Zaručatej dobre lěkarske zastaranje
Dr. Francizka Krawcowa a dr. Jadwiga Wałdźina stej so wědomje za praksu w serbskej wsy rozsudźiłoj
Tuchwilu so dale a wjace lěkarskich praksow předewšěm we wjesnych kónčinach zawěra. Tola w Radworju je dr. med. Monika Liznarjowa naslědnicu našła. Loni w juniju je tam powšitkowna lěkarka dr. med. Francizka Krawcowa praksu takrjec „w nowym šaće“ přewzała. Hižo wot julija 2020 praktikuje tam nimo toho dźěćaca lěkarka dr. med. Jadwiga Wałdźina.
Za medicinu so hižo w dźěćatstwje horiła
Schadźowanje dźěłoweho kruha
Budyšin (SN/AN). Na přeprošenje społnomócnjeneje za serbske naležnosće w Budyskim wokrjesu Haleny Jancyneje, schadźowaše so wčera na krajnoradnym zarjedźe w Budyšinje zamołwity dźěłowy kruh za serbske naležnosće.
Gremij diskutowaše wo strukturje a nutřkownym rjadowanju dźěłoweho kruha. Sobustawojo buchu namołwjeni, informacije wo aktualnym stawje dźěławosće gremija zběrać, kotryž budźe na jednym z přichodneju zetkanjow hłowna tema. Wospjet namjetowachu přitomni čłonojo a čłonki, zo měł so wuběrk wutworić. Dale informowaše Halena Jancyna wo stawje planowanja projekta kolesowarskeje čary „serbske impresije“, kotryž je w zamołwitosći towarstwa Serbskeho kulturneho turizma a kotryž ma Hornju a Delnju Łužicu přez kolesowarsku čaru zwjazać. Tež wo ličbje wuknjacych serbskeje rěče wuradźowachu a lětuše hłowne předewzaća wobzamknychu: wudźěłać konkretne naprawy, kiž dopomhaja dalewuwiću a spěchowanju serbskeje rěče we wokrjesu.
„Mudre hłójčki“ do regiona wabić
Wědomosć a hospodarstwo we Łužicy hišće bóle hromadźe dźěłatej. Wo tym swědči wčera w Choćebuzu podpisane kooperaciske zrěčenje mjez uniwersitu a wažnym předewzaćom Němskeje.
Choćebuz (SN/BŠe). Němska železnica (DB) a Braniborska techniska uniwersita (BTU) Choćebuz-Zły Komorow stej wčera ramikowe kooperaciske zrěčenje wo intensiwnym zhromadnym dźěle za sylne železniske a kubłanske stejnišćo Choćebuz podpisałoj. Partneraj chcetej so we wobłukach studij, wučba a slědźenje na BTU kaž tež nastupajo temje perspektiwy za přistajenje a přihot na powołanje studowacych hišće sylnišo splesć a zhromadnje jednać.
Z kooperaciju chce BTU přidatnych studowacych do Choćebuza wabić, wosebje w tak mjenowanych MINT-předmjetach (matematika, inženjerske a přirodowědne kaž tež technika). DB budźe studowacym powołanske perspektiwy w železniskej branši a nowej tworni ICE w měsće wotbłyšćować a móžnosće za dalše powołanske móžnosće pokazować.
Nowa domizna wučomnikam
Nic jenož sezonalny zjaw
Kamjenica/Budyšin (SN/MiP). „W Sakskej su ličby bjezdźěłnosće w nowym lěće jasnje stupali“, to wozjewi šef regionalneje direkcije dźěłoweje agentury Klaus-Peter Hansen w nowinskej zdźělence, srjedu w Kamjenicy. W januarje bě w Sakskej 141 200 ludźi bjezdźěłnych registrowanych, nimale 7 procentow wjace hač loni w decembrje. Z tym je kwota bjezdźěłnosće w přirunanju z předměsacom wo poł procenta na 6,7 procentow stupiła.
W Budyskim wokrjesu je ličba bjezdźěłnych porno zašłemu měsacej wo 7,2 procentaj stupała. Corina Franke, zjawnostna rěčnica dźěłoweje agentury w Budyšinje, zdźěli na naprašowanje SN, zo je so ličba dźěłowych poskitkow we wokrjesu w tutym měsacu wo 193 znižiła. „To nima jenož sezonalne přičiny, ale zwisuje tež z hospodarskej situaciju. Předewzaćeljo su tuchwilu jara skedźbni, hladajo na nowe přistajenja“. Najebać to je we wokrjesu wjele dźěłowych městnow wakantnych, to pak su k 87 procentam městna za fachowcow. „Kóždy druhi z našich za dźěłom pytacych pak pyta městno za pomocnikow“ praji Corina Franke.
Łužiski lěwanćik, čorny kobołk a kórkacy gin
Dohromady 275 000 wopytowarjow je lětuši mjezynarodny Zeleny tydźeń do Berlina přiwabił. To je 25 000 mjenje hač loni. Předewšěm stawk lokomotiwnikow dźěłarnistwa GDL je po měnjenju zarjadowarja hłowna přičina za to. Najebać to běše facit šefa Berlinskich wikow, Maria Tobiasa, njedźelu po zakónčenju zarjadowanja, pozitiwny.
W přerězku je kóždy wopytowar lětsa 150 eurow wjace hač na lońšich wikach wudał. Zajim medijow a wosebje tež politikarjow, běše na lětušim 88. mjezynarodnym Zelenym tydźenju jara wulki. Hladajo na trajace protesty burow w Němskej njezadźiwa, zo je kancler Olaf Scholz (SPD) a wosom dalšich ministrow knježerstwa wiki wopytało a rozmołwu z ratarjemi pytało. Zwjazkowy ratarski minister Cem Özdemir (Zeleni) je nimale kóždy dźeń na wustajenišću swojeho ministerstwa był a z ludźimi wo přichodźe ratarstwa a produkciji žiwidłow diskutował.
Pjaty dźeń Zeleneho tydźenja
Stawki za nowe zrěčenje
Budyšin/Drježdźany (SN). Dźěłarnistwo Verdi je na wuchodźe Němskeje k stawkowanju namołwjało. Sobudźěłaćerjo zjawneho bliskowobchada nimaja pjatk dźěło nastupić. Kaž dźěłarnistwo póndźelu zdźěli, ma stawk cyły pjatk trać. W Sakskej potrjechene su wobchadne zwjazki w Drježdźanach, Kamjenicy, Lipsku a Pławnom. W Budyskim a Zhorjelskim wokrjesu stawk njewočakuja.
Pozadk stawka su jednanja wo nowej mzdźe za sobudźěłaćerjow zjawneho bliskowobchada. W Sakskej jednaja wo nowym mantlowym tarifowym zrěčenju. Tute ma wosebje dźěłowe wobstejnosće rjadować. Verdi žada sebi mjez druhim wjac dowola a zawjedźenje přiražkow za dźěło kónc tydźenja a za nadhodźiny. Kaž praji hłowny jednaćel stawkow w Sakskej, Paul Schmidt, „wotpokazuja dźěłodawarjo žadanja wyšeje mzdy dla. Tute pak běchu trěbne. Wyša mzda pak ničo na tym njezměni, zo trjebaja přistajeni skónčnje wolóženja.“ Nowe mantlowe zrěčenje ma 24 měsacow płaćić. Tež w Durinskej a Saksko-Anhaltskej paralelnje wo nowych mzdach jednaja.
Do něhdyšich jamow inwestuja miliardy eurow
Wojerecy (AK/SN). Łužiska a srjedźoněmska towaršnosć hórnistwoweho zarjadnistwa (LMBV) chce přichodne lěta cyłkownje 19 pohórnistwowych nasypnišćow ponowić. Za to chce towaršnosć něhdźe tři miliardow eurow inwestować, cyłkownje 1,177 miliardy eurow w Sakskej a 1,867 miliardow eurow w Braniborskej. Jeničce w Sakskej je předwidźane hač do kónca 2030ych lět wosom wobšěrnych naprawow zwoprawdźić. „Chcemy zastupjerjow wokrjesow, gmejnow a wobydlerstwo sobu zapřijeć“, rozłoži nawoda wobłuka za saněrowanje Łužicy Gerd Richter na wčerawšim posedźenju zaměroweho zwjazka Łužiska jězorina Sakska we Wojerecach. Proces dyrbi za wšitkich transparentny być. „Loni rěčachmy z krajemi wo financowanju. Wo tym hižo na posedźenju zaměroweho zwjazka Łužiska jězorina Braniborska a braniborskim brunicowym wuběrku rozprawjach. Dalše terminy nětko w Sakskej sćěhuja.“
Ze słowjanskeho hrodźišća w Radušu móhła Łužica swěćić
Załožba Slavonic Europe swoju wiziju we Wětošowje předstajiła
Puć do słowjanskeho hrodźišća blisko Raduša na tejle januarskej póndźeli powabny njeje. Sně taje. Woda a zbytki lodu na puću skutkuja kaž přirodny zadźěwk. Kedźbliwje dyrbiš kročić, zo so njewobsunješ a swój zaměr wěsće docpěješ. W pozadku šumi wobchad na awtodróze A 15. Maja šoferojo w připołdnišej hodźinje scyła wid na to, štož nalěwo a naprawo magistrale leži?
Poprawom su muzeje skoro po wšej Němskej póndźelu zawrjene. A nimo toho je zyma. Za pomnik starych Słowjanow to njepřitrjechi. Byrnjež nutřkowny areal přemokany był, terasa bistra wězo wopušćena, witaja hosći hišće hač do měrca wšědnje nimo pjatka wot 10 do 16 hodź. do muzeja. Hač do naju rozmołwy njeje sej tam nichtó zastupny lisćik kupił, powěda angažowana sobudźěłaćerka, kotraž swoje mjeno w nowinje čitać nochce. Dnjej do toho bě to cyle hinak. Suche słónčne zymske wjedro bě ludźi prosće k tomu přeprosyło, sej kónc tydźenja do słowjanskeho hrodźišća wulećeć.
Mjenje běrokratije na dobro regionalnych producentow
Berlin (SN/MiP). Hladajo na nadal so wotměwace protesty burow w Němskej du politikarjo do dialoga z nimi – tež na 88. mjezynarodnym zelenym tydźenju w Berlinje. Zhromadnje ze zwjazkowym ministrom za ratarstwo Cemom Özdemirom (Zeleni) wopyta kancler Olaf Scholz (SPD) wčera wšelake wustajenišća, mjez druhim wjacore ekologiske zawody. W rozmołwje z ratarjemi wuzběhny wón, „zo chce knježerstwo jich z wottwarom běrokratije na zwjazkowej kaž tež europskej runinje pragmatisce podpěrować.“
