Přihotuja šćěpjenski centrum
Wobmjezowanja dale płaćiwe
Drježdźany/Budyšin (SN/JaW). Tuchwilne wobmjezowanja za škit před koronawirusom su tež silwester a nowe lěto płaćiwe. To wobkrućištej nam na naprašowanje Sakske ministerstwo za socialne a towaršnostnu zhromadnosć a Budyski krajnoradny zarjad. Tak smědźa so dale maksimalnje pjeć wosobow z dweju domjacnosćow zetkać. „Dźěći hač do 14 lět k tomu njeliča. Za rjadowanja na městnje rozsudne su płaćiwe postajenja w jednotliwych zwjazkowych krajach“, rěka k tomu na internetnej stronje zwjazkoweho knježerstwa, na kotrež wobě zarjadnišći skedźbnjatej. Dale w postajenju rěka, zo „je na silwesterskim dnju a nowe lěto po wšej Němskej zakazane, so zhromadźować“.
Patoržicu so podźakowałoj
Krótkopowěsće (28.12.20)
Incidenca hód dla woteběrała
Budyšin. Přez hody je ličba na koronawirus schorjenych w Budyskim wokrjesu wot minjeneje srjedy hač do wčerawšeho wo 665 woteběrała. To zwisuje z wobmjezowanymi testami. W samsnej dobje bě 32 smjertnych padow, cyłkownje je to nětko 246. Wčerawša incidenca je 461,37. Zhorjelski wokrjes informuje wo 774 zwěsćenych natyknjenjach wot 23. decembra. Incidenca bě wčera 408,35.
Spěchowanske srědki do Wojerec
Drježdźany/Wojerecy. Wojerowski klinikum łužiskeje jězoriny je tele dny spěchowanske srědki we wobjimje 100 000 eurow dóstał. Pjenjezy podpěruja studiju wuwjedźomnosće za projekt „Virtual Smart Hospital Wojerecy“. Tajki móže wažny twarski kamušk za naslědne strukturne wuwiće za město Wojerecy a za dalewuwiće Łužicy na region wočerstwjenja a strowoty być, rěka ze sakskeho ministerstwa za regionalne wuwiće.
Wuspěšne lěto za twornju Fit
Bjesada po nowym puću
Drježdźany (BD/SN). Korony dla njemóžachu Drježdźanscy Serbja swoje decemberske zetkanje wot wobliča k wobliču přewjesć. Tuž so předwčerawšim digitalnje zhromadźichu, kóždy doma za kompjuterom abo smartfonom. Dźesać stajnych wobdźělnikow a dwaj hosćej z Choćebuza su so na bjesadźe towarstwa Stup dale wobdźělili, rozjimujo swoje naležnosće w maćernej hornjo- a delnjoserbšćinje. Přezjedni sej běchu, zo dyrbjeli serbske institucije, medije a towarstwa hladajo na infekciske połoženje wjace digitalnych poskitkow wuwiwać a je wšitkim Serbam, wosebje dźěćom a młodostnym, z hudźbu a filmom runje tak kaž z literaturu a dźiwadłom poskićić. Drježdźanska bjesada w maćernej rěči chce dale po nowym digitalnym puću kročić. Přichodnu 11. januara tuž znowa online přewjedu.
Zarjadnišća dale začinjene
Policija (23.12.20)
Paduši hnydom dwójce we wsy
Nadźanecy. W běhu něšto dnjow su paduši hnydom dwójce Nadźanecy (Nadelwitz) pola Budyšina „wopytali“. Kaž policija rozprawja, so woni hižo minjeny kónc tydźenja do składa awtowych wobručow zadobychu a dotal njeznatu ličbu kompletnych wobručow rozdźělnych fabrikatow pokradnychu. Kotry wobjim rubizna ma a kelko wěcneje škody je při padustwje nastało, dotal znate njeje. Wčera wječor pobychu cuzy znowa w Nadźanecach a spytachu so tam do kontejnera firmy zadobyć. Při namócnym zachadźenju načinichu skućićeljo něhdźe 2 000 eurow wěcneje škody. Do kontejnera zadobyć pak so jim přiwšěm njeporadźi. Přisłušna kriminalna słužba wobaj padaj přepytuje – mjez druhim tež, hač jedna so wo samsnych kriminelnych ludźi.
Pytaja nowych wobornikow
Sydom planowych městnow we Wojerecach njewobsadźenych
Wojerecy (AK/SN). Za powołansku wohnjowu woboru Wojerecy a za integrowane regionalne wuchowanišćo wuchodna Sakska maja so nuznje njewobsadźene planowe městna wobsadźić. To podšmórny na wčerawšim posedźenju Wojerowskeje měšćanskeje rady Benny Bastisch, kiž je wot nowembra 2019 nawoda fachoweho wobłuka wohnjowa wobora města Wojerecy. Tutomu wobłukej přisłušeja wohnjowa wobora, wuchowanska słužba a wuchowanska centrala. Jednohłósnje měšćanscy radźićeljo wobzamknychu, płaćacy stop wobsadźenja městnow za přichodne lěto cofnyć.
