Róžant. Wutworić přidatne žłobikowe městna w Smjerdźacej budźe jedna z temow přichodneho posedźenja gmejnskeje rady Ralbicy-Róžant jutře, štwórtk, we 18.30 hodź. w Róžeńčanskej sydarni. Nimo toho budźe rěč wo nowym hašenskim jězdźidle za Konječansko-Šunowsku wohnjowu woboru a wo kreditowym zrěčenju.

Wotrow. Tohorunja jutře, ale w 19 hodź. zetkaja so čłonojo gmejnskeje rady Pančicy-Kukow, tónraz na Wotrowskej starej šuli. Na jich dnjowym porjedźe steji mjez druhim třeći wotrězk ponowjenja Šule Ćišinskeho. Dale chcedźa wobzam­knyć, postawu swj. Bosćana w Swinjarni restawrować dać. Wobě posedźeni stej zjawnej, a wobydlerjo su přeprošeni.

Na slědach ptačkow

Rakecy. Přirodowědnu ekskursiju na slědach ćahatych ptačkow podłu hatow pola­ Kačeje Korčmy blisko Rakec přewjedźe Kamjenski Muzej zapadneje Łužicy njedźelu, 21. oktobra, wot 8 do 11 hodź. Wobdźělnicy wobkedźbuja tam sta kačkow a husow, kotrež na swojim nazymskim ćahanju přestawku zapołoža. Wobdźělenje płaći pjeć eurow. Při přizjewjenju pod telefonowym čisłom 0 35 78/ 7 88 30 zajimcy zhonja, hdźe so ekskur­sija započnje.

Rěčicy (FAG/SN). Sta ludźi su minjenu njedźelu Rěčičanski Erlichtec dwór wo­pytali. Přiwabili njejsu jich jeno słónčne wjedro a kładźite domy, ale předewšěm nazymske zahrodowe wiki. Nimale tři­ceći sakskich wikowarjow je tam swoje twory poskićało. Jich paleta sahaše wot najwšelakorišich rostlin přez nazymsku pychu za domjacnosć hač k tójšto družinam jabłukow.

Prěni raz pódla bě Bärbel Wendler z Wósporskeje štomownje ze swojim sado­wym stejnišćom. Tam dyrbjachu kupcy mjez nimale 90 družinami jabłukow, krušwow a kwitow rozsudźić. Wězo sy je najprjedy woptać móhł, tak zo nje­trjebaše nichtó kóčku w měše kupić. Nimo­ toho móžachu ludźo swójske družiny jabłukow postajić dać. Zo bě Wendlerec stejnišćo stajnje derje wopytane, zale­žeše sobu na tym, zo móžachu wopytowarjo hnydom w susodstwje alpakaj z Kinsporskeje hole wobdźiwać. Jörg Fie­dler je so z nimaj hižo wosmy raz na nazymskich wikach wobdźělił.

Budyšin (SN). Po lětnjej přestawce zahaja w Budyšinje spočatk přichodneho mě­saca 14. raz woblubowany slěd přednoškow „Budyska akademija“. Wot nowembra 2018 hač do apryla 2019 poskići město­ Budyšin kóždu prěnju póndźelu měsaca we 18 hodź. w čitarni statneje studijneje akademije na Lubijskej přednoški k jara wotměnjawym temam. Jich wuběr złožuje so zdźěla na přeća ze zašłeho semestra, rěka w nowinskej zdźělence Budyskeho měšćanskeho zarjadnistwa. Něhdźe 70 do 100 „studentow“ poskitk wobstajnje wužiwa. Woni smědźa so tež w 14. semestrje na informatiwne a napjate přednoški wjeselić.