Wjace migrantow
Běrny z awtomata
Praha (ČŽ/K/SN). Za wotbytk swojich produktow je sej Velhartičanske ratarske předewzaće VESA wurjadnu nowosć wumysliło. Najwjetši čěski plahowar běrnow skonstruowa awtomat, z kotrymž poskića běrny ze swojich zahonow. „Bramboromat“ (běrnomat) je atrakcija. „Wšědnje předawamy přerěznje dwaj centnarjej běrnow“, přeradźa Viktor Kopačka, direktor předewzaća 60lětneje tradicije. „W susodstwje je hród Velhartice. Dźiwajo na to, zo wopytuja jón syły ludźi, bě nam myslička zeschadźała, zo móhli jim tola swoje wudźěłki poskićeć“, direktor Kopačka wuswětla.
Turizm wjadnył
Praha (ČŽ/K/SN). Turistika a hospodowanje hosći stej sobu najbóle wot koronawirusoweje krizy potrjechenej hałžce čěskeho hospodarstwa, při čimž su najčućiwiše wuskutki w lětušim druhim kwartalu nastali. Rigorozne naprawy knježerstwa přećiwo pandemiji wuskutkowachu předewšěm w aprylu a meji wobmjezowane pućowanske hibanje domoródnych. Wukrajne wopytowarstwo je w tym času praktisce cyle wuwostało.
Zestawa ludnosće Słowakskeje
Bratislava (SŽ/K/SN). Słowakska měješe loni 5 457 873 wobydlerjow – 792 525 žonow a 2 556 350 muži. Wobydlerjow staroby 16 do 65 lět bě 3 688 978, dźěći 863 729 a ludźi staršich hač 65 lět 905 175. To publikuje Słowakski statistiski zarjad. Dobrych 5,37 milionow wobydlerjow (96,4 procenty) wobsedźeše słowakske staćanstwo. Něhdźe dwaj procentaj ludnosće stej romaskeje narodnosće. Wjetšina w Słowakskej bydlacych wukrajnych ludźi pochadźa ze statow Europskeje unije (60 311), dalšich 17 132 wukrajnikow je wot druhdźe. 493 wobydlerjow bě bjez statneje přisłušnosće.
Najsylnišu skupinu wobydlerstwa njesłowakskeho staćanstwa tworjachu Češa (14 445), sćěhowachu Madźarojo (11 092), Rumunojo (7 137), Polacy (6 081) a Němcy (4 399). Z krajow zwonka EU sydlachu w Słowakskej we wjetšej ličbje Ukrainjenjo (407), dale Rusojo (1 729), Vietnamjenjo (1 728), Chinjenjo (1 051), Korejčenjo (590), Sewjerni Makedonjenjo (480) a Šwicarjo (365). Słowakske staćanstwo dósta 586 wukrajnikow. Najwjace z nich bě z Čěskeje (88), Ukrainy (76) a Wulkeje Britaniskeje (70).
Babiš chce dawk na dochody znižić
Praha (dpa/SN). Čěski ministerski prezident Andrej Babiš je namjetował, k wožiwjenju hospodarstwa dochodowy dawk na 15 procentow znižić. Ludźo bychu potom widźeli, „zo nimaja přičiny so přichoda bojeć“. To praji załožer populistiskeho hibanja ANO w interneće. Předsyda socialdemokratiskeho koaliciskeho partnera ČSSD Jan Hamáček ma namjet za njerealistiski. Straty dochodow bychu wjetše byli hač wšón etat nutřkowneho ministerstwa, kotrež wón sam nawjeduje, Hamáček kritizuje.
Čěska nałožuje za wobličenje dochodoweho dawka tak mjenowany „superbrutto“. W nim přiliča k bruttomzdźě hišće podźěl dźěłodawarja za socialne zawěsćenje. Efektiwna sadźba wučinja tak tuchwilu něhdźe 20 procentow.
Opozicionelnych demokratow ze strony ODS ideja knježerstwoweho šefa tohorunja zadźiwa. Wotpowědny namjet strony leži hižo dwě lěće njewobdźěłany w parlamenće, rjekny předsyda ODS Petr Fiala nowinarjam. Wukon čěskeho hospodarstwa bě w druhim kwartalu koronakrizy dla porno minjenemu lětu wo 10,7 procentow woteběrał.
Zaso krućiše naprawy w Čěskej?
Marek Krawc rozprawja z Prahi za Serbske Nowiny
Kónc z koronu – to bě před měsacom přičina lóštneje hosćiny na Praskim Karlowym mosće. Tuchwilu so zda, zo su Praženjo přezahe wyskali. Po krótkej přestawce jewješe so wirus znowa w čěskej stolicy, a to w hudźbnym klubje „Techtle Mechtle“. Za čas jednoho wječora je so tam 90 hosći natyknyło. W tymle klubje wotmě so mjez druhim zetkanje přisłušnikow wšelakich koparskich a floorballowych towarstwow. Powěsć je wosebje mjerzaca, dokelž njejsu sportowcy płaćiwe postajenja wobkedźbowali a su wirus po cyłym měsće rozšěrjeli.
Nowu busowu čaru wotewrěli
Hrádek nad Nisou (ČŽ/K/SN). Wot kónca zašłeho tydźenja je sewjeročěske městačko Hrádek nad Nisou wuchadźišćo noweje busoweje čary, kotraž po dołhosći 61 kilometrow tři kraje zwjazuje. To woznamjenja, zo přeprěča tam bus nic mjenje hač pjeć razow mjezy Čěskeje, Němskeje a Pólskeje. Z Hrádeka wjedźe nowa busowa linija do Žitawy, wottam do Bogatynje, zwotkelž dźe dale do čěskeho Frýdlanta, zo by pokročowała do Noveho Města pod Smrkem a skónčiła w pólskim Świeradowje-Zdroju.
Samo na sebi bě předwidźane, busowu čaru w Liberecskim wobwodźe hižo 5. junija wotewrěć. Koronawirusowa pandemija ze slědowacym zawrjenjom hranicow bě wšak wšitke plany a přihoty přetorhnyła. A dołho njebě jasne, hač hodźi so projekt lětsa scyła hišće zeskutkownić. Wobchad na nowej čarje wobstaruje ze swojimi jězdźidłami Liberecske předewzaće ČSAD. Z liniju je po lětdźesatkach zaso direktny zwisk mjez Žitawu a Frýdlantom daty, předewšěm pak je turizmej w Jizerskich horach pomhane. Z Hrádeka nad Nisou hač na kónčnu staciju płaći jězdźenka 50 krónow (njecyłej 2 euraj).
Wuslědk wólbow potwjerdźeny
Waršawa (dpa/SN). Najwyše sudnistwo Pólskeje je wuslědk prezidentskich wólbow za płaćiwy deklarowało a najwjetši dźěl wjace hač 5 000 skóržbow ludźi wotpokazało. W rozsudnym wólbnym kole 12. julija bě mějićel zastojnstwa Andrzej Duda wot narodnokoserwatiwneje knježaceje strony PiS 51 procentow hłosow dóstał. Jeho wužadar Rafał Trzaskowski, liberalnokonserwatiwny wyši měšćanosta stolicy Waršawy, bě jemu z 49 procentami snadnje podležał.
Sudnistwo měješe někotre z 5 800 zapodatych skóržbow za woprawnjene. Podawki pak njemějachu žadyn wulki wliw na wuslědk wólbow, kaž rěka.
Wotpokazali su tež žadanje wólbnobojoweho staba Trzaskowskeho, wólby anulować. Opoziciski zwjazk skoržeše w tym zwisku jednostronskeho rozprawnistwa zjawnoprawnych medijow a wužiwanja statnych srědkow na dobro Dudy dla. Sudnistwo měnješe: „Hdyž wolerjo dobrowólnje wěste informaciske žórło wužiwaja, njehodźi so to jako wólbna manipulacija wobhladować.“
Městam srědki šmórnyli
Europska unija reaguje na połoženje jenakosplažnych w Pólskej
Waršawa. Tři tydźenje po prezidentskich wólbach w Pólskej nowinarjo přeco hišće analyzuja, kotra skupina wolerjow je na kóncu snadne wólbne dobyće dotalneho prezidenta Andrzeja Dudy zaručiła a kotra tema wólbneho boja bě za to rozsudna. Při tym so dźeń a bóle wujewja, zo je diskusija wo prawach homoseksualnych Dudźe tute wažne hłosy wunjesła.
Žurnalistka Ewa Wilk je w najnowšim wudaću tydźenika Polityka aktualne połoženje jenakosplažnych w kraju analyzowała. Při tym złožowaše so na ličby centruma Waršawskeje uniwersity, kotryž přepytuje předsudki přećiwo jenakosplažnym a dalšim mjeńšinam. Ličby uniwersity pokazuja, zo so dźesać procentow młodostnych, młódšich hač 25 lět, z hibanjom LGBT – lesbiskich, homoseksualnych, biseksualnych a transgenderow – identifikuje. Po wšej Pólskej hodźi so 4,9 procentow ludźi skupinje LGBT přirjadować. W Němskej su to 7,4 procenty. Na wšě 27 procentow homoseksualnych w Pólskej je mjeztym fyzisku namóc swojeho splažneho wusměrjenja dla na swójskim ćěle nazhoniło.
Hospodarstwo čućiwje spadnje
Praha (ČŽ/K/SN). Ekonomija Čěskeje republiki wuskutkow z wobšěrnych naprawow přećiwo koronakrizy dla lětsa prawdźepodobnje wo 7,5 procentow spadnje, wočakuja eksperća bankow kraja. Najwjetši minus nasta w druhim kwartalu. Zdobom skedźbnjeja fachowcy na to, zo docpěje hospodarstwo kraja niwow lěta 2019 najzašo za dwě lěće. Jeho dalše wuwiće hłownje wot toho wotwisuje, kak skutkowne budu spěchowanske naprawy knježerstwa a kak spěšnje móža dowěru wobydlerjow do čěskeje ekonomije wobnowić.
Móhłrjec „ruku w ruce“ z nahladnym zniženjom wukonliwosće hospodarstwa je so w minjenych měsacach tež ličba bjezdźěłnych podwojiła – z njecyłych třoch procentow na šěsć. Njedźiwajcy toho ma Čěska we wobłuku Europskeje unije dale najnišu kwotu bjezdźěłnosće. Nastupajo dowěru do čěskeje ekonomije jewja so pozitiwne signale. W juniju je dowěra wo 9,5 dypkow na 86,7 dypkow zrostła. Po wudyrjenju pandemije bě wona poněčim wo 20 dypkow na 80 spadła, hdyž bě do toho wot lěta 2014 nimale 100 dypkow wučinjała.
