Kubšiska kapałka wobsteji mjeztym połsta lět
Kubšicy (CS/SN). Poprawom su cyrkwje a kapałki wjele starše hač połsta lět. Wšako njebě jich twar za NDRski čas rady widźany. Z wulkej porciju mudrosće a dowěry pak su sej Kubšičenjo kónc 1960tych lět kapałku na kěrchowje natwarili, byrnjež tež tón hišće přestary njebył. Nastał bě 1956. Kěrchow w Poršicach (Purschwitz) móžachu južnje Lětońskeho lětanišća bydlacy jeno ćežko docpěć. Wójsko bě lětanišćo spočatk 50tych lět wutwariło.
Spěwy z brunicowych kónčin
Slepo. Walburga Wałdźic předstaji z projektowym žónskim chórom sep nowowobdźěłanych spěwow z brunicowych kónčin. Pólska huslerka Izabela Kałduńska wokalne zynki na huslach přewodźa. Koncert budźe sobotu, 18. julija, w 19.30 hodź. w Budyskim Serbskim muzeju a njedźelu, 19. julija, w 17 hodź. w Złokomorowskej Serbskej cyrkwi. Projekt spěchuja z fondsa „Čiń sobu!“.
W prózdninach na farmu
Wojerecy. Na Wojerowskej dźěćacej a młodźinskej farmje přihotuja za zajimcow zabawny prózdninski program. Zarjadnišćo budźe potom wo póndźele do pjatka wot 9 do 12 hodź. a wot 14 do 17 hodź. wotewrjene. Maksimalnje 40 dźěći a młodostnych, kiž dyrbja so do toho přizjewić, móže tam přebywać. Přizjewjenje je dwaj dnjej do toho trěbne, a to telefonisce pod čisłom 03571/ 426339 abo e-mejlnje pod . Mjez druhim chcedźa tam pokład pytać, zmysły sej wotkryć, wuměłstwowe wudźěłki z přirodnych materialijow tworić a so zabawjeć. Hlej tež pod www.csb-miltitz.de.
Policija (13.07.20)
Kolesowar znjezbožił
Horni Wunjow. Jako jědźeše sobotu wječor 54lětny kolesowar z Lešawy do Hornjeho Wunjowa, je z kerčizny nadobo sorna wuskočiła, a muž zrazy w křiwicy do njeje. Kolesowar so ćežko zrani. Jako wuchowarjo na městno njezboža dojědźechu, bě sorna hižo ćeknyła.
Do transportera so zadobyli
Wotrow. Dotal njeznaći běchu so w nocy wot minjeneho pjatka na sobotu do předewzaća za domjacu techniku we Wotrowje zadobyli. Ze zamknjeneho małotransportera pokradnychu wšelke nastroje a techniku w hódnoće 4 000 eurow. Škoda na jězdźidle wučinja něhdźe 300 eurow.
Hat wjesne srjedźišćo wožiwja
Wuježk (SN/at). Na čornej desce we Wuježku, gmejna Bukecy, čitaš hišće informaciju wo mytowanym projekće Čornobóskeho towarstwa we wobłuku sakskeho fondsa „Čiń sobu!“ 2019, kategorija ReWir, kotryž su loni hłownje wotzamknyli. Přichodne tydźenje jón dokónča. Hižo nětko je wjesny hat w swojej nowej pyše wobydlerjam wokřewjenje a kolesowarjam po pućach pod Čornobohom witane zastanišćo.
„Wjesny hat ma so zaso stać z atraktiwnym a widźomnym wjesnym srjedźišćom“, piše Čornobóske towarstwo. Přijědźeš-li z Bukec abo z Mješic do wsy, měritej so wóčce hnydom na hat. Na sewjernym pobrjohu nasta městno za swójby a hrajkanje. „Wuježčenjo tule městnosć rady wužiwaja“, powěda Norbert Wolf. Wjesnjanosta gmejny Bukecy dyrbi to wědźeć, wšako wón hnydom při haće bydli. Jeho ležownosć mjezuje na žiwy płót na wuchodnym pobrjohu.
Pućowace a rěčace kamjenje
Njeswačidło je wo dalšu drohoćinku bohatše
Njeswačidło (UM/SN). Charakter Hornjeje Łužicy je kamjenjaty. Wo tym krajina swědči: bazalt, zornowc, dwubłyšćinkowy granodiorit, ale tež fonolit w njej namakamy. Husto leža na płoninach wulke, jednotliwe kamjenje – błudźenki. „Wone su so w lodowej dobje ze sewjera na juh dóstali a něhdźe ležo wostali“, rozjasnja Klaus Wagner. Budyšan zaběra so intensiwnje z kamjenjemi swojeje domizny. Mjez druhim bě wón wobdźěleny na wutworjenju kubłanskeje šćežki błudźenkow, kotraž bě njedawno hišće z Njeswačanskeje młodownje hač k Łučnym hatam w Koslowje wjedła. Błudźenki pochadźeja z jamy za wudobywanje kaolina w Kamjenej. „Ze šćežku chcychmy w młodowni přebywacym hosćom zawostajenstwo dawneho časa zbližić.“ Zajim za kubłanski poskitk pod hołym njebjom pak přewulki njebě. Za Klausa Wagnera a dalšich zajimcow bě to přičina jednać. „Smy namjetowali, błudźenki do Njeswačanskeho hrodoweho parka přesadźić – na městnosć, kotruž mnozy wopytuja“, mineraloga rozprawja. Tamniša přirodoškitna stacija je jich při tym podpěrała.
W Radušu so alpaka narodźił
Dadźa so do wuwićoweho koncepta
Město Kulow chce dołhodobnje wuwićowy koncept gmejny zdźěłać, kotryž ma za město same a za wjesne dźěle Brěžki, Dubrjenk, Hózk, Kulowc, Koćinu, Mučow, Nowu Wjes, Rachlow, Salow, Sulšecy a Spale płaćić.
Kulow (AK/SN). „Gmejnski wuwićowy koncept je wuměnjenje, zo bychmy přichodnje spěchowanske srědki ze wšelakich programow dóstali. Tón je zakład za přizwolenje přiražkow w přichodźe. Bjez integrowaneho wuwićoweho koncepta komuny žanoho spěchowanja njebudźe“, rozłoži Martin Neumann, projektny nawoda towaršnosće za měšćanske wuwiće tzwr w Drježdźanach (STEG), na njedawnym posedźenju měšćanskeje rady. Wón Kulow w procesu fachowje přewodźa.
Krótkopowěsće (13.07.20)
Rěčne rumy nadal najwažniše
Budyšin. Serbscy čłonojo rady Załožby za serbski lud su minjenej pjatk a sobotu w sprjewinym měsće klawsuru wotměli. Mjez druhim rozmyslowachu wo tym, kak spěchowanje sylnišo na priority wusměrić. Ćežišći běštej regionalizacija a skrućenje serbskich rěčnych rumow. Nazymu ma wothłosowanje zakónčene być, zo móhli přiměrjene naprawy w klětušim hospodarskim planje wobkedźbować.
Wuspěšna wabjenska akcija
Budyšin. Wabjenska akcija Marketingoweje towaršnosće Hornja Łužica-Delnja Šleska (MGO) „Ekstaza čućow Hornja Łužica“ bě minjene tři tydźenja jara wuspěšna. Něhdźe dwanaće milionow ludźi je z akciju docpěła, kaž MGO zašły pjatk zdźěli. Wabili su w bliskowobchadnych srědkach w Drježdźanach a Kamjenicy, w socialnych syćach kaž tež w radiju.
Schüle so Mundej dźakowała
Policija (10.07.20)
Schowany moped namakali
Njebjelčicy. Připadnje při wuchodźowanju je muž srjedu popołdnju na lěsnym pućiku njedaloko Njebjelčic čorny moped ze zawěsćenskej značku wuhladał. Mofa marki Alpha Motors bě pod hałzami schowane. Zawołana policija zwěsći, zo bu moped hakle minjeny měsac pokradnjeny. Dale nańdźechu zastojnicy na městnje mjez druhim hišće klumpu, pjećlitrowski bencinowy kanister, rukajcy a nahłownik. Policisća wěcy zawěsćichu a informowachu woprawdźiteho wobsedźerja wo namakance.
Prózdninska zabawa za dźěći
Lückendorf. Dekanatne dušepastyrstwo za dźěći přeproša šulerki a šulerjow 5. do 8. lětnika wot póndźele, 17. awgusta, do štwórtka, 20. awgusta, na prózdninsku zabawu do Lückendorfa w Žitawskich horinach. Lětuše hesło rěka „Prózdniny, pućowanje, Boža stwórba, dyrdomdej.“ Swójski přinošk wučinja 80 eurow. Přizjewjenja su hač do pjatka, 17. julija, pod tel. čo. 035796/ 88707 a z mejlku na móžne.
Tworić w Mnišej rozwalinje
Budyšin. Serbska wuměłča Borbora Wiesnerec chce zajimcow na lětušej lětnjej akademiji Budyskeho wuměłstwoweho towarstwa z.t. ke kreatiwnemu tworjenju pohonjeć. Wot 20. do 25. junija budźe dźěłarnička w rozwalinje Budyskeje Mnišeje cyrkwje. Štóž chce pódla być, trjeba wosebje dźěłansku drastu a wotpowědne nawoči. Wšako zaběraja so wobdźěleni z rězbarjenjom. Dalši wuměłcy, kotřiž sobu skutkuja, su Gabi Kell (molowanje), Edith Böhme (molowanje freskow) a Hans Kutschke (rysowanje).
Z hribami a rostlinami barbić
