Zakładny kamjeń za nowe bydlenja
W Safe Clubje čakaja na wotmołwu
Problematiske połoženje Kamjenskeho Safe Cluba njesteješe na dnjowym porjedźe minjeneho posedźenja radźićelow Lessingoweho města. W hodźinje wobydlerskich naprašowanjow pak bě rěč wo tym.
Kamjenc (BG/SN). Hnydom w hodźinje wobydlerskich naprašowanjow běchu čłonojo Kamjenskeje měšćanskeje rady na swojej srjedownej zhromadźiznje z akutnym problemom młodźinskeho dźěła w Lessingowym měsće konfrontowani. Daloko znaty Safe Club je tuchwilu wohnjoškitnych problemow dla zawrjeny. Čłon jeho předsydstwa Daniel Hassert na to skedźbni, zo njeje město dotal na prašenje wotmołwiło, kak měło tam přichodnje dale hić. Tajke wuměnjenja młodźinske dźěło skoro znjemóžnjeja, pod čimž ćerpi motiwacija. Što ma so z atraktiwnym klubom w přichodźe stać, chce měšćanske zarjadnistwo předsydstwu kluba bórze e-mejlnje zdźělić, rjekny Kamjenski wyši měšćanosta Roland Dantz (njestronjan).
Krótkopowěsće (17.07.20)
Wutwar wětrnikow so dliji
Lipsk. Sakska ma so ćežko z wutwarom wětroweje energije. Dohromady su lětsa w prěnim połlěće jeničce pjeć nowych wětrnikow z wukonom 20,7 megawattow přizwolili. To wuchadźa z dotalnych ličbow fachoweje agentury za wětrowu energiju, kotrež powěsćerni dpa předleža. Dźěłać započeli su jeničce tři připrawy z wukonom 8,2 megawattow. Po cyłym Zwjazku bě to w samsnym času 116 wětrnikow z 587 megawattami.
Wulka kulturna strata
Grodk. Město Grodk wobhladuje wotprajeny domizniski swjedźeń koronapandemije a z njej zwisowacych wěstotnych postajenjow dla jako wulku kulturu stratu, kaž dźensa z tamnišeje radnicy rěkaše. Dokelž wot toho potrjecheni partnerojo podawka hospodarsce wosebje ćerpja, je jim kulturny wobłuk měšćanskeho zarjadnistwa hižo poskitk za domizniski swjedźeń 2021 sposrědkował.
Posledni sněh wottał
Policija (16.07.20)
Awće do so zrazyłoj
Biskopicy. Na Budyskej dróze w Biskopicach je wčera wječor k njezbožu dóšło. Jeho přičiny dotal jasne njejsu. W 22.15 hodź. běštej Opel a Audi do so zrazyłoj. Při tym so po prěnich informacijach tři wosoby zranichu. Jedneho znjezboženeho z Opela dyrbjachu do chorownje dowjezć. Wohnjowi wobornicy z Biskopic wotstronichu wuběžane ćěriwo z wobeju awtow a rumowachu po jězdni rozbrojene dźěle. Policija njezbožo nětko přepytuje.
Dalše njeplanowane wudawki
Rakecy (JK/SN). Znowa měješe Rakečanska gmejnska rada wo přidatnych wudawkach, kotrež njejsu w lětušim hospodarskim planje wobkedźbowane, wuradźować. Na poslednim posedźenju do lětnjeje přestawki dźěše wo žadanje towaršnosće za wobhospodarjenje ležownosćow a imobilijow (BVVG). Žadanje saha hač do lěta 1994, jako bě gmejna ležownosć kupiła z wotpohladom, twarić tam jednoswójbne domy. To pak so njeporadźi a tak wosta ležownosć njewobtwarjena. Nětko je so BVVG přizjewiła, žadajo sej wot komuny, mjenowane zrěčenje z lěta 1994 zwoprawdźić a za ležownosć tehdy dojednanu płaćiznu zapłaćić. Gmejna da drje so hnydom juristisce poradźować, hač njeda so na płaćiznje dobrych 45 000 eurow něšto změnić, abo scyła žadanju znapřećiwić. Prawiznik pak radźeše so skorženja wzdać a měnješe, zo bychu wudawki za juristiske postupowanje wo wjele wjetše byli hač žadana suma. Tež znapřećiwjenje njebu přiwzate, a tak zbywa gmejnje jenički wupuć: płaćić. To wšak wšitkim radźićelam njesłodźeše, znowa do gmejnskeje kasy sahnyć a tak staru naležnosć zrjadować.
Ze zahoritosću sobu zapřimnyli
Towarstwo je njepowalny stołp
Nimo wulkich nadregionalnych serbskich towarstwow, kotrež su často w medijach prezentne, mamy w dwurěčnej kónčinje njeličomne mjeńše a małe towarstwa, kotrež runje tak pilne dźěło wukonjeja, wo nich pak přewjele njezhoniš. W swojej lětnjej seriji lětsa tajke aktiwne cyłki předstajamy, dźensa Towarstwo kapałki Marije maćerje Božeje Worklecy (4).
Hakle štyri lěta wobsteji we Worklecach Towarstwo kapałki Marije maćerje Božeje. Zo bě spomóžne, na dobro wěriwych z Worklec a wokoliny skutkowace towarstwo załožić, za to dyrbimy 82 lět wróćo zhladować. Katolski Posoł da nam 9. julija 1938 w rozprawje wotmołwu: „30. junija wopušćichu sotry z rjadu swjateho Korle Boromejskeho, kiž běchu wot lěta 1900 w našej chorowni pospochi skutkowałe, našu domiznu ... Nětko je šěsć sotrow z rjadu Božeje předwidźiwosće z Münstera přišło.“
Masowy row wotkryty
Při twarskich dźěłach na ležownosći skelety našli
Bukecy (jš/SN). Njewšědna namakanka je Lothara a Gabrielu Kurtzec z Bukec minjene dny zaběrała. Mandźelskaj běštaj sej pódla domskeho dalšu ležownosć kupiłoj, hdźež chcetaj sej za starobu dalši mjeńši dom natwarić. Srjedu tydźenja su tam dźěłaćerjo z bagrom ryć započeli a storčichu při tym na skelety. „Najprjedy widźachmy jeničce jednotliwe kosće. Nadobo pak běchu to tež nop a dalše dźěle skeleta“, powěda wobsedźerka ležownosće Gabriele Kurtze, „tak smy hnydom policiju zazwonili.“ Zastojnicy su sej namakanku dokładnje wobhladali a pruwowali, hač ma kriminalistiski pozadk. To pak spěšnje negowachu a přepodachu naležnosć forensikarjam za dalše slědźenje. Hač do póndźele tohole tydźenja je tam nětko team technikarjow za čłowječimi powostankami a dalšimi namakankami rył. Jeničce we hłubokosći poł metra nańdźechu dohromady 34 skeletow. Přepytowarjo krajneho zarjada za archeologiju Sakskeje wužiwachu za wurywanje wosebite graty.
Lipy na Paulijowej chcedźa zachować
Zjawny list z 963 podpismami, zo by so lipowa aleja na Paulijowej zachowała, su tamniši wobydlerjo wyšemu měšćanosće Alexanderej Ahrensej (SPD) w hodźinje za wobydlerske naprašowanja wčera na posedźenju Budyskeje měšćanskeje rady přepodali.
Budyšin (CS/SN). Wjacori zastupjerjo wobydlerskeje iniciatiwy Paulijowa su so na wčerawšim posedźenju měšćanskeje rady jara emocionalnje słowa jimali. Woni přezjedni njejsu z tuchwilnym planowanjom za twarske naprawy na Paulijowej. Wjetšina štomow ma so zhubić, byrnjež jako narunanje 120 nowych štomow nasadźeć chcyli. W měsće, hdźež je kóždźički štom wažny, njesměli w dźensnišim času twarsku swobodu njesmilnje přesadźić. Marco Kosak rjekny, zo njeby scyła tajkich planowanjow być směło, kotrež předwidźa štomy podrězać.
Krótkopowěsće (16.07.20)
Wo prawicarstwje debatowali
Drježdźany. Sakski krajny sejm je na swojim dźensnišim poslednim posedźenju do lětnjeje přestawki tež wo prawicarskim ekstremizmje diskutował. Temu běchu na próstwu CDU, SPD a Zelenych na dnjowy porjad stajili. Knježerstwo je namołwjene, hač do kónca lěta cyłkowny koncept přećiwo prawicarskemu ekstremizmej w kraju zdźěłać.
Z komisariskim prezidentom
Berlin. Koncern Bombardier Transportation je dźensa wozjewił, zo skutkuje Marco Michel wotnětka komisarisce jako prezident regiona srjedźa, wuchodna Europa a Israel. Wón naslěduje Michaela Fohrera, kiž je Bombardier Transportation z wosobinskich přičin wopušćił. Hišće kónc junija bě Fohrer ze sakskim knježerstwom wo stejnišćomaj Bombardier w Budyšinje a Zhorjelcu rěčał.
Projekty za jězorinu zapodać
