Krótkopowěsće (20.01.20)
Nowy předsyda
Róžant. Zwjazk CDU gmejny Ralbicy-Róžant ma nowe předsydstwo. Pjatk su w Róžeńće Eduarda Luhmanna za předsydu wuzwolili. Wón naslěduje Tila Žura. Za naměstnika wuzwolichu Dawida Statnika, pokładnica je dale Halena Jancyna, nowy zamołwity za čłonow je Tilo Žur. Za najwažniši nadawk w gmejnje nowy předsyda ma, zwoprawdźić nowotwar Ralbičanskeje pěstowarnje.
Přebywanišćo wuznamjenili
Huska. Kubło Sommereichen w Husce je najwoblubowaniši dowolowy statok Sakskeje. Wotpowědny pječat dósta mějićelka přebywanišća w Budyskim wokrjesu Erika Busch sobotu na Zelenym tydźenju w Berlinje. Wuznamjenjenje spožča nakładnistwo znateho časopisa LandLust, kotrež kóžde lěto za dowolowymi statokami a wosebitymi kwartěrami we wjesnych kónčinach pyta.
Do šule hakle w dźewjećich?
Šula wotewrje swoje durje
Kulow. Wyša šula „Korla Awgust Kocor“ Kulow přeproša jutře, 18. januara, na dźeń wotewrjenych duri. Hižo w 10 hodź. witaja zajimowanych staršich a jich dźěći w ćěłozwučowarni, hdźež předstaja so mjez druhim chór, skupina šule ze sportowymi aktiwitami a šulska póstniska garda. Přitomni budu tež lětuši šulski princowski por a rejwanska skupina. Potom je přiležnosć so po šuli a fachowych kabinetach rozhladować a so z wučerjemi a šulerjemi rozmołwjeć. Změja tež tykancowy bazar. Wosebje witani su zajimcy za wučbu serbšćiny.
Koncert z hudźbu Chopina
Smochćicy. Dom biskopa Bena w Smochćicach přeproša dźensa w 19.30 hodź. na koncert. We wobłuku Smochčanskeho jewišća zaklinča kompozicije za klawěr a spěwy z pjera Fryderyka Chopina (1818–1849). Solistce wječora stej Birgit Polter na klawěrje a sopranistka Katharina Scheliga. Wuměłči dopominatej z programom „Spěw Fryderyka Chopina“ na najsławnišeho pólskeho komponista. W srjedźišću koncerta steji mjez druhim jeho w Drježdźanach komponowany walčik As-Dur op. 69 čo. 1.
Unikaty sej kupić
Dobyćerjo hodowneje křižowki SN
Policija (17.01.20)
Rostlinskoškitne srědki kradnyli
Krěpjecy. Ćeže ze škódnikami na rostlinach maja po wšěm zdaću paduši wokoło Krěpjec. Kaž policija wčera zdźěli, běchu so w času wot kónca decembra hač do minjeneje srjedy na arealu tamnišeje agrarneje towaršnosće njeznaći zadobyli. Woni wobškodźichu płót a łamachu so do kontejnera kaž tež do jednoho kamora. Pokradnyli su wšelake rostlinskoškitne srědki w hódnoće pjećcyfroweje sumy pjenjez. Wěcna škoda, kotruž su při tym na ležownosći agrarneje towaršnosće zawostajili, wučinja něhdźe 500 eurow. Kriminalni technikarjo móžachu na městnje njeskutka slědy zawěsćić. Kriminalna policija pad přepytuje.
Pyta wučomnikow
Lětsa wjace ptačkow zličili
Zańdźene dny su po wšej Němskej ptački ličili. Wot 10. do 12. januara běštej tež Němski přirodoškitny zwjazk (NABU) a krajny zwjazk za škit ptačkow z.t. (LBV) k tomu namołwjałoj.
Běła Woda/Budyšin (jrl/SN/MiR). Mjeztym dźesaty króć přewjedźechu po wšej Němskej „hodźinu zymskich ptačkow“. Vivien, Kira, Julian, Melanie, Nele a Tabea kaž tež Carsten Proft su lubowarjo přirody ze zwěrjencoweje šule w Běłej Wodźe. Zańdźenu póndźelu běchu wone na tamnišej staciji młodych slědźerjow přirody a techniki zymske ptački ličili. Pod fachowym nawodom Christiana Schulzy a Christiana Hoffmanna z Němskeho přirodoškitneho zwjazka su swědomiće dźěłali. Z pomocu dalokowida a z wótrym wóčkom su hólcy a holcy po šćežkach a pućikach ducy dokładnje hladali, zo bychu na terenje kubłanišća ptački zwěsćili. Woni zličichu wšitke sykorki, wrobliki a zelene wopuški (Grünfink). Nimo stajnych ptačkow, kotrež we Łužicy přez cyłe lěto přebywaja, su tež ptačkow-hosći wobkedźbowali, kotrež w zymskich měsacach ze zymnišich kónčin sewjerneje a wuchodneje do srjedźneje Europy ćahnu.
Akcija přewšo wuspěšna była
Krabatowy młyn w Čornym Chołmcu dóstanje dalšu atrakciju
Čorny Chołmc (SN/MiR). Wjace hač 10 500 eurow ma nětko dožiwjenski statok Krabatowy młyn w Čornym Chołmcu wjace na swojim konće. Pjenjezy su předwidźane za twar pjecy. Zaměr, nazběrać 9 800 eurow, je z wjele wjetšej sumu wjac hač docpěty. Crowdfunding-akcija bě tuž přewšo wuspěšna. „45 dnjow smy ju přewjedli, ale prěnje dny je jara mało wothłosa měła, tak zo započachmy hižo dwělować“, zwěsća jednaćel Čornochołmčanskeho Krabatoweho młyna Tobias Čižik. „Nawjazach tuž zwisk k wjace hač połsta předewzaćam z próstwu wo sponsoring, narěčach znatych a wabjach w socialnych medijach.“ Spočatk noweho lěta su podpěraćeljo potom pjenjezy přepokazali, a to sumy mjez pjeć a wjace hač tysac eurami. Zdźěla dochadźachu na dźeń wjacore sta eurow. Ideja za wosebitu pječernju je w zjawnosći wulku sympatiju wuwabiła, tež dokelž su medije informacije šěrili. Ludźo su mjeztym zajimowani a ju ze swójskimi myslemi ze žiwjenjom pjelnja. Wčera bu crowdfunding-akcija zakónčena.
Nowe puće za stary Choćebuz
Wobwliwowanje njedosaha
Budyšin (SN/at). Ze Serbskim wuběrkom respektiwnje nowej přiradu chcedźa w Budyskim krajnoradnym zarjedźe přichodnje skutkownišo wustupować. To sformulowachu čłonojo noweho dźěłoweho kruha za serbske naležnosće Budyskeho wokrjesa na swojim konstituowacym posedźenju wčera w Budyšinje. Kaž społnomócnjena wokrjesa Regina Krawcowa zdźěli, běchu sej čłonojo přezjedni, zo staw nětčišeho wobwliwowanja serbskich naležnosćow bjezposrědnje do krajnoradneho zarjada njedosaha.
Gremijej přisłuša sydom wokrjesnych radźićelow. Za frakciju CDU su to Dawid Statnik, Wincenc Baberška, Swen Nowotny, dr. Robert Böhmer; za Lěwicu Hajko Kozel; za Swobodnych wolerjow Jan Budar a Veit Großmann. Jako wěcywustojni wobydlerjo Sonja Hrjehorjowa, dr. Susanne Hozyna, Bosćij Handrik, Seraphina Pašcyna sobu dźěłaja, za Towarstwo Cyrila a Metoda Hanka Budarjowa kaž tež Mato Krygaŕ za Serbske ewangelske towarstwo. Zwjazk Sakskich městow a gmejnow w serbskim sydlenskim teritoriju zastupuje Njebjelčanski wjesnjanosta Tomaš Čornak (CDU).
Krótkopowěsće (17.01.20)
Za Grimmowe myto nominowany
Marl. Dokumentaciski film Grit Lemke „Gundermann Revier“ je za Myto Adolfa Grimma nominowany. Najwažniše němske telewizne myto spožča mjeztym 56. raz, a to 27. měrca w štyrjoch kategorijach. Hižo 3. měrca chcedźa lawreatow wozjewić. Debitowy film kuratorki sekcije „Heimat – Domownja – Domizna“ na Choćebuskim filmowym festiwalu dr. Grit Lemke bě loni tež tam widźeć.
Zastojnstwje dale wjedźe
Drježdźany. Serbskemu zapósłancej Alojsej Mikławškej (CDU) su na konstituowacym posedźenju noweho etatoweho a financneho wuběrka Sakskeho krajneho sejma znowa zastojnstwo zastupowaceho předsydy dowěrili. Nimo toho přisłuša Worklečan dale peticiskemu wuběrkej, kaž jeho wobydlerski běrow w Kamjencu informuje.
Nowy běrow koordinowanišća
