Rjadowni 1. lětnika Worklečanskeje zakładneje šule pobyštej wčera w Hornim Hajnku. Tam woswjećichu šulerjo we wobłuku projektneho tydźenja, w kotrymž so z Jurjom Brězanom zaběraja, swój pismikowy swjedźeń. Po zhromadnej snědani stejachu staflowe běhi na programje, prjedy hač wobhladachu sej dom Jurja Brězana. Foto: Jurij Bjeńš

Po wosom lětach wučerka serbšćiny na Slepjanskej šuli rozžohnowana

Slepo (JoS/SN). Kaž na wšitkich wyšich a srjedźnych šulach Sakskeje su minjeny kónc tydźenja tež na Slepjanskej Wyšej šuli „Dr. Marja Grólmusec“ lětušich wotchadnikow rozžohnowali. K wobstatym pruwowanjam gratulowaše jim nawoda Wolfgang Goldstein a dźakowaše so wšitkim, kotřiž běchu k wuspěšnemu wukóncej šulskeho lěta přinošowali. Wo­sebje přiwobroći so swojej koleginje Sabinje Jurencec. Po wosom lětach skutko­wanja wona nětko Slepjansku šulu wopušći a započnje w nowym šulskim lěće na Radworskej wyšej šuli skutkować.

Sabina Jurencec je po abiturje na Serbskim gymnaziju Budyšin w Lipsku wučerstwo za serbšćinu a rušćinu studowała. Po referendariaće na Budyskej Serbskej wyšej šuli nastupi wona spočatk šulskeho lěta 2010/2011 swoje dźěło na Slepjanskim kubłanišću. Z Pančic-Kukowa jězdźeše wšědnje něhdźe 130 kilometrow do Slepoho a wróćo. Byrnjež minjene tydźenje hižo w Radworju skutkowała, je wona „swoju 10b“ jako rjadowniska wučerka k zakónčenju wjedła.

47 maturantow Budyskeho Serbskeho gymnazija (SGB) je sobotu w Chróšćanskej „Jednoće“ swoje wuswědčenje z rukow­ direktora kubłanišća Renéja Wjacławka přijało.

Chrósćicy (SN/JaW). Swjedźenski rěčnik Michał Cyž namołwješe wotchadnikow, čas njebrojić, ale jón zmysłapołnje wužiwać. „Štož móžeće, čińće hnydom! Nješkodźi ničo, tež raz něšto wobžarować. Podać so pak njeje žana opcija“, wón jim přiwoła, a doda, zo njeńdźe z nadźiju samej, něšto zwoprawdźić.

Dźesać ze 47 wotchadnikow Budyskeho Serbskeho gymnazija chce wučerstwo studować a ma dojednanje z Krajnym zarjadom za šulu a kubłanje (LaSuB) w zaku. Mam to za spomóžne prócowanje Serbskeho šulskeho towarstwa a LaSuB, wotchadnikow za powołanje wučerja zdobyć. W Budyšinje je to hižo z tradiciju, a ta je z přikładom. Kaž zdźěli sobudźěłaćer zarjada Bosćij Handrik, chcedźa to po wšej Sakskej praktikować. Předsydka SŠT Ludmila Budarjowa skedźbni hišće raz na noworjadowanje w přizwolenju za studij wučerstwa. Serbskorěčni zajimcy maja lěpšinu a dóstanu abi-přerězk wo znamku polěpšeny. To zbudźa na jednym boku diskusije wo tym, hač je to prawy puć, wjac wučerjow dóstać. Na tamnym boku měli tež rozmyslować, hač je numerus clausus za studij wučerstwa trěbny, hdyž telko pedagogow pobrachuje. Wšako móže so tež maturant ze špatnišim přerězkom z wuběrnym wučerjom stać. Janek Wowčer