Wučba delnjoserbšćiny w Braniborskej trjeba wjetše hódnoćenje a připóznaće. Nimo toho měli wo zachowanje a po­srědkowanje delnjoserbskeje rěče angažowacy so wjace podpěry dóstać.

Choćebuz (SN/JaW). Tole mjenowaše kubłanskopolitiska rěčnica frakcije Lěwicy w Krajnym sejmje Braniborskeje Kathrin Dannenberg jako facit wopyta dźěłoweho kruha kubłanje frakcije wčera we wjacorych delnjoserbskich kubłanskich zarjadnišćach. Mjez druhim pobychu čłonki kruha na Žylowskej zakładnej šuli, wopytachu dźěłanišćo ABC a delnjoserbsku wotnožku Rěčneho centruma WITAJ.

Dźěłowe rozmołwy hódnoćachu čłonki dźěłoweho kruha jako płódne a spomóžne. Napadnyło pak jim je, zo zamołwići na kubłanišćach přemało za wučbu delnjoserbšćiny wabja. Ale runje to je jara­ wažne. „Njewě-li nichtó, zo wosebity film w kinje běži, sej jón nichtó njewobhlada“, rjekny k tomu Birgit Kaufhold, kandidatka za nowy zwjazkowy sejm. Kathrin Dannenberg nimo toho zwěsći, zo je nuznje trjeba wučbu delnjoserb­šćiny tež na wyšich šulach zakótwić.

Wo serbskich a Serbow nastupacych temach diskutować je hesło zarjadowanja w Choćebuskim Serbskim internaće. Rěčny centrum WITAJ a Domowina debatu nětko wozrodźitej.

Choćebuz (SN/MiR). Nawoda Choćebuskeho Rěčneho centruma WITAJ dr. Viktor Zakar chce nawjazać na skutkowanje swojeho předchadnika Měta Nowaka. Tón bě swój čas zawjedł diskusijne wječorki na palace temy wo serbskej rěči. Z jeho wotchadom so tele debaty pominychu. Nětko chce RCW w kooperaciji z Domowinu, kotraž sej wobstajne dalewjedźenje rěčneje debaty přeje, wuspěšne zarjadowanje wozrodźić. „Mějachmy wjacore naprašowanja wučerjow a staršich kaž tež ludźi, kotřiž na politiskej runinje skutkuja. To bě nam dopokaz, zo wobsteji zajim za tajke temy, a je přičiny dosć, so znowa na přednoški a do diskusije podać“, dr. Zakar rozłožuje.