Krótkopowěsće (24.01.20)
Měšćanske dwórnišćo přepodate
Budyšin. Modernizowane Budyske dwórnišćo staj inwestoraj Jörg Drews a Gerald Lucas w přitomnosći zastupjerjow krajneho zjawneho žiwjenja dźensa swjatočnje přepodałoj. Zaměstnjene su tam nowa wotnožka krajnoradneho zarjada ze socialnym a młodźinskim zarjadom, kofejownja, předawarnja jězdźenkow, wobchadny zwjazk ZVON a chorobna kasa Barmer. Ludnosć bě popołdnju na wotewrjenje přeprošena.
Gudrun Pausewang njeboh
Bamberg. Awtorka knihi „Die Wolke“ Gudrun Pausewang je wčera 91lětna zemrěła. W romanje „Mróčel“ (1987) wopisuje wona dóńt młodostneje po atomowej katastrofje w němskej milinarni. Pausewang je wjace hač 90 knihow wozjewiła a bu w 2017 z Němskim mytom za młodźinsku literaturu za swój žiwjenski skutk wuznamjenjena.
Srědki za Lessingowy gymnazij
Moped ze Sprjewje wućahnyli
Policija (23.01.20)
Dźěłodawar jastwu zadźěwał
Hórnikecy. Zo njeje předwčerawšim, wutoru, do jastwa dyrbjał, ma so 44lětny muž w Hórnikecach swojemu dźěłodawarjej dźakować. Dokelž njebě wón nabrěmjenjenu pokutu zapłaćił, předležeše nětko wukaz zajeća, čehoždla policisća při jeho bydlenju klinkachu. Muž njeměješe štyricyfrowu sumu k rukomaj a zastojnicy jeho tuž sobu na rewěr wzachu. Tam zazwoni wón swojeho dźěłodawarja, kiž bě zwólniwy sumu sudniskej kasy přepokazać. Tale pomoc 44lětnemu jastwo zalutowa, a wón smědźeše rewěr jako swobodny muž wopušćić.
Holcu zranił a dale jěł
Na psyčej łuce najprjedy rumować
Tójšto sej předewzali
Gmejna Rakecy hižo nětko hospodarski plan schwaliła
Rakecy (JK/SN). Po prěnim rozjimanju naćiska lětušeho hospodarskeho plana loni w nowembru běchu naćisk w decembru na Rakečanskej gmejnje wupołožili. Dokelž njejsu žane namjety k změnje abo dodawki dóšli, móžachu radźićeljo na swojim wčerawšim posedźenju wustawki za lětuši plan schwalić. Do toho předčita wjesnjanosta Swen Nowotny (CDU) zaměr a wobsah plana a nawodnica financneho zarjada gmejny Franziska Pfeiffer přednjese přitomnym róžkowe daty naćiska.
Znowa projekt přećiwo zabyću
Wojerecy (SN/MiR). Projekt „Přećiwo zabyću“ we Wojerecach je wunošny. Předewšěm młodostni rozestajeja so z časom nacionalsocializma a dźensnišimi zjawami prawicarskeho ekstremizma. Při tym ze zarjadnišćemi, ke kotrymž słušeja regionalne dźěłanišćo za kubłanje, demokratiju a perspektiwy žiwjenja z.t. (RAA), zjednoćenstwo přesćěhanych nacionalsocializma (VVN–BdA), město Wojerecy, hród a měšćanski muzej kaž tež Załožba Móst, wusko hromadźe dźěłaja. Zarjadowanja su mjez druhim čitanja a zetkanja z časowymi swědkami a potomnikami tych ludźi, kotřiž běchu w koncentraciskich lěhwach abo druhdźe ćerpjeli.
Někotre wobdźělene projektowe šule poskitk hižo wospjet wužiwaja, zo bychu sej wědu we wobłuku wučby stawiznow a towaršnowědy přiswojili. Wčera wotměchu tradicionalne přijeće časowych swědkow a podpěraćelow na Wojerowskim hrodźe. W Domje Martina Luthera Kinga wopominaja 27. januara wopory holocausta a połoža wěncy w čestnym parku.
Radworska zakładna šula je dźensa dopołdnja dźědow a wowki ...
Z tójšto nowymi wobličemi
Dźěłowy kruh za serbske naležnosće města skonstituowany
Budyšin (SN/at). Z dospołnje nowymi wobličemi ze stron měšćanskich radźićelow je dźěłowy kruh za serbske naležnosće města Budyšina we wólbnej periodźe 2019–2024 wčera dźěłać započał. Na konstituowacym posedźenju, kotrež spočatnje Budyski měšćanosta dr. Robert Böhmer (njestronjan) nawjedowaše, su přitomni štyrjo radźićeljo a třo wěcywustojni wobydlerjo rěčnika/rěčnicu gremija a jeho/jeje zastupjerja wuzwolili. W dotalnym skutkowanju dźěłoweho kruha je so jako spomóžne wopokazało, zo čłon měšćanskeje rady zastojnstwo rěčnika wukonja. Tale wosoba ma direktniši přistup k wšěm informacijam a k zarjadnistwu.
Krótkopowěsće (23.01.20)
Jury so skonstituowała
Drježdźany. Nowopowołana jury za Myto za serbsku rěč – Zejlerjowe myto je so wčera w Drježdźanach skonstituowała. Rada za serbske naležnosće, Zwjazk Łužiskich Serbow Domowina, Serbski institut, Budyski a Zhorjelski wokrjes, gmejny serbskeho sydlenskeho ruma a sakske ministerstwo za wědomosć, kulturu a turizm běchu za nju stajnje po jednym čłonu namjetowali.
Lessingowe akcenty zahajene
Kamjenc. Na wčerawšich narodninach Gottholda Ephraima Lessinga su w Kamjencu Lessingowe akcenty z čitanjom žurnalista Alexandera Osanga z Berlina zahajili. Tamniši Lessingowy muzej poskići hač do spočatka měrca dwanaće zarjadowanjow w tym wobłuku. Kóžde lěto wotměnjeja so wjetše Lessingowe dny a mjeńše Lessingowe akcenty.
Předadźa lěsy w Němskej?
Aš. Najzapadniše čěske město Aš wobsedźi historisce tež něhdźe 20 hektarow lěsow na němskej stronje mjezy. Dokelž je tak ćežko je wobhospodarjeć, chcyli tamniši zamołwići lěsy předać. Tale mysl złožuje so zdobom na fakt, zo su ležownostne płaćizny w Němskej wyše hač w Čěskej republice.
„Serbski kofej“ na druhich městnach dale wjesć
Prěni tak mjenowany Serbski kofej wotmě so minjenu njedźelu popołdnju w Malešanskim hosćencu „Wódny muž“. Na nim wobdźěli so wjace hač třiceći ludźi. Hosćo přichwatachu z regiona wokoło Malešec, Barta, Hućiny, Kubšic a Klukša. Po tym zo bě jich motiwator za serbsku rěč a kulturu Budyskeje Domowniskeje župy w Malešecach a wokolinje powitał, dachu sej přitomni tykanc a kofej kaž tež pomazki a čaj zesłodźeć. Wo rjane wuhotowanje hosćenca běchu so někotre młode swójby z Malešec a Hućiny postarali. Wone so jara za serbstwo horja a nětko serbsku rěč wuknu.
Ćělnje posylnjeni sej wopytowarjo popołdnja hromadźe zaspěwachu. Při tym je jich akordeonist, kotrehož bě organizator zarjadowanja skazał, přewodźał. Zetkanje traješe hač do wječora. Na kóncu běchu sej wšitcy přezjedni, zo měli Serbski kofej wospjetować.
Přichodne tajke zarjadowanje pak njebudźe w Malešecach, ale ma so po woli přitomnych hosći druhdźe wotměć. Móžne přichodne wsy, hdźež móhli je přewjesć, su na přikład Bart, Bošecy, Krakecy abo Poršicy. Termin za přichodny Serbski kofej hišće wěsty njeje.
Lucian Kaulfürst
