Wjac hač 250 ludźi přichwata zańdźeny pjatk do hodownje wupyšeneje hale Serbskeje wyšeje a zakładneje šule w Ralbicach. Kubłanišći běštej na koncert „Adwent – čas měra a pokoja“ přeprosyłoj.
W nimale połdra hodźiny trajacym programje pokazachu jednotliwcy, rjadowniske a cyłošulske cyłki hosćom tójšto rjanych wjerškow. Tak předstaji mjez druhim 4. lětnik stawiznu wo hólcu, kiž njeměješe hišće hodowny dar za staršeju. Wón poda so do města, zo by so za tajkim rozhladował, nažel bjez wuspěcha. Naposledk pak zetka hišće staršeju, kotrajž jemu wujasništaj, zo je samospasleny dar najrjeńši dar k hodam. Reju sněženkow bě rejwanska skupina zakładneje šule pod nawodom Aleksandry Wagner nazwučowała.
Worklečanska ćěłozwučowarnja bě pjatk wječor kopata połna. Přičina toho pak njebě domjaca hra Viktorije Worklecy w blidotenisu abo wolejbulu. Bě to adwentny program dźěći Serbskeje zakładneje šule „Michał Hórnik“, kotryž běchu wone hłownje w poslednim nowemberskim tydźenju nazwučowali. To wěnowachu so w projektnym tydźenju hodownemu časej.
Gołkojcy (SN/MiR). W Gołkojskej gmejnje, před wrotami Choćebuza, ma nastać nowa cyłotna šula z gymnazialnym wyšim schodźenkom. Hłowny zaměr je, šulerjam a šulerkam na wsach w zapadnym dźělu wokrjesa zmóžnić maturować bjez toho, zo dyrbjeli dołhe puće do šule jězdźić. Z wida nawjazanja na zjawne wobchadne srědki a hladajo na dalše trěbne wuměnjenja za wopyt tajkeho kubłanišća so Gołkojcy wosebje hodźa, wuzběhny krajny rada wokrjesa Sprjewja-Nysa Harald Altkrüger (CDU) njedawno w dźěłowej skupinje zakładne šule kubłanskeho wuběrka wokrjesneho sejmika kaž tež w jeho wokrjesnym wuběrku. Z widom na krajne knježerstwo Altkrüger potwjerdźi: „Chcu tule ministerskeho prezidenta a jeho njedawne wuprajenje, wjesny rum sylnić chcyć, jara chutnje brać. Wón dźě z tym mysle wokrjesa podpěruje. Wuprajam so wosebje za tute zesylnjenje. Wšako je to naš nadawk. A za to smy jako wokrjesni radźićeljo a ja jako krajny rada nastupili.“
W zelenišćach, wobdawace Fachowu šulu za socialnu pedagogiku w Budyšinje, su wčera při lětsa sadźenej lipje připrawili tafličku ze serbskim a němskim napisom.
Budyšin (CS/SN). Mjeztym ma lipa tež swójske mjeno. Wona rěka „Lipa serbskeje fachoweje šule“ (Fachschul-Linde). Bernd Nickel a fachowa nawodnica kubłanišća za socialne Elke Jäckel staj tafličku při zdónku štoma přičiniłoj. Na česć štoma připichu sej wučerjo ze škleńčku sekta. Nakup a wuhotowanje taflički bě jenož z podpěru sponsorow móžne. Kaž Elke Jäckel rjekny, njesymbolizuje lipa jenož serbskosć na kubłanišću, ale tež kajkosće, kotrež měł kubłar abo kubłarka měć. Přetož štom a tež kubłarjo měli měć korjenje, dyrbja sylne być a druhich škitać. Štom sadźiło bě předewzaće, kotrež bě so tež wo wuhotowanje cyłeje wonkowneje přestrjenje Powołanskošulskeho centruma starało. Mjeztym lipa tam hižo poł lěta steji a so derje wuwiła.
Drježdźany (SN/MiR). Sakska chce kwalitu cyłodnjowskich poskitkow na šulach rozšěrić. Za to ma so spěchowanje dale optiměrować. We wuskim zhromadnym dźěle z Techniskej uniwersitu Drježdźany su w sakskim ministerstwje za kultus zdźěłali kwalitnu předłohu ze specifiskimi indikatorami a kriterijemi, kotrež hodźa so přepruwować k wuwiću dobrych cyłodnjowskich poskitkow. Naćisk tuchwilu w ramiku modeloweho pospyta z 20 šulemi posudźuja.
Po nowym šulskim zakonju maja cyłodnjowske poskitki wot 1. awgusta 2018 za powšitkownokubłace šule zasadnje winowatostne być, při čimž je Sakska za sobufinancowanje. Hižo nětko poskićeja mjez 1 300 šulemi w swobodnym staće nimale wšitke powšitkownokubłace šule tajke poskitki. Jako dobre je so wopokazało, zo kubłanišća wašnje a wobsah swojich cyłodnjowskich poskitkow samostatnje a z partnerami na městnje, kaž ze zwjazkami, kulturnymi, sportowymi a młodźinskimi towarstwami po potrjebje a šulerjam wotpowědnje zwoprawdźeja.