LUŽICE njerěkaja naši južni susodźa jenož našej domizniskej krajinje. Ně, tak mjenujetej so tež hnydom dwě čěskej wsy, wobě k tomu na Morawje ležacej. Jedna z Lužic, wona wjetša njedaloko Hodo­nína, je swojorazneho podawka dla wu­zběhnjenjahódna. Na woswjećenje dźesateje róčnicy partnerstwa z francoskej komunu Isdes je nimo busa z 30 wjesnjanami skupina horliwcow z kolesom do wsy 150 kilometrow južnje Parisa pućowała – 1 500 kilometrow. Nawjedował je wuprawu dźesaćkrótny swětowy mišter na wysokim kole Josef Zimovčák. Wšitke wudawki su wobdźělnicy jězby ze swojeje kapsy zapłaćili. Pjenjezy, kotrež je cyły rjad sponsorow přinošował, přewostaja załožbje „Na kole dětem“. Tej tohodla, dokelž­ zasadźa so za schorjene dźěći. Naměstna­ wjesnjanostka Jana Ambrožová w tym zwisku rjekny: „Chcemy propagować mysl wzajomneje pomocy, pře­ćelstwa a tolerancy, podpěrać chore dźěći a motiwować zbrašene.“ Partnerstwo mjez morawskej a francoskej gmejnu bě na te wašnje nastało, zo měješe wjesnjanosta Isdesa w Lužicy dobreho znateho. Wobaj staj mjeztym njeboh, partnerstwo wšak traje dale.

Praha (ČŽ/K). Dźakowano tomu, zo so čěske hospodarstwo hižo cyły čas spomóžnje wuwiwa, je tež situacija na dźěłowych wikach dale a lěpša. Tak je kwota bjezdźěłnosće w juniju na 5,2 procentaj spadła a bě tak wo dwě dźesaćinje niša hač w meji. Dźěło pytało je zašły měsac 384 000 ludźi w starobje 14 do 64 lět, štož je najmjenje wot decembra 2008. Na druhej stronje poskićachu dźěłowe zarjady 133 939 swobodnych městnow, při čimž su w prěnim rjedźe kwalifikowani specialisća w metalowej industriji kaž tohorunja w elektronice prašeni. Tole zdźěla Zarjad za dźěło Čěskeje republiki. Po kraju je połoženje chětro rozdźělne. Najlěpje steji Plzeňski wobwod z jeno 3,7 procentami bjezdźěłnosće, sćěhowany wot stolicy Prahi a wobwodow Hradec Králové a Pardubice z 3,8 proc. bjezdźěłnosće kaž tež Juhočěskeho wobwoda z 3,9 proc. Dospołnje negatiwnje wusahuje samotnje Ústíski wobwod na sewjeru republiki, kiž ma 8,3 procenty bjezdźěłnosće registrowane. Trochu nad přerězkom kraja hiba so Karlovarski wobwod z 5,8 procentami, mjeztym zo wostawa Liberecski z 5,3 proc. cyle snadnje pod nim.