Kandidaća so předstaja
Budyšin. „Waše a naše ideje, zhromadnje za Budyšin!“ rěka hesło wólbneho programa Budyskeje SPD za wólby tudyšeje měšćanskeje rady a wjesnych radow 26. meje. Jutře, 3. apryla, w 17.30 hodź. chcedźa w rumnosćach Dźěłaćerskeho dobroćelstwa (AWO) na Lubijskej dróze 50 w Budyšinje swój program rozłožić. Tam předstaja so tohorunja kandidaća strony za komunalne wólby, mjez nimi Serbja.
„Mały Muk“ na jewišću
Budyšin. Štóž njeje dotal hišće najnowše předstajenje serbskeho dźěćaceho dźiwadła NSLDź „Mały Muk“ widźał, móže to jutře, srjedu, nachwatać. Znatu bajku předstaja w 14 hodź. w Budyskim Dźiwadle na hrodźe.
Na dalšu bjesadu
Drježdźany. Serbja w Drježdźanach su přeprošeni na dalšu serbsku bjesadu. Wona wotměje so zajutřišim, 4. apryla, w 19 hodź. w hosćencu „Altes Wettbüro“ na Antonowej 8. Hosćenc namakaja zajimcy mjez Albertowym naměstom a nowomešćanskim dwórnišćom.
Porěči wo biotopach
Policija (02.04.19)
Firmje tójšto škody načinili
Brězyna. Bližace so nalětnje dźěła w zahrodkach běchu snano přičina, zo su so njeznaći w nocy na minjenu njedźelu do firmy w Brězynje (Brösa) pola Malešec zadobyli. Tam pokradnychu woni wjacore poměrnje drohe motorske piły, motorske kosy a wšelke z akuwom ćěrjene zahrodkarske graty w hódnoće 15 000 eurow. Nimo toho načinichu skućićeljo tójšto dalšeje wěcneje škody, kotruž trochuja na něhdźe 4 000 eurow.
Nowe rumnosće zbrašenym
Pančicy-Kukow (SN/MWj). W bywšim bydlenskim domje na tak mjenowanym Kukowskim dworje so připowědźeja klětu a 2021 wobšěrne twarske dźěła. Klóšter Marijina hwězda móže tam přidatne wučbne rumnosće za swoju spěchowansku šulu wutworić. Dohromady chce klóšter za nje w přichodnymaj lětomaj nimale 700 000 eurow nałožić.
Za projekt je přirjadnica Budyskeho krajneho rady Birgit Weber abatisy Gabrieli Hesse minjeny pjatk spěchowanske přizwolenje přepodała. Srědki pochadźeja z programa „Witalne wjesne srjedźišća“ sakskeho ministerstwa za wobswět a ratarstwo. Tak spěchuje wone 75 procentow twarskich kóštow, potajkim něšto wjace hač 510 000 eurow. Kaž zarjadniski nawoda klóštra Chrystof Mikławšk rozłoži, nastanu w dotal njewužiwanym domje mjez druhim rumnosće za ručne dźěło. Tak so wuměnjenja za šulu jara polěpša.
Ratarske předewzaće so znowa wusměrja
Miłoćicy (JK/SN). Kak móhł přichod Miłočanskeje agrarneje towaršnosće wupadać, je jeje jednaćel Stefan Wawrich njedawno Njebjelčanskim gmejnskim radźićelam na jich posedźenju w Miłoćicach rozłožił. Hospodarskich přičin a pobrachowacych dźěłowych mocow dla předewzaće mlokowu produkciju zastaji a přestanje młody skót plahować.
Wulkan pluwa běły kur
Z nowej atrakciju sezonu w Małowjelkowskim prazwěrjencu zahajili
Mały Wjelkow (SN/MWj). Zo su w Małowjelkowskim prazwěrjencu sawrije widźeć, je jasne. Prjedy pak, hač je tam wuhladaš, zastupiš nětko do krajiny, kajkaž bě před něhdźe 500 milionami lět na našim planeće. Hnydom za wulkim zachodnym twarjenjom we wšěch róžkach bluboce, woda šuska dowysoka, ze zemje so pari a wulkan drje žanu lawu njepluwa, ale běły kur, štož so we wotstawku něhdźe dwaceći mjeńšin z hrimotom připowědźa. To nazhonja wopytowar wot wčerawšeho w dožiwjenskim swěće Lavaris. Z tymle nowym wobłukom su lětušu sezonu w prazwěrjencu zahajili.
Wjeselo z přisłodom
Prěnje zhromadne zwučowanje powětroweje wuchowanskeje słužby DRF ...
Na spočatkia dale hladać
Njebjelčicy (SN/at). Wuspěšne wjesne wuwiće w Njebjelčicach złožuje so na naslědne zasady. Po lětach zaměrneho dźěła chcedźa we wobłuku dalšeje dźěłarnje přichoda, kotraž budźe sobotu w gmejnskim domje, wšelake prašenja dalšeho postupowanja rozjimać, kaž wjesnjanosta Tomaš Čornak (CDU) zdźěli.
We wobłuku prěnjeje dźěłarnje přichoda w lěće 2007 zdźěłachu sej wjesnjenjo zhromadnje z gmejnskej radu prěnje zakłady. Tehdy mějachu konkretnu přičinu, wšako chcyše so gmejna z do přichoda pokazowacym projektom na europskim wubědźowanju wsow wobdźělić.
Zhladujo na wone spočatki zwěsći wjesnjanosta Čornak, zo su „nimo tehdy sformulowanych hódnotow a předstawow mnohe konkretne předewzaća zwoprawdźili“. Na te wašnje je Njebjelčanska gmejna tež nadregionalnje na so skedźbniła a so z přikładom druhim komunam stała. Derje nětko je na wone wuwiće zhladować a so prašeć: Hdźe su korektury trěbne, podpěraja wjesnjenjo dale samsne měnjenje nastupajo žiwjenje na dobro wnučkow w gmejnje?
Krótkopowěsće (02.04.19)
Štyrceći přidatnych městnow
Drježdźany. Wulkeho naprašowanja dla rozšěri sakske ministerstwo za kultus ličbu městnow za „dobrowólne socialne lěto pedagogika“ na šulach wo 40. Tak móže 200 dobrowólnikow w šulskim lěće 2019/2020 přepruwować, hač je wučerstwo jim hodźaca so powołanska perspektiwa. 1 000 sakskich šulow je na dobrowólnikach zajimowanych. Požadać so je hišće hač do 30. apryla móžno.
Wuslědki w syći přistupne
Budyšin. Dokumentacija wuslědkow lońšeho naprašowanja Domowiny je digitalnje přistupna. Zajimcy namakaja ju na internetnej stronje Domowiny w mediatece pod https://www.domowina.de/ fileadmin/Assets/Domowina/Mediathek /Nasa_Domowina/NasaDomowina_2019_01.pdf. Wobdźělnicy 19. hłowneje zhromadźizny Domowiny dóstachu wuslědki w ćišćanej formje.
Wojerowscy šulerjo mytowani
Policija (01.04.19)
Koleso sam přetwarił
Budyšin. Žane přetwarjene awto abo moped, ale technisce změnjene koleso sta so minjeny pjatk w Budyšinje z padom za policiju. Na Stieberowej kontrolowachu zastojnicy kolesowarja, kiž bě bjez swěcy po puću. Při kontroli zwěsćichu, zo bě koleso tak přetwarjene, zo móhło wone bjeze wšeho hač do 50 km/h spěšnje jěć. Mjez druhim je wobsedźer wjacore sylne akuwy do swojeho jězdźidła zatwarił a tohorunja elektriske kable sam składł. Z tymle kolesom njesmědźeše wobsedźer najprjedy raz dale jěć.
