Šulerske ličby powołanskošulskich centrumow (BSZ) w Budyskim wokrjesu su minjeny lětdźesatk wo dwě pjećinje woteběrali. W Budyskim BSZ za zežiwjenje a domjace hospodarstwo/hladanje ćěła hižo wot šulskeho lěta 2013/ 2014 minimalnu ličbu 550 šulerjow njedocpěwaja. Wo změnje tudyšeje struktury BSZ chce Budyski wokrjesny sejmik­ 25. měrca rozsudźić.

Budyšin (SN/at). Dobra powěsć je, zo změja přichodnje w Budyšinje, Kamjencu, Wojerecach a Radebergu dale tajke powołanske kubłanišćo. Po diskusijach a njewěstosći loni nazymu pak zda so nětko zaručene być, zo so za Budysku Serbsku fachowu šulu za socialnistwo ničo­ njezměni. Wona ma wobstatk BSZ za hospodarstwo a techniku na Schille­rowych zelenišćach wostać.

Na šulerskej wuměnje

Choćebuz/Oslo. Dwanaće šulerkow a šulerjow 11. lětnika Delnjoserbskeho gymnazija přebywa tuchwilu na wuměnje w Norwegskej. Kaž serbski rozhłós sćelaka RBB rozprawja, přebywaja woni w měsće Lilleström, hdźež maja wot lěta 2017 partnersku šulu. Zestajeć chcedźa mjez druhim brošurki wo kulturnych wosebitosćach krajow. Tež norwegsku stolicu Oslo chcedźa wopytać. Wuměna traje hač do 19. měrca.

Předstawy chětro rozdźělne

Kamjenc. Dźěłarnistwo IG metal wojuje w Kamjenskim zawodźe accumotive wo lěpše dźěłowe wuměnjenja, tak na přikład tež, so tarifowemu zrěčenju metaloweje a elektroindustrije přizamknyć. Za­wčerawšim su so zastupjerjo dźěłarnistwa a zawoda w Kamjencu w druhim jednanskim kole schadźowali. Dokelž běchu předstawy hišće chětro rozdźělne, dorozumichu so na dalši jednanski termin.

Nowy nawoda

Dobrošecy (CS/SN). Dźěłarnja Susanny Hantusch w Dobrošecach pola Malešec njeje jara wulka, a jeje keramikowy wobchod je skerje wobchodźik. Bjez dźiwa, zo stej wobě rumnosći minjenu soboto dopołdnja z ludźimi spěšnje pjelniłoj. Dźeń wotewrjenych hornčernjow je kóžde lěto mnohim zajimcam dobra składnosć, hornčerjam při jich dźěle přihladować a sej tón abo tamny kruch kupić. Toho­dla sej hornčerjo stajnje nowosće wumysleja, nic tak jara nastupajo formy, ćim bóle hladajo na dekory. Susanne Hantusch tuchwilu wulki dźěl swojich sudobjow z motiwami mjetelčkow a z překćětych mlóčow wudebja. To stej runje w času, hdyž ludźo žadosćiwje na nalěćo čakaja, woblubowanej motiwaj.

Pančicy-Kukow. Na rozmołwu wo dźěle serbskeho wječornika přeprošatej Domowinska skupina Pančicy-Kukow a redakcija Serbskich Nowin jutře, štwórtk, 14. měrca, w 19 hodź. do Karstenoweje piwoweje stwički w Pančicach-Kukowje. Šefredaktor a jeho sobudźěłaćerjo rozprawjeja wo swojim wšědnym dźěle, su wćipni na kritiki a wjesela so na pokiwy, što chcyli ludźo rady w našim wječorniku čitać. Nimo skupinarjow su tež dalši zajimcy wutrobnje přeprošeni.

Darmotnje do interneta

Wojerecy. Wobydlerjam a wopytowarjam Wojerec skići město wotnětka móžnosć, přez tak mjenowane hotspoty darmotnje w interneće surfować. Na dohromady dźewjeć městnach we Wojerowskim centrumje kaž tež w přisłušacych wsach su tak mjenowane „Hoyspoty“ k dispoziciji. Krótko do spočatka tu­ristiskeje sezony wobhladuja zamołwići w radnicy to předewšěm jako přidatny poskitk turistam, kotřiž móža so tak na městnje­ wo dowolowych a wólno­časnych móžnosćach wokoło Wojerec informować.