Premjera za kofejownju a taflu
Wjace wopytowarjow hač hewak registruje tuchwilu zežiwjenski a zelowy centrum klóštra Marijineje hwězdy w Pančicach-Kukowje. Wčera wotmě so tam ze zelowej njedźelu prěnje wjetše zarjadowanje w tymle lěće.
Pančicy-Kukow (SN/MWj). Hinak hač zašłe lěta, wopytowarjo wčera hižo wot připołdnja na zelowu njedźelu do klóštra Marijineje hwězdy w Pančicach-Kukowje přichadźachu. Dokelž běchu lětsa zahajenje sezony kaž tež swójbny swjedźeń a z nim přirodowe wiki wupadnyć dyrbjeli, móžeše wjace wikowarjow regionalnych wudźěłkow hač hewak swoje produkty w chłódku Lipja poskićeć. Paleta sahaše wot kołbasy z jehnjaceho a wowčeho mjasa přez drjewjane wudźěłki hač ke keramiskim debjenkam. Wosebje požadane pak běchu wšitke wudźěłki w zwisku ze zelemi, kaž mydła, korjeniny, wolije atd. Dale su wčera robiniju jako štom lěta sadźili. Hewak činja to stajnje k zahajenju sezony. Na jewišću dožiwichu wopytowarjo pisany program.
Tak mjenowany poetryslam bě sobotu wjeršk kulturneho kónca ...
Wićaz chce so stać z krajnym radu
Budyšin (SN). Tukanja minjenych tydźenjow, zo chce prěni přirjadnik krajneho rady Udo Wićaz (CDU) so stać z nowym krajnym radu Budyskeho wokrjesa a tak z naslědnikom Michaela Hariga (CDU), je bywši wjesnjanosta Łaza nětko ze swójskimi słowami wobkrućił. „Haj, chcu so stać z krajnym radu“ cituje dźenik Sächsische Zeitung Wićaza w dźensnišim lokalnym wudaću za Budyšin a Biskopicy.
Přichodne wólby Budyskeho krajneho rady budu w lěće 2022. Mějićel zastojnstwa Michael Harig njewotpohladuje znowa nastupić. Wón bě je wot lěta 2001 w starym Budyskim wokrjesu wukonjał a čini to wot 2008 dale w nowowutworjenym wulkowokrjesu.
Hačrunjež přeje sej Harig Wićaza za swojeho naslědnika w zastojnstwje, dyrbi najprjedy wokrjesny stronski zjězd Budyskeho wokrjesneho zwjazka CDU wo tym rozsudźić, z kotrej kandidatku abo z kotrym kandidatom 2022 k wólbam krajneho rady nastupi. Wotwisnje wot hišće njeznateho termina wólbow móže to na zjězdźe kónc lěta 2021 być abo hižo do toho we wobłuku wosebiteho nominowanskeho wokrjesneho zjězda.
Krótkopowěsće (17.08.20)
W dowolu so natyknyli
Budyšin/Zhorjelc. Porno pjatkej žanu změnu nastupajo koronawirus w Budyskim wokrjesu njezwěsća. Aktualnje štyrjo inficěrowani su wšitcy tak mjenowani dowolowi nawrótnicy. W Zhorjelskim wokrjesu zwyši so ličba natyknjenych wo dalšu wosobu na dohromady 66. Wosom wobydlerjam wukazachu karantenu, tak zo je tuchwilu cyłkownje 200 ludźi izolowanych.
Serbske zynki w Korutanskej
Pliberk. We wobłuku třikrajoweho wuměłskeho projekta „Přechod 03 – Wobrazy krajiny“ wuhotuja w muzeju Wernera Berga w korutanskim Pliberku čitanje a koncert. 21. awgusta zahudźa Walburga Wałdźic, Heidemarja Wiesnerec a Gerold Gnausch kaž tež kwartet modernsax Berlin. Swójsku kaž tež lyriku Kita Lorenca recituja Cvetka Lipuš, Anja Golob a Źilka.
Hosćenc ma wotnajerku
Policija (14.08.20)
Znowa so paliło
Šešow. Lěsny woheń hašeć dyrbjachu wohnjowi wobornicy wčera připołdnju wokoło Rakec. Njedaloko zwjazkoweje dróhi B 96 pola Šešowa je so w lěsu wospjet paliło. Płomjenja rozpřestrěchu so po płoninje něhdźe dweju hektarow. Dokelž nihdźe žanu wodu klumpać njemóžachu, dyrbjachu dalše tankowe jězdźidła alarmować. Hakle 26. julija bě so na samsnym městnje paliło.
Dźěłarnička w starej kupjeli
Zestajeja wustajeńcu
Za dźěłarničku so přizjewić
Hórnikecy. Spěchowanski kruh za serbsku ludowu kulturu přewjedźe wot 18. do 20. septembra molersku dźěłarničku pod hesłom „Duch industrializacije“ w Hórnikečanskej Energijowej fabrice. Wuměłski nawod změje Maja Nagelowa. Myslena je dźěłarnička za nazhonitych wuměłcow runje tak kaž za započatkarjow. Wobdźělenje płaći za młodostnych 15 eurow, za dorosćenych 40 eurow a za čłonow towarstwa 20 eurow. Dalše informacije podawa a přizjewjenja přijimuje projektowa managerka Domowiny Rejzka Krügerowa hač do 20. awgusta pod telefonowym čisłom 03591/ 550 291.
Póńdźe wo rěčne rumy
Hišće dwaj tydźenjej zawrjena
Historisku turbinu zachować
Zajimowe zjednoćenstwo a wjesna rada zasadźatej so za staru stechniku
Běły Chołmc (AK/SN). Wysoka trawa rosće wokoło turbinoweho domu a spušćadło při Małej Sprjewi. Na někotrych městnach so lijawa pušća. Na muri wučitaš lětoličbu 1917–18. Tehdy bě předewzaćel a mějićel knježeho kubła Hugo Stinnes (1870–1924) turbinowy dom při Małej Sprjewi w Běłym Chołmcu natwarić dał. „Wottam su cyłe kubło, pozdźišo tež někotre domy z milinu zastarowali.
Hač do spočatka 1970tych lět je turbina dźěłała“, powěda Thomas Rösler, kiž je wot 2014 čłon wjesneje rady. „Wona je nimale posledni zachowany industrijny pomnik we wsy.“ Njebudźe-li spěšnje jednane, drje krajne zarjadnistwo rěčnych zawěrow (LTV) jako wobsedźer ležownosće twarjenje spotorha.
