Tuchwilne wuwiće koronapandemije cyle jasnje na to pokazuje, zo drje nas lětsa „horca“ nazyma wočakuje. W mnohich krajach postajeja rizikowe kónčiny, a runje tak wone w Němskej přiběraja, hlej Berlin. Mjeztym samo tak daloko du, zo dyrbiš so za Božu mšu přizjewić, kaž to najnowša informacija ze Smochćic wu­jewja. W Budyskej serbskej cyrkwi je to ­hižo cyły měsac z wašnjom. Ćim nje­zrozumliwiše mi je, zo někotři tak činja, kaž zo korony było njeby. Tak pobych předwčerawšim z kolesom při Lejnjanskim jězoru. A dokelž maja w Lejnom rjany hosćenc, do njeho załožich. Při zachodźe sćahnych sej runje škitny nahubnik ze zaka, jako jedna z pinčnicow wotkiwny: „Tón tu njetrjebaće.“ Myslach sej, zo prawje njesłyšu. Tež mjeno, telefonowe čisło atd. zawostajić njetrjebach. Zo njedožiwimy žadyn druhi lockdown, toho so tež ja nadźijam. Za to pak dyrbiš na wěstotu dźiwać. Hač to z tajkimi rozdźělemi dźe? Marian Wjeńka

Budyšin (SN/MiR). 55 angažowanych skupin młodostnych kaž tež towarstwow z Budyskeho wokrjesa chce so na lětušej 48hodźinskej akciji wobdźělić. Mjez poskitkami su někotre serbskich młodostnych. Přizjewili su so štyrjo zajimcy z wobłuka zarjadniskeho zwjazka Při Klóšterskej wodźe a z Kulowa. Regionalny běrow Rěčneho centruma WITAJ w Chrósćicach so wo nje stara. RCW słuša k nošerjam akcije za serbski sydlenski rum runje tak kaž Budyski Kamjentny dom za Budyšin a za region sewjerowuchodnje sprjewineho města.

Budyšin/Smochćicy (CS/SN). We wobłuku interkulturnych tydźenjow wokrjesa Budyšin bě wčerawša póndźela jako temowy dźeń Israelej wěnowana. Z prě­njeje ruki zhonichu hosćo na Budyskim krajnoradnym zarjedźe wo aktualnym połoženju w kraju. Žurnalist Igal Avidan rozprawješe wo tuchwilnym wuwiću w swojej domiznje. Wječor předstaji wón w Smochčanskim kubłanišću swj. Bena swoju knihu wo egyptowskim lěkarju Modu Helmyju, kiž bě w Berlinje židowsku holcu wuchował, zmóžnjejo jej přestup k islamskej wěrje a chowajo ju.

Społnomócnjena wokrjesa Budyšin za wukrajnikow Anna Piętak-Malinowska rozprawješe wo kubłanskej jězbje, kotraž bě ju do Israela wjedła. Kurt a Ellen Spengler běštaj w Betlehemskim domje „Lifegate“ 2019 při hladanju zbrašenych dźěći a młodostnych pomhałoj a powědaštaj wo swojich zaćišćach. Kaž wonaj rjekny­štaj, tam wrota k žiwjenju přede­wšěm muslimskim zbrašenym na dwoje wašnje wotwěraja: Sprěnja dóstawaja tele dźěći scyła přistup ke kubłanju, a zdruha je w zarjadnišću na žiwjenje přihotuja.

DGB: Žadyn socialny pasyk

Drježdźany. Přichodny etat Sakskeje nastupajo warnuje předsyda DGB Sakskeje Markus Schlimbach dźensa před so­cialnym pasykom (Kahlschlag) w swobodnym staće. „Runje w krizy dyrbiš do při­choda ludźi inwe­stować. Nětko w dźěłowičnej abo social­nej poli­tice luto­wać je wopačny puć.“ Žadanje zwjazkow­ dźěłodawarjow, bóle lutować, Schlimbach wotpokazuje.

Nobelowe myto za medicinu

Stockholm. Lětuše Nobelowe myto za me­dicinu spožča biochemikarjej Mi­chaelej Houghtonej (Wulka Britaniska) kaž tež wirologomaj Harveyjej J. Alterej a Charlesej M. Ricej (wobaj USA). To zdźěli wčera Karolinska-institut w Stockholmje. Mjenowani třo su wirus hepatitis-C wotkryli. Dźakowano jich slědźenjam je chorosć hepatitis C nětko lěkujomna.

Rigorozne naprawy korony dla