Chcedźa wabjenje we wobrazach zhotowić
Filmowe dopokazy mjezynarodneje kooperacije mjez łužiskimi Njebjelčicami a afriskim městom Quidah
Šěsć hodźin filmoweho materiala je sej Njebjelčanski wjesny chronist Ulli Schorcht wobhladał. Zestajiwši z nich tři hodźinski wurězk, předstaji jón njedawno w Njebjelčicach. Wobsah filmow je wuměna mjez gmejnu Njebjelčicy a jeje partnerskim regionom w afriskim Beninje.
Na zarjadowanje do Njebjelčanskeho gmejnskeho centruma přijěła je njedawno mjez druhim kralowska majestosć Maurice princ Dah Bokpe D’Allada zhromadnje ze swojej mandźelskej Tah Noutché Daho. Kaž dobrych přećelow přijachu jeju Njebjelčenjo, kotřiž běchu na filmowy wječork přichwatali.
Policija (22.07.20)
Wosow dla so žiwy płót palił
Slepo. Zo dyrbiš přewšo kedźbliwy być, hdyž maš na zahrodźe abo samo w domje hnězdo wosow, dyrbješe předwčerawšim muž w Slepom nazhonić. Zakročejo přećiwo překasancam je wón woheń zamiškrił a při tym njemało škody zawinił. Pječa běchu jeho wosy nadpadnyli, tak zo so ze chemiskim srědkom ze sprayjoweje bleše na nje měrješe. Při tym pak so žiwy płót zapali. Susodźa a wohnjowi wobornicy drje płomjenja podusychu, nastata horcota pak přiwšěm płuwanski basenk wobškodźi. Wěcna škoda wučinja dohromady něhdźe 3 000 eurow.
Swojeho wučerja rozžohnowali
Na Ralbičanskej wyšej šuli smy so krótko do kónca šulskeho lěta z rjadowniskim wučerjom 8. lětnika Uwe Macku rozžohnowali. Po wjelelětnym skutkowanju na našim kubłanišću je so wón za nowy powołanski puć rozsudźił. Jako dźak nazwučowachu šulerjo 8. lětnika krótki program. Lóštny spěw „Što radosć rjeńšu dawa“ kaž tež přewod Dorotheje Šołćic na pišćałce a Mije Hrjehorjec na gitarje stej wučerja wočiwidnje zawjeseliłoj. To samsne płaći za serbsku baseń Handrija Zejlerja „Ćeža a dobrota“, kotruž je šuler Janek Borška přednjesł.
Jako kónčny dar přepoda rjadowniska rěčnica Dorothea Šołćic rjany hornc w formje čołma, pjelnjeny z kwětkami a zelemi. Mać šulerki 8. lětnika dari mólbu Dorotheje z motiwom Ralbičanskeje šule a wuzběhny wosebje narodnosć a nabožnosć, kotrejž je knjez Macka šulerjam napřećo wšědnje jako přikład zastupował.
Uwe Macka podźakowa so staršiskej rěčnicy Milenje Boršcynej z kwěćelom za wulkotne zhromadne dźěło na dobro dźěći. Přejemy jemu za přichod zmužitosć, wosebje pak wjeselo a rjane nazhonjenja na nowym dźěłowym městnje. Kerstin Šołćina
Radźićeljo so zetkaja
Snano ke kermuši hotowa
Wjacezaměrowu halu w Rownom chcedźa wobšěrnje ponowić
Rowno (CK/SN). Wjacezaměrowu halu w Rownom su zašłe lěta wobstajnje wobnowjeli abo barbili. Po lětach wužiwanja pak dyrbja to lětsa we wjetšim ramiku zdokonjeć. Za trěbne twarske dźěła je wjesna rada njedawno wotpowědne zaměry postajiła. Radźićeljo saněrowanje jednohłósnje wobkrućichu. Twarjenje ma so přichodnje ze zemskim płunom zastarać. „Chcemy skónčnje elektriske nastroje wotbyć“, rjekny wjesny předstejićel Matthias Jainsch (CDU). Dale chcedźa špundowanje ponowić. Špundowanje je dźěrate, pod nim je ryzy beton. Narunać chcedźa je z parketom, dubjanym špundowanjom abo z kachlicami. Wjerch a snano hišće nuzniki za muži ponowja. Žonjace su před wjacorymi lětami wobnowili. Trěbny je tež druhi nuzowy puć, a młodźina přeje sej za klub přidatne durje do kuchnje.
Přećiwo škódnikam na kukuricy
Hižo dołho je rěč wo tym, kak móhli ratarjo hišće bóle na ekologiske wašnje dźěłać. Na kak wšelakore wašnje je to móžno, bě nětko pola Radworja widźeć. Tam móličke zwěrjata rostlinam derje rosć pomhaja.
Radwor (BHR/SN). Nad polemi wokoło Radworja lětaše tele dny trut, kotryž młody muž z dalokoposłužowakom wodźeše. Jónu hodźeše so to blisko Chelna a nazajtra pola Bronja wobkedźbować. Trut lětaše chětro nisko, a wupadaše to skerje tak, zo tam něchtó wodźenje tajkeho načasneho lětanskeho nastroja zwučuje. Za filmowanje abo fotografowanje krajiny wysokosć lětanskeho aparata na žadyn pad njedosahaše.
Swoje poslednje zwučowanje do prózdninskeje přestawki su ...
Přeju wótre wóčko
Žadanja zhromadnje zastupuja
Z nowym zwjazkom městow a gmejnow chcedźa komuny Budyskeho regiona swoje žadanja wo spěchowanje zhromadnje a zaměrnišo zastupować.
Budyšin (SN/JaW). Cyłkownje 18 komunow Budyskeho wokrjesa – mjez nimi tež wjacore serbske a dwurěčne kaž Radwor, Chrósćicy, Malešecy a Rakecy; dalše móža so hišće přizamknyć – žadaja sej jako zwjazk „Regionalny kruh strukturna změna“ wot Zwjazka a Sakskeje njeběrokratiske a spěšne přepokazanje pjenjez, zo móhli je za infrastrukturu, šule, pěstowarnje kaž tež za dróhotwar a spěchowanje předewzaćow wužiwać. Na to su so zastupnicy městow a gmejnow minjeny tydźeń w Budyskej radnicy dojednali, kaž měšćanske zarjadnistwo w nowinskej zdźělence informuje.
Na dźeń powołanjow do Worklec (2)
Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ znowa tworićelskosć na dobro našeje maćeršćiny pozbudźiło. W serialu Serbske Nowiny tule rjad drobnych a małych projektow předstajeja.
Što wuknyć, hdyž šulu wuchodźu? Wo tym kóžde lěto młodostni rozmysluja, kotřiž dyrbja so w 9. abo 10. lětniku rozsudźić, što chcedźa po zakónčenju šule činić. Póńdu na gymnazij, započnu powołanske wukubłanje abo chcu něhdźe w tu- abo wukraju na socialnym, kulturnym abo přirodnym polu dźěłać, zo bych swoje zamóžnosće nałožować abo sej je dale wotkryć móhł/a? Prašenja to, kotrež tež staršich zaběraja. Mjez nimi je Worklečanka Antje Bobcyna. Předsydka spěchowanskeho towarstwa Worklečanskeje wyšeje šule „Michał Hórnik“ a jeho čłonojo su wo tym rozmyslowali, kak móhli młodostnych wabić, zo w regionje rjemjeslniske powołanje nawuknu.
