Z chorobnym awtom přez mjezu
Sejmik wokrjesa Zhorjelc wobłukowy plan hač do lěta 2028 wobzamknył
Zhorjelc (AK/SN). Wokrjes Zhorjelc chce słužbu za nuzowe wuchowanje a za transport pacientow we wjesnych kónčinach polěpšić. To wuchadźa z noworjadowanja wotpowědneho wobłukoweho plana za lěta 2021 do 2028. Z 72 hłosami a jeničkim hłosawzdaćom je jón wokrjesny sejmik wčera wobzamknył.
Plan předwidźi wažne změny. Lěta 2018 wukazane městnosće za wuchowanske straže w Jonsdorfje, Slepom a Rěčicach změja kóžda přidatne wuchowanske jězdźidło, a to wodnjo kaž w nocy. W Habrachćicach chcedźa přidatne jězdźidło dwanaće hodźin přewostajić. We wuchowanskej słužbje na Leschwitzowej w Zhorjelcu změja chorobne awto tohorunja wšědnje 24 hodźin k dispoziciji. Wobłuk zasadźenja wopřijima po potrjebje, wosebje w nócnych hodźinach, cyły wobłuk Zhorjelskeho wokrjesa. „Tak mamy nimale stoprocentowsce zaručene, zo je wšón wokrjes hladajo na nuzowu słužbu zastarany“, podšmórny socialna decernentka Martina Weber we wokrjesnym sejmiku. „Budźe-li trjeba, móžemy system dale rozšěrić.“
Adwentna pycha zdobom napomina
Přidatne srědki tójšto panow dla
Wyše twarske kóšty za nastawace dźěćace dnjowe přebywanišćo na Budyskim Třělnišću su radźićelow wčera na poslednim lětušim posedźenju tudyšeje měšćanskeje rady njesměrnje rozhorili. Wšako zhonichu wo cyłym rjedźe panow a njedostatkow.
Budyšin (CS/SN). Měšćanscy radźićeljo mějachu wotpohlad zarjadnistwa za skandalozny, přewostajić 1,45 milionow eurow přidatnje za nowe dźěćace zarjadnišćo na Budyskim Třělnišću. Dyrbjachu pak so wudawkej podwolić, kotryž bjeru nětko z likwiditneje rezerwy. Wšako běchu sej radźićeljo a zarjadnistwo přezjedni, zo maja twarske dźěła dale hić.
Krótkopowěsće (19.12.19)
Čakaja na wuslědk Zelenych
Drježdźany. Prěnjej sakskej knježerstwje koaliciji CDU, Zwjazka 90/Zelenych a SPD dyrbja jenož hišće Zeleni přihłosować. Wuslědk woprašowanja sobustawow chcyše strona dźensa popołdnju w Drježdźanach wozjewić. Přihłosuje-li Zwjazk 90/Zeleni zastupej do knježerstwa, by to třeća tak mjenowana keniaska koalicija w Němskej była. Sakski krajny sejm chce jutře wot 11 hodź. ministerskeho prezidenta wuzwolić. Hnydom po tym jeho w plenumje spřisahaja.
Prezentuja so hromadźe
Lipsk. Pod hesłom „Common Ground“ (zhromadnosć), chce klětu dźesać krajow juhowuchodneje Europy prěni raz hromadźe swoju literaturu a swojich awtorow na Lipšćanskich knižnych wikach předstajić. Na třilětnym projekće wobdźěla so Albanska, Bosniska-Hercegowina, Bołharska, Kosowo, Chorwatska, Rumunska, Sewjerna Makedonska, Montenegro, Serbiska a Słowjenska.
„Z Lipicy do hole“ zaso na předań
Wandalojo po puću byli
Z hodownej hru znowa připóznaće žnjeli
Z dobrej tradiciju stej w Jaseńcy kóžde lěto w hodowniku dwaj podawkaj: beneficny koncert skupiny PoŠtyrjoch w Rynčec bróžni a adwentnička w kulturnym domje „Bjesada“. Za to su mnohe přihoty trěbne. Najrjeńši dźak zarjadowarjam tuž je, hdyž mnozy – młodźi kaž stari – połni wočakowanja přichwataja. Dźěći wjesela so najbóle na wopyt rumpodicha, starši skerje na nowu hodownu hru.
Při čiłej bjesadźe – w tak wulkej ličbje so Jasčenjo hewak lědma zetkaja –, při dobrym kofeju a słódnym wosušku je so čas tež lětsa spěšnje minył. Dujerjo Njeswačanskeje wosady přitomnych znowa ze swojimi adwentnymi a zymskimi melodijemi zawjeselichu, starajo so wo duchowne a dušine wokřewjenje Jasčanow. Z wutrobnym přikleskom a małym darom so woni hudźbnikam dźakowachu.
Policija (18.12.19)
22lětneho pytaneho zajeli
Wojerecy. Při kontroli na Wojerowskim Łužiskim naměsće móžeše policija z wukazom zajeća pytaneho zajeć. Po tym zo běchu zastojnicy jemu wšitko přednjesli a jeho powučili, pak so 22lětny rozmjerza a je dokument wo zajeću cyle jednorje roztorhał. Na to jeho sputachu. Dokelž pak so muž dale spjećowaše, dyrbješe transport do jastwa dalši policist přewodźeć.
Rubizna mała, wěcna škoda wulka
Kamjenc. Njeznaći su so w Kamjencu do wobchoda zadobyli a tam tresor wuprózdnili. Rubizna wučinja jenož někotre sta eurow, wěcna škoda pak je z něhdźe 5 000 eurami njewšědnje wulka.
Dohodowny čas je čas adwentnych wikow. Tajke mějachu minjenu sobotu ...
Serbšćinu na kóždy pad poskićeć
Wojerowskej měšćanskej radźe su wčera zaměry a wobsahi za přichodnu wyšu šulu předstajili.
Wojerecy (AK/SN). Přichodna centralna wyša šule we Wojerecach ma w nošerstwje města wostać. To je tamniša měšćanska rada wčera z wjetšinu hłosow wobzamknyła. Štyrjo zapósłancy běchu přećiwo tomu, štyrjo dalši so hłosa wzdachu. Gremij sćěhowaše poručenje měšćanskeho zarjadnistwa.
„We wjacorych rozmołwach ze Sakskej natwarnej banku smy zdobom pruwowali, hač njeměł wokrjes Budyšin nošerstwo kubłanišća přewzać“, wuswětli měšćanosta za šule, kulturu a socialne Thomas Delling. Facit bě, zo by spěchowanje chětro komplikowane było. Město njemóže so nad směrnicy spěchowanja stajić. „My jako město inwestujemy. Tohodla měło tež nošerstwo w našich rukach wostać“, měnješe Wojerowski wyši měšćanosta Stefan Skora (CDU). Najwažniši zaměr je, wo kóždeho Wojerowskeho šulerja wojować a jeho na powołanske wukubłanje w rjemjeslniskich a přemysłowych zawodach přihotować, zwurazni Hans-Joachim Donath.
Wjacerěčnosć pěstować(22 a kónc)
Štó a što tči za serbskimi projektami, kotrež buchu we wobłuku wubědźowanja Sakskeho fondsa „Čiń sobu!“ mytowane? W lětušim serialu Serbskich Nowin je předstajamy.
Na Wojerowskej dźěćacej a młodźinskej farmje w nošerstwje Křesćansko-socialneho kubłanskeho skutka (CSB) wjesela so nad mytom Sakskeho fondsa „Čiń sobu!“ w kategoriji „Žiwa dwurěčnosć“.
Woblubowane zarjadnišćo so hižo wjele lět za dźěło z dźěćimi a młodostnymi zasadźa pěstujo harmonisku zhromadnosć. Zrodźili su tam mysličku, na swojim arealu atraktiwitu a wjacerěčnosć hišće bóle spěchować. Na farmje maja rasy wužitneho skotu, kotrež su wot wotemrěća wohrožene. Kak mamy z nimi wobchadźeć, je plahować, zwotkel pochadźeja abo kak su žiwe, to wšo zhonja wopytowarjo z informaciskich taflow, připrawjenych na hródźach a chlěwach – dotal pak jenož w němskej rěči. Z pomocu myta 4 960 eurow to bórze změnja. Nastajić chcedźa tam wosom interaktiwnych přehladnych taflow, na kotrychž móžeš so wo wosom tam zastupjenych rasach po němskej, serbskej, pólskej a jendźelskej rěči wobhonić.
