Zaryw a zakładny kamjeń
Po dołhich přihotach milionowy projekt skónčnje zahajeny
Hamor (CK/SN). Poprawom měješe so prěni zaryw za nowu Hamorsku wodarnju w aprylu wotměć. Kontaktnych wobmjezowanjow dla dyrbješe drje to wupadnyć, přiwšěm su twarić započeli. A tak mějachu minjeny pjatk hnydom dwaj swjatočnej podawkaj: Ministerski prezident Michael Kretschmer a Hamorski wjesnjanosta Achim Junker (wobaj CDU) jako předsyda zaměroweho zwjazka Srjedźna Nysa-Šepc za wopłóčki (WZV) přimaštaj so gratu za prěni zaryw a zamurjowaštaj hnydom na to kasetu z dokumentami, štož stanje so hewak na separatnym połoženju zakładneho kamjenja.
Wjele lět je Michael Kretschmer prócowanja wo zastaranje z pitnej wodu w sewjernym dźělu Zhorjelskeho wokrjesa přewodźał. Wón wuzběhny, z kelko energiju su so wobdźěleni temje wěnowali. „Běła Woda trjeba wodu, dokelž ma město přichod“, wón rjekny.
W Delanach trjebaja nowy traktor
Twar noweje pěstowarnje w Ralbicach tamnišich gmejnskich radźićelow hižo dlěši čas zaběra. Bjez spěchowanja tajki projekt zwoprawdźić njemóža. To pak dotal zrjadowane njeje.
22. króć tradicionalnje w juniju su so čłonojo Gundermannoweje ...
Wodu brać zdźěla zakazane
Wjacore města a wokrjesy we Łužicy na tuchwilnu suchotu reagowali
Zhorjelc/Choćebuz (dpa/SN/JaW). Wjacore města a wokrjesy w Hornjej a Delnjej Łužicy su wukazali, wodu z pomocu klumpow a dalšich nastrojow z wodźiznow hižo nječerpać. Jako přičinu mjenuja „ekstremnu suchotu minjeneju lět“ a „dotal njedosahace spadki. Tohodla wostanje połoženje nastupajo spadki, dnownu a powjerchowu wodu dale chětro napjate“, wozjewi krajnoradny zarjad w Zhorjelcu.
Krótkopowěsće (23.06.20)
Pabst wostanje dalšu dobu
Kamjenica/Budyšin. Na Kamjeničanskim změrcowskim sudnistwje za jewišćo staj so Serbski ludowy ansambl a jeho chórowy direktor Andreas Pabst wčera dojednałoj, zo Pabst dalšu hrajnu dobu hač do julija 2021 swoje dźěło w ansamblu wukonja. Loni w oktobrje njebě SLA zrěčenje z nim podlěšił, na čož Andreas Pabst skoržeše. Wot lěta 2016 je wón chórowy direktor ansambla.
Kostimy nimale financowane
Choćebuz. Za serbski eksperimentalny film móžachu młode wuměłče z Choćebuza 1 300 eurow nazběrać. Kaž Bramborske serbske radijo rozprawja, hodźa so po słowach filmowcow-bywšich šulerjow Delnjoserbskeho gymnazija z toho znajmjeńša kostimy zapłaćić. Wo prašenju „Je so serbskosć skoro zhubiła?“ rozmysluja wuměłče wokoło Nory Wendt a jeje band Concentration.
Pandemija rekonstrukciju haći
Policija (22.06.20)
Ampla skóncowana była
Budyšin. Hdźež hewak stajnje ampla wobchad rjaduje, maja někotři šoferojo z předjězbu problemy, hdyž ampla raz wupadnje. Tajki pad sta so sobotu dopołdnja na Budyskim křižowanišću Mužakowska/Krakečanska při Röhrscheidtowej kupjeli. Jako ampla njefungowaše, stej tam BMW a VW do so zrazyłoj. Jedna wosoba so při tym snadnje zrani.
Benedikt Dyrlich čita
Njebjelčicy. Na knižne předstajenje z awtorom Benediktom Dyrlichom štwórtk, 25. junija, w 19 hodź. w towarstwowej stwě Njebjelčanskeje gmejny přeprošeja Ludowe nakładnistwo Domowina, Domowinska skupina Njebjelčicy a tamniša gmejna. Awtor čita ze swojeje knihi „Doma we wućekach 2“, kotraž je loni nazymu wušła. Z wječorkom Ludowe nakładnistwo Domowina po wobmjezowanjach korony dla swoje knižne předstajenja zaso zahaji. Přiwšěm płaća powšitkowne postajenja hygieny, městna su dodźerženja wotstawkow dla wobmjezowane.
Pytaja žadnostki
Jónkrótne błudźenki při pućiku
Bjedrichecy (AK/SN). Pilne ruki běchu minjeny pjatk na geologiskej wučbnej šćežce při Slěbornym jězoru při dźěle. Z wulkim ćišćom wotpryskachu błudźenki z wodu a je tak porjadnje wurjedźichu. Nimo toho su njerjad zrumowali a předołhe hałzy přitřihali. „Chcemy wučbnu šćežku zachować, dokelž je wona w Europje jónkrótna. Nihdźe druhdźe njeje telko błudźenkow z časa před 400 000 do 320 000 lětami kaž tule“, podšmórny organizator rjedźenskeje akcije Wilfrid Sauer. Wot 1965 hač do 2016 bě wón předsyda wuchodosakskeje wobwodneje skupiny Zjednoćenstwa přećelow mineralogije a geologije. Kóžde lěto jeje čłonojo z dźěłowym zasadźenjom wučbnu šćežku w porjadku dźerža. Na 800 metrach wjedźe wona dźensa wot „Lěsneho hosćenca při Slěbornym jězoru“ přez sydlišćo bungalowow hač k busowemu zastanišću w Bjedrichecach. Tam leži ze 40 tonami najwjetši błudźenk.
Za měsac plany předstaja
Sprjewine město ma so na dowolnikow z caravanami nastajić
Budyšin (CS/SN). Nowy móst za pěškow nad Sprjewju bě jedna z temow njedawneho posedźenja Budyskeje měšćanskeje rady. Kaž wyši měšćanosta Alexander Ahrens (SPD) radźićelam zdźěli, chcedźa na přichodnym posedźenju parlamenta 17. julija w njezjawnym dźělu aktualny staw planowanja předstajić. Po tym přewjedu nowinarsku konferencu, zo bychu tež zjawnosć informowali.
Wyši měšćanosta so nadźija, zo prawje wjele wobydlerjow swoje měnjenje w socialnych syćach abo na internetnej stronje města wozjewi. Ludźo, kotřiž maja wobmyslenja, měli je prošu wozjewić. Jeli so hižo w tejle fazy wobdźělenja wobydlerjow wukopa, zo wjetšina nowotwarej mosta přihłosuje, móhli so ewentuelnje wobydlerskeho rozsuda wzdać. Z próstwu frakcije AfD wo wobydlerskim rozsudźe chcedźa so na posedźenju měšćanskeje rady w septembru zaběrać.
Jitkowsku dróhu ponowja
Komuny sej tuchwilu zawěrno lochko nimaja. Dokelž wotpadnje wulki dźěl dochodow z přemysłoweho dawka, maja wone mjenje w kasy hač minjene lěta. Přiwšěm spytaja to abo tamne inwestować.
Rakecy (JK/SN). Loni su so w Rakečanskej gmejnje z twarskimi a ponowjenskimi naprawami a dalšimi inwesticijemi chětro wróćo dźerželi. Su sej wšitko derje přihotowali, a lětsa so nětko z połnej paru do dźěła dadźa.
