Policija (07.07.20)
Ze zapřahom znjezbožił
Kulow. Kaž Zhorjelska policajska direkcija zdźěli, je njedźelu popołdnju napoł třoch na Nowowjesnjanskim puću w Kulowje konjacy zapřah znjezbožił. Z dotal njeznateje přičiny běštej do kuče zapřehnjenej konjej na lěwy bok puća twochnyłoj, kuču sobu torhnyłoj a dale na bliske pola běžałoj. Za pohonča měješe wulět bolostny wukónc. Wón padny do hrjebje a so zrani. Škoda na kremseru wučinja něhdźe tysac eurow. Konjomaj so na zbožo ničo stało njeje.
Na gmejnsku radu
Hórki. Na swojim posedźenju štwórtk, 9. julija, w 19.30 hodź. ma so Chróšćanska gmejnska rada z wjacorymi twarskimi temami zaběrać. W Hórčanskej wohnjowobornej gratowni póńdźe mjez druhim wo torhanje bydlenskeho domu a wo přetwar pódlanskeho twarjenja we wsy. Wobzamknyć radźićeljo tež změja, komu přepodadźa nadawk za wuhotowanje rumnosće ručneho dźěła na Chróšćanskej zakładnej šuli „Jurij Chěžka“.
Radźićelow zarjadniskeho zwjazka napis dale zaběra
Pančicy-Kukow (SN/JaW). Z rozsudom, w kotrym slědźe měli napis na ponowjenym twarjenju zarjadniskeho zwjazka w Pančicach-Kukowje připrawić – najprjedy serbske a po tym němske abo nawopak –, změja so zastupnicy přisłušnych gmejnow jutře, srjedu, 8. julija, wot 18 hodź. w awli Pančičansko-Kukowskeje šule znowa zaběrać.
Zo rozsud z 23. junija płaćiwy njeje, wobkrući našemu wječornikej předsyda zarjadniskeho zwjazka Při Klóšterskej wodźe Měrko Domaška. Jako přičinu mjenuje wón formalny zmylk. „Po předpisach dyrbi naležnosć wobstatk dnjoweho porjada być. Tomu tak njebě, tajke chwatne zasunjenje naležnosćow njeje dowolene, a tak dyrbimy wobzamknjenje zběhnyć a znowa rozsudźić. Gmejna Pančicy-Kukow je tuž woprawnjene spřećiwjenje zapodała. Zo njebě naležnosć wobstatk dnjoweho porjada, bě mój zmylk“, Domaška wuswětli.
Njewočakowany koncert
Dokumenty swědča wo agilnosći
Nimo wulkich nadregionalnych serbskich towarstwow, kiž su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy.
Dźensa: „K žorawjej“ z.t. Koslow (1)
Załoženje agilneho Koslowskeho towarstwa K žorawjej njeposrědnje po towaršnostnym přewróće ma zajimawe předstawizny. Za čas NDR mějachu w Koslowje Domowinsku skupinu, kotraž pak zamó so wo towaršnostne žiwjenje jeno sporadisce starać. Přičina bě, zo njemějachu we wsy žanu móžnosć so prawidłownje schadźować. Jenička alternatiwa bě mała gratownja wohnjoweje wobory.
Po twjerdźiznje so rozhladowali
Čaporowe wiki su mjeztym přewšo woblubowana tradicija
Mortkow (aha/SN). Njedźelu kaž tež sobotu běštej wulkej parkowanišći za Mortkowskej Jakubec twjerdźiznu wot ranja hač do wječora zaparkowanej. Awtowe čisła přeradźichu, zo běchu ludźo ze Sakskeje a Braniborskeje, ale tež ze zdalenišich zwjazkowych krajow přijěli. Mjeztym štwórty raz je zarjadowanska agentura z Drježdźan pod nawodom Yvonny Schwarz na njewšědnym wulětnišću a zarjadowanišću antikne a čaporowe wiki za zběrarjow a měnjerjow čapora wuhotowała. Wosebita srjedźowěkowska atmosfera njeposrědnje wokoło Mortkowskeje twjerdźizny zběrarjow stajnje zaso přiwabja. Tónkróć bě to wjace hač cyłkownje 4 500 ludźi, z toho hižo sobotu něhdźe 2 000.
Nětko sym wćipny
Krótkopowěsće (07.07.20)
Chcedźa hromadźe dźěłać
Budyšin. Załožba za serbski lud, Domowina kaž tež Radźe za serbske naležnosće Sakskeje a Braniborskeje chcedźa zhromadnje přidatne pjenjezy z fondsa za strukturnu změnu koordinować. Na to su so wčera w Budyšinje dorozumili. Pozadk dojednanja je rozsud zwjazkoweho knježerstwa zańdźeny pjatk, kotrež chce naprawy dalewuwiwanja a zachowanja rěče, kultury a tradicijow serbskeho ludu spěchować.
Žadyn festiwal při skale
Nuknica. Za kónc awgusta planowany Nukstock-openair wupadnje. To wobzamknychu čłonojo hudźbny festiwal zarjadowaceho towarstwa barakka minjenu sobotu na swojim nimorjadnym posedźenju. Přičina je njewěste połoženje w zwisku z tuchwilnej pandemiju. Wo dalšich lětušich koncertach rozsudźić chce towarstwo přichodny měsac.
Ennio Morricone njeboh
Policija (06.07.20)
Woheń deski dla wudyrił
Wojerecy. Tołste mróčele pokazowachu sobotu popołdnju na to, zo so w bydlenju na Wojerowskej Salomona Bohuchwała Frencelowej pali. Na městnje zwěsćichu wohnjowi wobornicy, zo ležeše drjewjana deska na kachlach, kotrež bě po zdaću njewotpohladnje zaswěćiło. Na zbožo so nichtó njezrani. Na hašenju wobdźělene běchu wobory Wojerecy-stare město, Němcy, Wojerecy-nowe město/Kinajcht a Ćisk kaž tež wuchowanska słužba maltezow. Dohromady 36 kameradow bě zasadźenych.
Třěcha bróžnje so paliła
Ptačecy. Hižo w nocy na sobotu w jednej dyrbješe wohnjowa wobora palacu třěchu bróžnje w Ptačecach hašeć. W bróžni běchu dźěłowe graty za pólne dźěła składowane. Na zbožo njejsu płomjenja na pódlanske domy přeskočili. Přiwšěm bě wulkeje horcoty dla k wobškodźenju pódlanskeho kónctydźenskeho domskeho dóšło. Wěcnu škodu trochuja na wjacore tysacy eurow. Fachowcy nětko přičiny wohenja přepytuja.
