SPTWS-akcija zakónčena

Budyšin. Akcija Serbskeho poskitka tydźe­nja w syći (SPTWS), kotruž bě Za­łožba za serbski lud za čas koronakrizy iniciěrowała, je zakónčena, zdźěli jury w dźensa wozjewjenym wideju na kanalu Youtube. Sydom internetnych poskitkow su w minjenych tydźenjach mytowali, žanych nowych pak njeje k tomu přišło. Jury sej přiwšěm přeje, digitalne serbskorěčne poskitki dale šěrić.

Trilex-ćahi zaso do Čěskeje

Drježdźany. Ćahi Trilex maja wot přichodneje póndźele zaso z Drježdźan přez Žitawu do Libereca jězdźić. Wobmje­zowany jězbny plan pak hišće dale płaći, kaž předewzaće Länderbahn zdźěli. Wot 4. julija poskića tež zaso woblubowany kónctydźenski zwisk do Doks. Ćahi do směra na Pólsku pak so hišće dale w Zhorjelcu kónča.

Přećiwo zwičnjenju nacizma

Kofej radšo doma pić

Ptačecy. Kofejowy nopašk za „po puću“ je předwčerawšim rano na wokrjesnej dróze mjez Złym Komorowom a Ptačecami po wšěm zdaću wobchadne njezbožo zawinił. Horcy napoj steješe na pódlanskim sydle VW Tourana a so při jězbje powróći. To 56lětnu wodźerku drje bóle zaběraše, hač na puć dźiwać. Tak wona na prawy bok jězdnje zajědźe a do štoma zrazy. Zranjenu dowjezechu ju do chorownje. Awto so dospołnje skóncowa, škodu trochuja na něhdźe 22 000 eurow.

Dwójny hospodarski plan Njeswačanskeje gmejny nadal njejasny

Njeswačidło (JK/SN). Zo posedźenje gmejnskeje rady tak dołho traje, sej jeje čłonojo kaž tež wjesnjanosta Gerd Schuster (CDU) wčera wječor w Njeswačidle zawěsće myslili njeběchu. Dnjowy porjad dźě bě poměrnje přehladny, ale diskusije k wšelakim dypkam běchu přiwšěm něšto dlěše a zdźěla tež woprawnjene. Wosebje dołho rěčachu radźićeljo wo tym, kak hodźi so hrožacy minus w naćisku dwójneho hospodarskeho plana na znjesliwu wulkosć pomjeńšić. Wuchadźejo z wuskutkow koronapandemije liči gmejna z mjenje dochodami, a tak hrozy minus w etaće. Komornica Liliane Wetzko radźićelam hišće raz móžne potenciale lutowanja a móžnych wyšich dochodow rozłoži, minus pak da so jeno snadnje pomjeńšić. Tak wjesnjanosta namjetowaše, zo porěči z prawniskim dohladowanskim zarjadom, hač naćisk etata w předležacej formje přiwozmje. Jeli tomu tak budźe, chcedźa jón na posedźenju w juliju za lětsa a klětu wobzamknyć.

Dźěwin (AK/SN). Lětsa chce Dźěwinska gmejna hłownje do pěstowarnjow, wo­hnjoweje wobory, do pohrjebnišćow a do wutwara šěrokopasmoweje syće inwestować. Tele ćežišća předwidźi etat, kotryž su gmejnscy radźićeljo na swojim zašłym posedźenju wobzamknyli.

Kaž komornica Carmen Petrick rozłoži, nochcedźa žane dawki zwyšić. Tuchwilu liča z cyłkownym deficitom wjace hač 300 000 eurow. Tohodla drje hinak ­njepóńdźe, hač zo dyrbja za wohnjowoborne wudawki kredit něhdźe 35 000 eurow wzać. Přiwšěm je gmejna Dźěwin z 202 euromaj na wobydlerja poměrnje snadnje zadołžena. Dokelž pak je hospodarske połoženje komuny dale napjate, komornica wočakuje, zo dyrbja nětko hospodarski konsolidowanski koncept nastajić.

Najwažniše lětuše předewzaća gmejny su, ponowić wohnjowobornu gratownju w Brězowce, kupić hašenske jězdźidło za tamnišich wobornikow, twarić kolesowanski puć z Dźěwina do Slepoho a přetwarić Dźěwinsku nawjes. Za něhdźe 70 000 eurow porjeńša pohrjebnišći w Brězowce a Dźěwinje.