Policija (18.12.20)
Znowa w cyrkwi kradnyli
Pančicy-Kukow. Z třomi mužemi, kotřiž běchu wutoru w Róžeńčanskej cyrkwi křiž, klinkački a škličku pokradnyli, dyrbješe so policija předwčerawšim znowa zaběrać. Po tym zo běchu zastojnicy sakralne wěcy wutoru do Róžanta wróćili, je skućićeljo na samsnym městnje nazajtra znowa spakosćichu. Policija lepi jich z rubiznu w klóštrje Marijinej hwězdźe w Pančicach-Kukowje. Paduchow dowjezechu na Kamjenski policajski rewěr, dweju z nich po lěkarskim přepytowanju do chorownje.
Po 30 lětach rozžohnowany
Stefan Rjeda zastojnstwo w Pančičansko-Kukowskej gmejnskej radźe złožił
Pančicy-Kukow (SN/MWj). Posedźenja gmejnskeje rady Pančicy-Kukow drje su runja podobnym gremijam zwjetša wěcowne a racionalne. Wčerawše poslednje w lěće 2020 pak měješe přiwšěm emocionalny wukónc. Za zwonkastejacych překwapjace bě, zo je wjesnjanosta Markus Kreuz (CDU) wjelelětneho gmejnskeho radźićela Stefana Rjedu (Serbske wolerske zjednoćenstwo) na jeho próstwu ze zastojnstwa rozžohnował. Kukowčan je něhdźe 30 lět PančičanskoKukowskej gmejnskej radźe přisłušał a so stajnje z wulkim angažementom za naležnosće wobydlerjow zasadźał. „Wón bě stajnje spušćomny a sej swojeje zamołwitosće wědomy“, wuzběhny Markus Kreuz a přepoda Stefanej Rjedźe swěčkowy wobłuk z motiwom klóštra Marijineje hwězdy jako symboliski dźak.
Dźěłaja na hranicy móžneho
Mjenje dochodow pandemije dla
Poslednje dny stareho a prěnje dny noweho lěta su na mnohich městnach składnosć, na dźěło zašłych měsacow zhladować. Serbske Nowiny rozhladuja so po dwurěčnych komunach, što su tam zdokonjeli.
Kulow (AK/SN). Najebać koronapandemiju móžeše město Kulow lětsa swoje planowane naprawy zwoprawdźić, kaž měšćanosta Markus Posch (CDU) w swojim zhladowanju 2020 podšmórnje. „Wažne najprjedy raz bě, zo smy nowu pěstowarnju w Kulowje dotwarili a za wužiwanje přepodali. Dale smy saněrowanje Krabatoweje zakładneje šule dokónčili“, sćehnje Posch prěnju bilancu. W zakładnej kaž tež we wyšej šuli „Korla Awgust Kocor“ je město do digitalneje infrastruktury inwestowało. Klětu chcedźa hišće kónčne nastroje kaž tablety, laptopy a digitalne tafle wobstarać. Wonkownje najwočiwidniše je nowowuhotowane Kulowske torhošćo.
Na dobro wšitkich
Zwěsćeja wjele zrozumjenja za škitne naprawy
Zhorjelc (SN/JaW). Přezcyłnje policija we wokrjesomaj Budyšin a Zhorjelc kontroluje, hač so wobydlerjo po postajenjach wo škiće před koronawirusom maja. To wobkrući na naprašowanje medijowy rěčnik Zhorjelskeje policajskeje direkcije Kai Siebenäuger. „Kolegojo a koleginy dźiwaja při tym na komunikaciju, wabja wo akceptancu za naprawy a sensibilizuja ludźi za płaćiwe prawidła. Hakle w druhej kročeli wuprajeja chłostanja.“ Přiwšěm zastojnicy zwěsćeja, zo so wjetšina po postajenjach ma.
W serbskich a dwurěčnych gmejnach a městach su wot spočatka decembra wjac hač 120 přeńdźenjow přećiwo škitnym naprawam koronawirusa dla zwěsćili. Najwjace z nimale sto bě jich we Wojerecach, w Rakecach wjac hač dźesać, w Njeswačidle nimale dwaceći a w Ralbičansko-Róžeńčanskej gmejnje znajmjeńša jedyn pad. „Detaile njemóžemy podać. W dalšich dwurěčnych gmejnach njejsmy dotal žane přeńdźenja zwěsćili. To pak awtomatisce njerěka, zo so wšitcy wobydlerjo po přepisach maja, ale zo dotal ničo zwěsćili njejsmy“, Kai Siebenäuger rozłoži.
Krótkopowěsće (18.12.20)
Sakska da Serbam wjace pjenjez
Drježdźany. Naćisk za dwójny etat Swobodneho stata Sakskeje 2021/2022 je financne ministerstwo wčera krajnemu sejmej přepodało. Přisłušne ministerstwo za wědomosć, kulturu a turizm planuje za financowanje Załožby za serbski lud dohromady 7,972 milionow eurow. Předwidźana cyłkowna suma je 1,761 mio. eurow wyša hač lětuša.
Pjećina padow w hladarnjach
Budyšin. 352 nowych natyknjenjow z koronawirusom su wčera w Budyskim wokrjesu zwěsćili. Kaž krajnoradny zarjad zdźěli, registrowachu něhdźe pjećinu aktualnych padow w hladarnjach abo zarjadnišćach za ludźi ze zbrašenjemi. Z 3 429 schorjenych (+288) lěkuja 201 (+6) w klinice. Wokrjes Zhorjelc je wčera 249 nowoinfekcijow a 14 smjertnych padow wozjewił.
Nowostka online přistupna
Maja nětko nowe nadróžne tafle
W Róžeńčanskej cyrkwi sakralne wěcy kradnyli
Rakecy/Róžant (SN/MWj). Chrobły taksijowy šofer je předwčerawšim štyrjoch podhladnych paduchow na Budyski policajski rewěr dowjezł, dokelž nochcychu woni zličbowanku za taksijowu jězbu zapłaćić. Nimo toho běchu do toho wjacore delikty skućili, z kotrymiž so nětko zastojnicy zaběraja.
Štyrjo mužojo w starobje 25 do 45 lět dachu so najprjedy z taksijom k Rakečanskemu gmejnskemu zarjadnistwu šoferować. Po informacijach policije dźěše 39lětny do twarjenja, hdźež je jednomu ze sobudźěłaćerjow z wulkim klučom hrozył. Gmejnski přistajeny cuzemu kazaše dom wopušćić, štož pak bě jemu smorže. Hakle jako běchu přiwołani zastojnicy z Wojerowskeho policajskeho rewěra na městnje, wón zarjadnistwo wopušći. W tym padźe přepytuja nětko mylenja domjaceho měra dla.
Nimale wšitcy w karantenje
Radwor (SN/MkWj). Aktualna koronakriza z wulkimi ličbami nowonatyknjenjow tež zarjadnistwa njepřelutuje. To dyrbjachu radźićeljo gmejny Radwor na swojim wčerawšim posedźenju w „Slaviji“ nazhonić: Dokelž su z wuwzaćom jeničkeje sobudźěłaćerki wšitcy přistajeni gmejnskeho zarjadnistwa w karantenje, je zastupowacy wjesnjanosta Pětr Kliman posedźenje nawjedował. Mjez přistajenymi běchu dwaj padaj koronawirusa zwěsćili. Wjesnjanostka Madeleine Rentsch da zdźělić, zo je w karantenje, zo pak chce doma dale dźěłać.
