Zhromadne wuknjenje wažne
Serbska wyša šula „Dr. Marja Grólmusec“ Radwor je wotewrjena za wšěch
To prěnje, štož wopytowarjej Radworskeje wyšeje šule „Dr. Marja Grólmusec“ napadnje, hdyž po nowotwarje domskeho dźe, su durje do rjadowniskich stwow. Wone zmóžnjeja ći dohlad do rumnosćow. Delnja połojca duri ze škleńcy je zamlóčena, horni dźěl je jasny, přewidny. Tak zetkawatej so woči hosća z tymi wučerja a šulerjow. Na prěni pohlad to zamyla. Jako wopytowar so samo trochu stróžiš, hdyž takrjec njejapcy nimale w rjadowni stejiš. Wšako nochce nichtó mylić, hdyž nimo stwow dźe. „Wězo, šulerjo a wučerjo widźa, zo něchtó nimo dźe, ale mylić so njedadźa. Su so spěšnje na nowosć zwučili“, měni šulska nawodnica Hilža Štilerowa.
Tuchwilu dosć wučerjow
Informatiwny poskitk za jubilej
Aktualne wudaće magacina „Lutki“ steji pod hesłom „20 lět Witaj w praksy“. Jedna tema je přednošk Petry Bačcyneje, nawodnicy dźěćaceho dnjoweho přebywanišća w Pančicach-Kukowje, kotrež je w nošerstwje Křesćansko-socialneho kubłanskeho skutka Miłoćicy.
Budyšin (SN/MiR). Petra Bačcyna wěnowaše so na dalekubłanskim zarjadowanju RCW w Budyskim Serbskim domje temje „Stopnjowanje rěčnopedagogiskeje kwality nastupajo kubłanje dźěći w serbšćinje“. Na jubilej zawjedźenja koncepta Witaj w praksy dopominaja w najnowšej brošurce tež wjacore fota. Swjedźenske dalekubłanje w Budyskim Serbskim domje za kubłarki a kubłarjow, skutkowacych pola wšelakich nošerjow, bě mjez druhim witany informatiwny poskitk.
Dalše ćežišćo su online-poskitki za nawuknjenje serbšćiny. Skrótka a jadriwje rozłožuja w zešiwku wuknjenski portal „sorbischlernen.de“ a „Onlineserbscewuknyć“, dale postupowanje při złoženju rěčneho certifikata za hornjo- a delnjoserbšćinu kaž tež wuznam digitalneho słownika Soblex. Za powabliwe maja aplikaciji „Serbsce lochko“ a „Serbsce w sto sekundach“.
Kubłanski srědk
Tójšto změnow na šulach
Ideje kultusa zwoprawdźeja na wšitkich družinach kubłanišćow
Drježdźany (SN/MiR). Sakske ministerstwo za kultus je w nowym šulskim lěće na zakładnych kubłanišćach nowy šulski porjad zawjedło. Z nim chcedźa indiwidualne spěchowanje šulerjow sylnić a fleksibelnišo wuhotować. Za kóžde dźěćo chcedźa tuž wuwićowy staw zwěsćić a z toho pedagogiske naprawy wotwodźeć. Nowy porjad zmóžnja prewentiwne naprawy kaž tež spěchowanje wosebje nadarjenych šulerjow.
Płody jim „do huby rostu“
Zahroda Radworskeje serbskeje wyšeje šule je woprawdźita zelena oaza
Radworska wyša šula „Dr. Marja Grólmusec“ ma wosebje powabliwu šulsku zahrodu. Tam so wot zažneho nalěća wšitko zeleni, a hač do nazymy žněja šulerjo z wulkej radosću to, štož je pod jich wušiknymi rukami narostło a zrawiło.
Zelena oaza njeje něhdźe na kromje terena kubłanišća, ale je wosrjedź šulskeho twarjenja zaměstnjena. W Radworju njejsu sej městnosć dźěći zakładneje šule jako šulsku zahrodku wotkryli, zaběrace so z temu we wobłuku wěcneje wučby. Ně, su to dźewjatkarjo a dźesatkarjo, kotřiž so wo zahrodku staraja. Ći młódši z nich sad a zeleninu sadźeja a plahuja. A ći starši z wotchadneho 10. lětnika smědźa sej tam wšědnje přestawki popřeć. Dobra duša projekta je Monika Naglowa, wučerka matematiki a geografije. „Zajimuju so za zahrodu a posrědkuju šulerjam rady dobry poměr k přirodźe“, wona měni. W lěće 2012 bě so wšitko započało. Tehdyši „wulcy“ běchu so na 48hodźinskej akciji wobdźělili a sej teren wosrjedź kubłanišća wotkryli. Pomhał je jim při tym Radworčan Ludwig Sachsa, kiž ma takrjec „zeleny palc“.
Wróći so bliže k ródnej wsy
Sabina Jurencec je wosom lět z wulkim angažementom na Wyšej šuli „Dr. Marja Grólmusec“ Slepo wuwučowała. Wot noweho šulskeho lěta skutkuje wona nětko na wyšej šuli samsneho mjena w Radworju, bliže k swojej ródnej wsy Pančicam-Kukowej.
Slepo (AK/SN). „Wuwučować bjez wjesela? Wučba bjez smjeća? To njemóžu sej předstajić“, měni Sabina Jurencec z Pančic-Kukowa. „Jeli so w šulskej hodźinje ze šulerjemi njesměju, da něšto njetrjechi.“ Sprawna, direktna a konsekwentna chce wona jako wučerka być – awtentiska a runje tajka kaž hewak tež.
Z hobbyja chce powołanje sčinić
Wučerstwo je Ralbičanej Bosćijej Bejmje wěc wutroby. Wón studuje předmjetaj sport a geografija w Halle. Njedawno přebywaše wospjet jako kubłar w rěčnym lěhwje Serbskeho šulskeho towarstwa we Wodowych Hendrichecach. „To je dobra składnosć, so w praksy wupruwować. W běhu studija dźě mamy złožić praktikum na polu zwonkašulskeho dźěła.“ Lětuša wobsadka lěhwa je so Bosćijej Bejmje wospjet jara spodobała. Za połdra lěta, tak so nadźija, budźe wón referendar. Za wučerstwo na gymnaziju je so wědomje rozsudźił. „Ze staršimi šulerjemi móžeš hižo směški a tryski činić, woni to rozumja. Njetrjebaš jim telko rozjasnić, dokelž sej sami wšelake wobsahi wotkrywaja.“ Po studiju by rady w abo blisko domizny skutkował.
Wočerstwjace dny srjedźišća LIPA
Smjerdźaca (aha/SN). Třeći raz mjeztym je Smjerdźečanske kubłanske srjedźišćo LIPA w lěćnych prózdninach za dźěći wočerstwjace sportowe dny přewjedło. Hižo znatej terminaj stej stajnje do prěnjeho kaž tež do poslednjeho tydźenja prózdnin zapołoženej. Mjeztym zo běchu so spočatk julija pjatnaćo wobdźělili, je jich tele dny 27 dźěći. Přewšo dobreho wothłosa dla njemóžachu hišće wjace přizjewjenjow přijimać.
Swójski nahlad wótřić
Za studij na BTU so online zapisać
Choćebuz (SN). Wšitcy, kotřiž hišće žane studijne městno nimaja abo su so hakle minjene tydźenje za studij rozsudźili, njech so w bursy studijnych městnow konferency wysokošulskich rektorow wobhonja.
Na Braniborskej techniskej uniwersiće Choćebuz-Zły Komorow (BTU) je nimo bachelorskeho a masterskeho studija socialne dźěło wšitkich 70 na dźěłowe wiki orientowanych a klasiskich studijow bjez přizwolenja. Z online-požadanjom móža so zajimcy z mało klikami z myšku za nazymski semester 2018/2019 zapisać. Doba požadanja za masterski studij skónči so 31. awgusta, za bachelorski 30. septembra, kaž BTU informuje.
BTU skići po cyłym Zwjazku jónkrótnu paletu uniwersitnych, fachowowysokošulskich, dualnych a mjezynarodnych studijow. Nowy je uniwersitny bachelorski a masterski studij chemija materialow. Njerozsudźenym zajimcam poruča BTU jednolětny orientowacy studij, za kotryž je podpěra z Bafög móžna. Partnerstwo z Techniskej uniwersitu Berlin zaruča we wobłuku orientowaceho studija, z tymle kubłanišćom so zeznajomić.
