymi dróhami před předawarnjemi mawtowych nastrojow. „Kóždy čaka hač do poslednjeho wokomika“, kritizuje jedna­ćel Czechtoll Matej Okali. Tež wón liči z dołhimi rynkami nakładnych awtow. „Problemy njenastanu jenož w Čěskej, ale tež w Słowakskej, Pólskej, Němskej a Awstriskej.“ Na wobchadnych će­žišćach chcedźa mobilne předawarnje nastajić. Nimo toho zarjaduja přidatne parkowanišća. Połoženje na namjeznych přechodach chcedźa wodnjo a w nocy z trutami wobstražować.