Kulow (AK/SN). K 30. róčnicy zjednoćenja Němskeje přihotujetej město Kulow a tamniši předewzaćelski kruh fotowu wustajeńcu. Pytaja mjez wobydlerjemi zajimawe wobrazy z časa wot lěta 1990 hač do přitomnosće. Wone měli wuwiće města wotbłyšćować, mjez druhim stare napohlady twarjenjow a kak wone dźensa wupadaja, kak su so puće změnili, abo kak stej so rjemjesło a přemysło w Kulowje wuwiłoj. Fota přijimujetej Beate Hufnagel w radnicy a Birgit Bjeńšowa w babyjowym wobchodźe na torhošću. Zapodate wobrazy wobsedźerjam na kóždy pad wróća, rady tež digitalizowane za swójski archiw.

Hórnikecy. Spěchowanski kruh za serbsku ludowu kulturu přewjedźe wot 18. do 20. septembra molersku dźěłarničku pod hesłom „Duch industrializacije“ w Hórnikečanskej Energijowej fabrice. Wuměłski nawod změje Maja Nagelowa. Myslena je dźěłarnička za nazhonitych wuměłcow runje tak kaž za započatkarjow. Wobdźělenje płaći za młodostnych 15 eurow, za dorosćenych 40 eurow a za čłonow towarstwa 20 eurow. Dalše informacije podawa a přizjewjenja přijimuje projektowa managerka Domowiny Rejzka Krügerowa hač do 20. awgusta pod telefonowym čisłom 03591/ 550 291.

Póńdźe wo rěčne rumy

Hač do kónca awgusta wostanje zwjazkowa dróha B 97 mjez Wojerecami a Čornej Pumpu dospołnje zawrjena. Dokelž wjedźe wona po jako sensibelny zastopnjo­wanym nasypje, da LMBV tam přidatne drenažowe elementy zatwarić, zo bychu jězdnju skrućili. Dotal bě tam spěšnosć na 30 km/h wobmjezowana. Hdyž je póda mokra, maja fachowcy za móžne, zo so tam zemja zesuwa. Perspektiwisce chcedźa tónle wotrězk puća tuž nowy twarić. Foto: Gernot Menzel

Zajimowe zjednoćenstwo a wjesna rada zasadźatej so za staru stechniku

Běły Chołmc (AK/SN). Wysoka trawa rosće wokoło turbinoweho domu a spušćadło při Małej Sprjewi. Na někotrych městnach so lijawa pušća. Na muri wučitaš lětoličbu 1917–18. Tehdy bě přede­wzaćel a mějićel knježeho kubła Hugo Stinnes (1870–1924) turbinowy dom při Małej Sprjewi w Běłym Chołmcu natwarić dał. „Wottam su cyłe kubło, pozdźišo tež někotre domy z milinu zastarowali.

Hač do spočatka 1970tych lět je turbina dźěłała“, powěda Thomas Rösler, kiž je wot 2014 čłon wjesneje rady. „Wona je nimale posledni zachowany industrijny pomnik we wsy.“ Njebudźe-li spěšnje jednane, drje krajne zarjadnistwo rěčnych zawěrow (LTV) jako wobsedźer ležownosće twarjenje spotorha.