Pomoc Korzymskej termje
Kupjel Korzymsku terma chcedźa nanajpozdźišo 1. nowembra zaso wočinić. To wuchadźa ze zakładneho wobzamknjenja Budyskeho wokrjesneho sejmika. Zapisane su w nim konkretne kroki wokrjesa za wuchowanje zarjadnišća, kotrež přisłušny zaměrowy zwjazk sam rjadować njemóže.
Budyšin/Korzym (SN/at). Budyski wokrjes je wulce zajimowany, zo Korzymska terma dale wobsteji a so wuwije. Jeje nošerstwo pak njepřewozmje, z čimž próstwje přisłušneho zaměroweho zwjazka z 29. junija njewotpowěduje. To zhonichu wokrjesni radźićeljo na posedźenju sejmika minjenu póndźelu. Wuměnjenje podpěry ze stron wokrjesa pak je, zo zaměrowy zwjazk kupjel hač do 1. nowembra zaso wotewrje a wobhospodarja, doniž doskónčne rozrisanje nastupajo nošerstwo njepředleži. To je prěni krok, za jeho přihoty přewostaji wokrjes 200 000 eurow. Suma je na zakładźe wobzamknjenja wokrjesneho sejmika z lěta 2018 wo podpěrje zaměroweho zwjazka w lětušim budgeće předwidźana.
Krótkopowěsće (01.10.20)
Třoch stacionarnje lěkuja
Budyšin. Z dalšimi pjeć zwěsćenymi padami je ličba z koronawirusom inficěrowanych w Budyskim wokrjesu wčera na 608 rozrostła. Schorjenych je 38 wosobow (+ 3), z kotrychž tři (+ 1) stacionarnje lěkuja. Nastupajo natyknjenu šulerku Budyskeho powołanskošulskeho centruma (BSZ) ze Zhorjelskeho wokrjesa kontaktne wosoby dale zwěsćeja, zdźěli krajnoradny zarjad. Strach, zo dyrbja BSZ zawrěć, tuchwilu njehrozy.
Filmy festiwala online hladać
Choćebuz. Wot 3. do 8. nowembra njewotměje so 30. Choćebuski filmowy festiwal jenož w kinach, ale tež online. Zajimcy móža so za 30 eurow z internetnym formularom akreditować, zo bychu sej nimale 200 filmow online wobhladać móhli, a to hač do 25. oktobra. Jednotliwe filmy su w Němskej bydlacym tež přez poskitk Pay-per-view bjez akreditacije přistupne.
Nowy staršiski list wušoł
Policija (30.09.20)
Wuheń so palił
Ćisk. W jednym ze statokow na Ćišćanskej nawsy je so předwčerawšim wuheń palił. Jako wobydler tam kachle zatepi, nadobo płomjenja z wuhenja sapachu. Muž spyta na to woheń w kachlach z wodu hašeć, při tym pak so wuheń pukny, tak zo nasta něhdźe tysac eurow škody. Snadnje zranjeny muž dyrbješe so w chorowni lěkarsce zastarać dać. Policija pad dale přepytuje. Zawěsće pak so z nim tež přisłušny saznik zaběra.
Wolfgang Kühn dobył
Nowi spěwarjo rady witani
Konjecy. Serbski muski chór Delany přeproša dalšich muži, kotřiž rady a rjenje spěwaja, na projektny spěwny wječor. Po dorěčenju z prěnimi nowymi spěwarjemi zetkaja so stajnje štwórtk w 19 hodź. w Konječanskej Burskej stwě, informuje zamołwity za projektny chór Alojs Langa. „Na nowych spěwarjow čaka a wjeseli so předsydstwo chóra Delany“, rěka w jeho zdźělence.
Na kulturny kónc tydźenja
Kulow. Štwórty raz wuhotuje towarstwo United Clubs for Kulow wot pjatka hač do njedźele w měsće kulturny kónc tydźenja při tamnišej piwarni. Zajutřišim, pjatk, w 20.30 hodź. pokazaja film „Der Ballon“, jednacy wo ćeknjenju dweju swójbow z wuchoda na zapad. Zastup płaći štyri eura. Sobotu přeproša wot 18.30 hodź. na winowy swjedźeń a live-hudźbu. Zastup je darmotny. Njedźelu wot 18 hodź. zakónča swjedźeń z kinom za dźěći a wobhladaja sej zhromadnje „Tatort“. Wšitke tři dny budźe ćělne derjeměće zaručene. Zajimcy njech přizjewja so pod telefonowym čisłom 0178/ 181 94 14.
Maja nětko milinowy sćežor
Spominaja zhromadnje na přewrót
Budyšin (SN/MWj). K lětušej 30. róčnicy zjednoćenja Němskeje dožiwi Budyšin wosebitu premjeru. Dźewjeć wšelakich křesćanskich wosadow a iniciatiwow města organizuje 3. oktobra za Budyšanow wjacore zarjadowanja. Aktualnych postajenjow hygieny dla njemóža program za telko ludźi kaž spočatnje předwidźane na Žitnych wikach přewjesć, ale přepołožichu jón na Třělnišćo. Program saha wot kreatiwneje dźěćaceje zaběry přez ekumenisku dźaknu nutrnosć hač k zhromadnemu spěwanju ze swěčkami w ruce.
Kaž organizatorojo informuja, započnje so w 16 hodź. pisany program za dźěći z dźiwadłom, hrami a hudźbu. Pódla budźe law Moki, wot kotrehož dźěći zhonja, kak je před wjace hač 30 lětami murja padnyła a kak móhli špatne murje w dźensnišim wobswěće přewinyć.
Plaketu za starožitnosć dóstał
Wuměłstwowy wikowar restawruje palais na Budyskej Hornčerskej
Budyšin (CS/SN). Palais na Budyskej Hornčerskej hasy 34 bě wjele lět přewšo njenahladne twarjenje. W bajce by wone snano jako hrodźik za wysokimi ćernjemi wopisane było. A njeby-li „princ“ w postawje španiskeho wuměłstwoweho wikowarja Joséja Manuela Ladróna de Guevary přišoł, by so dom snano samo sypnył. Wón pak je jón z hłubokeho spara wubudźił. Před dźesać lětami kupi pózdnjobaroksku starožitnosć a restawrowaše ju krok po kroku. Zo bychu jeho wukony zjawnje wuzběhnyli, je so Budyske wuměłstwowe towarstwo rozsudźiło, Španičanej plaketu „Přikładnje restawrowany pomnik“ spožčić.
Marko Grojlich w Zarěču čitał
Schadźowanku lětsa hinak swjećić
Kelko zarjadowanjow je so lětsa hižo w Hornjej Łužicy z woporom korony stało, drje žadyn čłowjek zličić njemóže. Najebać přiběrace ličby infekcijow pak lětušu schadźowanku dale planuja.
Budyšin (SN/MWj). „146. schadźowanka budźe, a to 21. nowembra 2020 w Budyskej Krónje!“ Z tejle namołwu wobroćeja so režiseraj Katka Pöpelec a Syman Hejduška kaž tež Jana Pětrowa ze Załožby za serbski lud na serbskich studentow a šulerjow Serbskeho gymnazija Budyšin, zo bychu swoje přinoški za kulturny program zapodali.
Schadźowanka budźe po słowach organizatorow „naročna, dokelž jednore ničo njebudźe“. Přiwšěm chcedźa znowa zajimawy program zestajeć, za čož měli so zajimcy hač do 9. oktobra přizjewić a zdźělić, kelko sobuskutkowacych wěsty přinošk změje a kotrej temje jón wěnuja. Tak w namołwje rěka, zo měli studenća a šulerjo na dołhosć přinoška dźiwać. Nazhonjenja dźě wuča, zo krótke a jadriwe sceny najwjace přikleska wuwabjeja.
