Běły Chołmc (AK/SN). Hižo wot junija je Běły Chołmc wo zajimawy blečk bohatši. K swjedźenjej składnostnje 90lětneho wobstaća dobrowólneje wohnjoweje wobory běchu restawrowany pokutny křiž ze zornowca njedaloko wjesneho hata znowa postajili. „Za to so wšitkim na projekće wobdźělenym wutrobnje dźakuju“, pisaše wjesny předstejićer Thomas Rösler w zjawnym wuwěšku.
„Na starym městnje při wjesnym puću bě křiž dospołnje zarosćeny. Štóž jón njeznaješe, je jón lědma spóznał“, praji Běłochołmčan Wolfgang Tietze, kiž je nawoda twarskeho zarjada Łazowskeje gmejny. Podstawk bě za čas NDR přełamany. Zawod z wokoliny je wobaj dźělej spočatk 1970tych lět ze železnej manšetu zwjazał. Lětsa je Wojerowski Israelec zawod za narowne pomniki křiž restawrował. Dalše firmy pomhachu jón do Běłeho Chołmca dowjezć a postajić. Twarski zawod Łazowskeje gmejny je teren přihotował a wokoło křiža plestrował. „Saněrowanje płaćeše dohromady tysac eurow. Zwoprawdźić móžachmy to dźakowano pomocy zawodow“, so Wolfgang Tietze wjeseli. „Na te wašnje zachowamy přichodnym generacijam stawizniski swědk.“
Budyšin (SN/at). Runja Budyskemu wokrjesnemu předsydstwu strony Lěwicy podpěruje tež jeje frakcija w Budyskim wokrjesnym sejmiku wólby Serbskeho sejma. Wo tym informowaštaj minjeny pjatk frakciski předsyda Ralph Büchner a serbopolitiski rěčnik Hajko Kozel. Iniciatiwnikaj dr. Měrćin Wałda a dr. Měrćin Krawc běštaj dźeń do toho wokrjesnym radźićelam Lěwicy prěnje wólby serbskeho parlamenta rozłožiłoj. Po jeju rozkładowanjach a slědowacej přewšo wotewrjenej diskusiji su so komunalni politikarjo Lěwicy jednohłósnje za podpěru wólbow rozsudźili.
Zo je so frakcija nětko z wólbami Serbskeho sejma zaběrała, měješe swoju přičinu w junijskim posedźenju wokrjesneho sejmika. Tam bě wjetšina radźićelow próstwu iniciatiwneje skupiny, wólby mjeńšinoweho parlamenta předstajić směć, wotpokazała. Budyski krajny rada Michael Harig (CDU) bě sejmikej rozsud přenjesł, wšako nochcyše to sam činić. Frakciji Lěwicy a SPD/Zelenych stej so hižo w juniju za tajke předstajenje wuprajiłoj. Kaž bě z kruhow frakcije SPD/Zelenych zhonić, je tež tu termin dojednany.
Wustajeńca přećahnyła
Smochćicy. Wustajeńca „Heimat – Domizna. Katolscy Serbja w Hornjej Łužicy 1992–2017“ je nětko w Smochčanskim Domje biskopa Bena přistupna. Přehladka z wobrazami Andreasa Varnhorna, kiž bě wobydlerjow a wjesne žiwjenje krótko po přewróće portretował a někotrych protagonistow 25 lět po tym znowa fotografował, bě dotal w Budyskej Serbskej kulturnej informaciji widźeć.
Nazymske chórowe spěwanje
Budyšin. Cyłkownje pjeć chórow a instrumentalisća su sobotu 24. nazymske chórowe spěwanje wuhotowali. Při měšćanskim nasypje, w awli Schilleroweho gymnazija a w tachantskej cyrkwi, kotraž bě z hudźbnym nyšporom prěni raz hrajnišćo zarjadowanja, wustupichu mjez druhim chór Budyšin, tudyši Schubertowy chór a wokalny ansambl swj. Pětra.
Počesća čestnohamtskosć
Paduši w kupjeli
Kulow. Wospjet su so paduši do Kulowskeje kupjele zadobyli. Kaž dyrbjachu tam zawčerawšim zwěsćić, běchu njeznaći z kioska žiwidła a napoje w hódnoće 400 eurow pokradnyli. Nimo toho načinichu 500 eurow wěcneje škody.
Pančicy-Kukow (mbr/SN). Wćipne dźěći pěstowarnje w Pančicach-Kukowje, kotrejež nošer je Křesćansko-socialny kubłanski skutk (CSB), su minjene dny wobkedźbowali, što so na jich zahrodźe stawa. Tam nastajichu šef zahrodotwarskeje firmy „Gartenart“ Měrćin Kral a jeho sobudźěłaćerjo na hrajkanišću někotre nowe drjewjane nastroje, po kotrychž móža dźěći krosnować a balansować.
Zawčerawšim móžachu hrajkanišćo pěstowarnje swojemu zaměrej přepodać. Po zhromadnym spěwje su zamołwity za kubłanišća pola CSB Rony Škoda kaž tež Měrćin Kral a nawodnica pěstowarnje Petra Bačcyna banćik přetřihali. Dźěći na to hnydom nowe móžnosće wupruwowachu. Wosebje rězbarjeny krokodil jim wulke wjeselo wobradźa.
Zastupiš-li w Budyšinje do internata Serbskeho gymnazija, zetkaš tam přećelnu a wjesołu žonu połnu elana – Weroniku Bulankowu. Z lubosću stara so wona wo šulerjow, kotřiž chwala sej ju jako swoju „zastupnu mać“, hdyž njemóža wotydźenja domoj jězdźić. Mjeztym hižo 25 lět Weronika Bulankowa z internatnikami spěwa, pasli, moluje a za jich domjacymi nadawkami hlada.
Weronika narodźi so jako třeće dźěćo do Wajdlichec swójby w Kukowje, a hakle w pěstowarni nawukny němsce rěčeć. Wosebje horda je na swoju mać, kotruž bě w starobje hladała. Herta Wajdlichowa chodźeše hač do kónca žiwjenja w serbskej narodnej drasće. Jana Wajdlicha wšak wšitcy na serbskich wsach znajachu. Ze swojej młóćawu bě wón w lěću po puću, zo by małoratarjam žito wumłóćił. Nažel jeho Weronika z wosom lětami hižo zhubi. Maćeri wona po šuli pomhaše, warješe wobjed a w klóštrje ćelata sobu picowaše. Wuchodźiwši šulu chcyše so rady z wučerku stać, štož pak móžno njebě. Tak studowaše na fachowej šuli w Drježdźanach pedagogiku a sta so z kubłarku w žłobiku.
Njeswačidło (JK/SN). Dokelž bě Njeswačanski wjesnjanosta Gerd Schuster (CDU) po wulkim wjeršku wjesneho jubileja, kiž bě sej tež wot njeho wjele mocow žadał, w zasłuženym dowolu, je jeho zastupjer Norbert Braun (Rjemjesło a přemysło) zašłe posedźenje tamnišeje gmejnskeje rady nawjedował.