Městno tola wupisaja
Wojerecy (AK/SN). Městno wěcneje wobdźěłarki za nowinske a zjawnostne dźěło města Wojerec budźe znowa wupisane. To je tamniša měšćanska rada na swojim zašłym posedźenju wobzamknyła. Angela Donath, kotraž zastojnstwo tuchwilu wukonja, poda so kónc lěta dočasnje na wuměnk.
Sprjewine město trjeba pomoc
Budyšin. Jutře, srjedu, 4. decembra, budźe wusyłanje Sachsenspiegel telewizijneho sćelaka MDR we wobłuku lětušeje tury po adwentnych wikach z hosćom w Budyšinje. Hosćićelske města maja při tym stajnje nadawk spjelnić. Sprjewine město dósta slědowacy: „Pokazajće na jewišću ptači kwas a namakajće znajmjeńša dźesać Budyskich porikow, kiž su so loni woženili a kotrež w swojim originalnym kwasnym outfiće na adwentne wiki přińdu.“ Město Budyšin prosy tuž wšitke pory z Budyšina, kotrež su so w lěće 2018 zmandźelili, wo pomoc. „Pory, kotrež chcedźa dźěl tejele romantiskeje inscenacije być a samo hišće dobyć, njech přizjewja so hač do jutřišeho w 12 hodź. z e-mailku w zarjedźe za nowinarske dźěło a měšćanski marketing. Adresa je . Přińdźe-li potom dosć porow na wiki, wulosuja mjez nimi pjeć króć dwaj zastupnej lisćikaj za adwentny koncert Drježdźanskeho křižneho chóra w tamnišim Rudolfa Harbigowym stadionje.
Wo wobrazowych albumach
Adwent wosebje witali
Dale a wjac ludźi ze zarjadowanjemi dohodowny čas zahaja
Budyšin (SN/JaW). Na mnohich wsach a městach Hornjeje Łužicy su minjeny kónc tydźenja adwentny čas na wosebite wašnje witali.
W Njebjelčicach wotměchu swoje tradicionalne adwentne wiki na parkowanišću při wosadnej žurli „Bjesada“. Dźěći tamnišeje pěstowarnje „Jan Skala – Barbojte kamuški“ předstajichu znowa mnoholičbnje přichwatanym wopytowarjam dwurěčny program. Jako organizator zazběha do adwenta bě Njebjelčanske domizniske towarstwo tohorunja znowa karusel za dźěći wobstarało.
Čakarnju ze škleńcu zakryli
Nowe kopolaki kładli
Krótkopowěsće (03.12.19)
Nawodnistwo zaso dospołne
Choćebuz. Ruth Heynen je nowa direktorka činohrajneho studija a Alexander Mercyn nowy generalny hudźbny direktor Choćebuskeho Statneho dźiwadła. To je rada Braniborskeje kulturneje załožby Choćebuz-Frankfurt nad Wódru wčera wobzamknyła. Wuměłstwowe nawodnistwo hłowneho dźiwadła delnjołužiskeje metropole je tuž zaso dospołne.
Nowe płaćizny schwalili
Budyšin. Nowy popłatkowy porjad płaći za Budyski Serbski muzej a za Kamjenski Muzej zapadneje Łužicy w nošerstwje wokrjesa wot 1. januara 2020. To je Budyski wokrjesny sejmik wčera wobzamknył. Zastupny pjenjez w skupinje, normalny a potuńšeny je jedyn, swójbna karta wo dwaj euraj dróše. Runje tak zwyša podruž za zarjadowanja w rumnosćach na 75 do 150 eurow. Wšitke tamne płaćizny wostanu njezměnjene.
Lěwica z nowym předsydu
Policija (02.12.19)
Cigaretowy awtomat rozbuchnyli
Sulšecy. Přewšo wótry wrjesk je wobydlerjow delnich Sulšec w nocy na sobotu něhdźe w dwěmaj ze spara torhnył. Kaž policija dźensa zdźěli, běchu njeznaći we wsy na twarjenju připrawjeny zjawnje přistupny cigaretowy awtomat rozbuchnyli. Kelko pjenjez móžachu ze swojej akciju spakosćić a kelko tyzow cigaretow su sobu wzali, dotal hišće jasne njeje. Kriminalna policija pad přepytuje. Kaž pak informuje, su skućićeljo z detonaciju awtomata wjacore tysacy eurow škody načinili.
Za kurs serbšćiny so přizjewić
Budyšin. Šulerjam 2. hač do 5. lětnika, kotřiž nimaja składnosć, so na wučbje serbšćiny wobdźělić, skići Rěčny centrum WITAJ w jutrownych prózdninach wot 14. do 17. apryla ferialny kurs serbšćiny. Šulerjo zeznaja serbski alfabet a zwučuja serbsce čitać a pisać. Po wučbje dožiwja zajimawe serbskorěčne poskitki. Přizjewjenja přijimuja hač do 20. januara 2020 pod telefonowym čisłom 03591 550 414 a pod .
Spěwaja za dobry skutk
Jaseńca. Sobotu, 7. decembra, přeprosytaj Florian Rynč a muski kwartet PoŠtyrjoch na mjeztym 9. dohodowny beneficny koncert do Rynčec bróžnje w Jaseńcy. Wopytowarjo smědźa so znowa na wotměnjawy program wjeselić. Lětsa budźe Drježdźanski muski kwartet „Die Hormonischen“ z hosćom. Zaklinčeć maja adwentne kaž tež zabawne spěwy skupiny PoŠtyrjoch. Wunošk ze zběrki a z předanje napojow a přikuska darja znowa za dobry skutk. Započatk je w 19.30 hodź. Koncertej přizamknje so zabawa.
Wutwar Nowoměšćanskeje tydźenjej dlěje traje
Budyšin (SN/JaW). Wutwar Budyskeje Nowoměšćanskeje traje dlěje hač planowane. To zdźěla měšćanske zarjadnistwo. „Poprawom měł puć mjez wotjězdom na zapadnu tangentu zwjazkoweje dróhi B 96 a wotbóčku na Eckenerowu za wobchad w nowembrje zaso swobodny być“, rěka w zdźělence sprjewineho města, „tola kaž časćišo njeběchu twarscy fachowcy z ćežemi łužiskeho zornowca dla ličili. Nimo toho dyrbjachmy wutwar šěrokopasmoweje syće do planowanjow přiwzać. Wobě naležnosći wjedźetej k tomu, zo dźěła na Nowoměšćanskej dróze hakle dwaj tydźenjej pozdźišo zakónčimy. Tak wostanje mjenowany wotrězk hišće hač do 16. decembra zawrjeny a wobstejace wobjězdki płaćiwe“, město informuje.
