Dalši projekt wo zašłosći města
Wojerecy (SiR/SN). Projekt „Pytać za slědami“ we Wojerecach zaběra so lětsa z wodomjetami (Springbrunnen). Mjeztym přewjeduja jón tam štwórty króć. Projekt młodym wobdźělnikam zmóžnja so intensiwnje ze swobodnje wolenej towaršnostnej temu bliže zaběrać a wuslědki zjawnje předstajić. Po prěnich lětach, jako steještej zašłosć NDR ze stawiznami a wuwićom šulow we Wojerecach kaž tež tema „Bjez rěče – Serbja w nacionalsocializmje“ w srjedźišću, maja lětsa hesło „Kupacy so we wodomjetach – dźěćatstwo w NDR“. Při tym hraje skrótšenka Hoywoj wosebitu rólu. Pismik „j“ z přełožka „Wojerecy“ ma symbolisce stać za dwurěčnosć města. Młodźi wobdźělnicy projekta, kotryž tamniša Kulturna fabrika (Kufa) pod nawodom Iny Züchner organizuje, rešeršuja, rozmołwjeja so z časowymi swědkami, zběraja nazhonjenja z nahrawanjom zwukow a wobrazow, a zhonja wo stawiznach města.
Byrnjež měšćanske swjedźenje lětsa w Sakskej korony dla ...
Njejsu so ženje na politiku spušćeli, ale sami jednali
Rozmołwa z Tomašom Čornakom, kiž je mjeztym 30 lět wjesnjanosta
Prěnje komunalne wólby w meji 1990, po měrliwej rewoluciji, běchu za dalši žiwjenski puć Njebjelčana Tomaša Čornaka rozsudne. Wón bu za wjesnjanostu Njebjelčanskeje gmejny wuzwoleny a skutkuje jako tajki hač dodźensa. Za połdra lěta pak wón k přichodnym wólbam wjesnjanosty hižo njenastupi.
Kak sće k tomu přišoł so w komunalnej politice angažować?
Na reformera lěsnistwa a ornitologu dopominali
Gmejna Njeswačidło a jeje Přećeljo domizny a kultury spominachu na 125. narodniny prof.dr.sc.pust. Arnolda swobodneho knjeza von Vietinghoffa-Riescha, rodźeneho 14. awgusta 1895 na 1945 wotpalenym Nowym hrodźe. Na direktnym narodninskim dnju planowachu poprawom hrodowy koncert z přednoškom wo zasłužbnym zemjanu, kotryž pak je kaž wšitke koncerty Budyskeho hudźbneho lěća koronapandemije dla wupadnył. Tak su narodninski swjedźeń hakle njedawno na Njeswačanskim Starym hrodźe z přeprošenymi hosćimi na dostojne wašnje wotměli, wobkedźbujo postajenja hygieny.
Přihotuja Serbsku bajowu šćežku(10)
Idejowe wubědźowanje sakskeho fondsa „Čiń sobu!“ je we wosebitej kategoriji „Žiwa dwurěčnosć“ tworićelskosć na dobro našeje maćeršćiny znowa pozbudźiło. Serbske Nowiny tule w serialu rjad drobnych a małych projektow předstajeja.
Mnohim znata je starodawna baja „Hadźaca króna“, kotruž běše Jan Hančo-Hano 1882 napisał. Dźensa dopomina na nju před Slepjanskim Serbskim kulturnym centrumom 2,20 metrow wulka skulptura. Ze zdónka wjac hač 300 lět stareho duba bě ju Slepjanski drjeworězbar Thomas Schwarz zhotowił. Wona ma być dźěl projekta „Serbska bajowa šćežka“. Domowinska župa „Jakub Lorenc-Zalěski“ je jón za lětuše sakske wubědźowanje „Čiń sobu!“ zapodała. W rubrice srjedźne projekty słušeše projekt k dobyćerjam a dósta 10 000 eurow.
Krótkopowěsće (16.09.20)
Za kandidatow so wuprajili
Budyšin. Roland Ermer měł klětu znowa za wólby zwjazkoweho sejma kandidować, Udo Wićaz lěto pozdźišo k wólbam Budyskeho krajneho rady. Za wobě personaliji je so předsydstwo Budyskeho wokrjesneho zwjazka CDU na swojim wčerawšim posedźenju wuprajiło, kaž strona wozjewi. Zaměr za wólby zwjazkoweho sejma je, lěta 2017 na AfD zhubjeny wólbny wokrjes wróćo zdobyć.
Hilse nominowany
Łaz. Zapósłanc zwjazkoweho sejma za wólbny wokrjes Budyšin I Karsten Hilse chce klětu znowa jako direktny kandidat strony AfD nastupić. To připowědźi wón tele dny na swojej facebookowej stronje a wozjewi swoju nominaciju. Z 33,2 procentomaj hłosow wolerjow bu wón před třomi lětami jako direktny kandidat do zwjazkoweho sejma woleny. To je tež klětu zaso jeho zaměr.
Baziliku zawru
Policija (15.09.20)
Wopita do murje zrazyła
Mužakow. W Mužakowje je njedźelu wječor pjana wodźerka awta (bjez znamješka) na Hasy Clary Zetkin do murje zrazyła. 40lětna měješe tři promile alkohola w kreji. Wěcna škoda wučinja něhdźe 31 000 eurow.
Semester zahajeny
Wojerecy (SN). Na Wojerowskej ludowej uniwersiće su nowy semester ze zajimawymi kursami zahajili. Wosebje woblubowane je tuchwilu nimo nawuknjenja wšelakich rěčow tema zdźědźenske prawo a kak testament pisać. Mnozy wuměnkarjo so za zakładnu wědu wobchadźenja z kompjuterom zajimuja, a fitnesowe kursy su dale jara požadane. Aktualne programowe zešiwki dóstanjeće mjez druhim w bibliotece Brigitty Reimann, we Łužiskim centeru, při kasy zwěrjenca a wězo na ludowej uniwersiće.
Kupjel zaso přistupna
Budyšin (SN). Pod krutymi postajenjemi hygieny korony dla je Budyska Röhrscheidtowa kupjel zaso přistupna. Tež šulerske płuwanje je zaso móžne. Ličba wopytowarjow w kupjeli je za zjawne płuwanje na 124 wobmjezowana. Hač k předrasćernjam je škitny nahubnik trěbny. Parna komora wostanje zawrjena.
Komora wotewrjena
Chcedźa so rady z hladarjom stać
Wojerowski klinikum łužiskeje jězoriny tuchwilu 32 młodostnych na hladarjow a hladarkow wukubłuje. Po třoch lětach intensiwneho wuknjenja su w awgusće hižo 14 młodych žonow a dwaj mužej swoje wukubłanje zakónčili.
Wojerecy (SN/mwe). Wulke wužadanje běše za lětuši wukubłanski lětnik Wojerowskeje chorownje wězo koronapandemija. Nimo wobmjezowanjow we wobłuku wučby mějachu wučomnicy hladanskeje słužby tež poćežowanja w praksy znjesć. Tak dyrbješe woblubowana šulerska stacija wupadnyć. Najebać to móžachu sej wšitcy wobšěrnu praktisku wědu přiswojić. Dwaj šulerjej absolwowaštaj we wobłuku programa ERASMUS praktiski dźěl w Awstriskej. Pjatnaće hladarjow chorych je z jězorinowej kliniku dźěłowe zrěčenje wotzamknyło, tak zo móža swoje powołanske žiwjenje w domiznje započeć. Zakónčenje jako hladar z eksamenom pak je we Wojerowskej chorowni a na tamnišej hladanskej šuli jenož hišće za přeběhaj móžne, w kotrymajž su 1. septembra wukubłanje zahajili.
Šulerjo chcedźa so gratu přimać
Budyšin (SN/mwe). We wosebitych časach měli sej něšto wosebite wumyslić. To płaći tež za wjelelětnu a mjez šulerjemi woblubowanu pomocnu akciju „genialnje-socialnje“. Prawidłownje běchu so na njej minjene lěta tež holcy a hólcy Budyskeho Serbskeho gymnazija, Wojerowskeho křesćanskeho gymnazija Johanneum a Kulowskeje Wyšeje šule „Korla Awgust Kocor“ wobdźěleli. Tak bě kóžde lěto jedyn dźeń w juliju město wučby za dźěło rezerwowany. Hač pola pjekarja, w chorowni, w někajkej firmje abo instituciji – šulerjo wyšich lětnikow wukonjachu wšelake dźěła, kotrež jim zawod pjenježnje wotpowědnje zaruna. Runje te pjenjezy pak darichu potrěbnym swěta kaž tež doma. Tak hodźachu so wšelake projekty přewjesć.
