VVO poskića nowe linije Plusbusa
Budyšin (SN/mwe). Wobchadny zwisk Hornje Łobjo (VVO) připowědźa wot 15. decembra w swojim jězbnym planje za wuchodosaksku železnisku syć mjez Drježdźanami – Zhorjelcom/Žitawu kaž tež na čarje Drježdźany – Kamjenc „wulke změny“. Informacije k tomu dawa krajna železnica Trilex. Nowinski rěčnik VVO Christian Schlemper zdźěli, zo budu mjez Kamjencom a Budyšinom (linija 102) kaž tež mjez Radebergom a Biskopicami (linija 305) nowe tak mjenowane Plusbusy zasadźene.
Wulke starosće pak ma VVO dale z regionalnej železnicu. Na naprašowanje Serbskich Nowin Schlemper wujasni, „zo su tuchwilne wobmjezowanja tež za VVO a noweho wobhospodarjerja, Transdeva pod marku Srjedźoněmskeje regionalneje železnicy (MRB), jara mjerzace. Dźěłamy zhromadnje na rozrisanju njedostatkow. Bytostny problem su falowace kapacity w zamkarnjach a z nimi pobrachowace ćěridne wozy. Wšako njemóže MRB něhdyšu dźěłarnju měšćanskeje železnicy hižo wužiwać.“
Policija (27.11.19)
Šěsć awtow skóncowanych
Budyšin. Wodźer Renaulta bě wčera připołdnju na Budyskej Schliebenowej po puću, je pak z dotal njewujasnjeneje přičiny nalěwo z puća zajěł. Zhubiwši kontrolu nad wodźidłom zrazy wón z wulkim wotmachom do jězdźidła hladanskeje słužby. Te suny so do Peugeota, kotryž prasny na to do před nim stejaceho BMWja. Tón zrazy skónčnje do Seata a VWja. Wěcna škoda je hoberska.
Z garaže koleso pokradnyli
Nowa Wjes. W Nowej Wsy pola Rakec je wobsedźer trekingoweho kolesa hakle wčera rano zwěsćił, zo wone hižo w garaži njesteji. Paduši běchu elektriske wrota wočinili a jězdźidło w hódnoće 1 000 eurow sobu wzali. Z njejasneje přičiny na wrotach žana škoda njenasta.
Skaterojo kołopuć rady wužiwaja
Při Bjerwałdskim jězoru so lětsa nimale 7 200 ludźi wočerstwiło
Hamor (SN/mwe). Byrnjež so lětuša sezona kónc oktobra we łužiskej jězorinje tež při Bjerwałdskim jězoru oficialnje skónčiła, su tam kolesowarjo a wosebje skaterojo dale rady po puću. Kaž Hamorski wjesnjanosta Achim Junker (CDU) na njedawnym posedźenju gmejnskeje rady zwěsći, je jězor mjez domoródnymi kaž tež turistami jara woblubowany. Tak je z čerwjenym „i“ certifikowana turistiska informacija „Bjerwałdski jězor“ wot wotewrjenja wočerstwjenišća lěta 2014 něhdźe 53 000 wopytowarjow registrowała. Mjez dowolnikami a pućowacymi su swójby z cyłeje Němskeje a runje tak ze susodneje Čěskeje a Pólskeje. Mnozy wukrajni hosćo měnja, zo doma w swojej bliskosći tajke wuběrne wuměnjenja za skating kaž při Bjerwałdskim jězoru nimaja. Njezadźiwa tuž, zo přijědu mnozy z nich z campingowymi wozami abo bydlenskimi mobilemi do łužiskeje jězoriny, hdźež znajmjeńša tydźeń přebywaja.
Pěši a z kolesom po zajimawej turje
Hižo před třomi lětami bě wjesnjanosta gmejny Ralbicy-Róžant Hubertus Ryćer (CDU) wobydlerjow na rozmołwu přeprosył, zo bychu wo kolesowanskich a pućowanskich šćežkach po teritoriju gmejny rozmyslowali.
Róžant (aha/SN). Runočasnje měli so tehdy z kruha přitomnych nańć zajimcy, kotřiž bychu so čestnohamtsce z toho wurosćacym nadawkam wěnowali. Te-hdy njebě k doskónčnemu dojednanju dóšło, čehoždla měješe wjesnjanosta za wažne so temje znowa wěnować.
Regina Kurjatowa ze Šunowa bě wčera nawječor Geratej Róblej w ...
Peticiju do planow zapřijmu
Wojerecy (AK/SN). Město Wojerecy chce jara wužiwanu dróhu z wuchodnych Łazowskich stron do města znowa rjadować. Tak budźe wobchadne poćeženje za wobydlerjow w Kinajchće (Kühnicht) čujomnje pomjeńšene. Docpěć chcedźa to z tak mjenowanej „Kinajchtskej sponku“. Kinajchtsku dróhu zdobom cyłotnje saněruja a wutwarja, rěkaše na wčerawšim wuradźowanju Wojerowskeje měšćanskeje rady. Jednohłósnje gremij wobzamkny, peticiju wobydlerjow z lońšeho oktobra přećiwo njepřicpěwajomnej wobchadnej harje na Kinajchtskej dróze do swojich wotwažowanjow a diskusijow zapřijeć.
Inwestuja do přichoda(19)
Štó a što tči za serbskimi projektami, kotrež buchu we wobłuku wubědźowanja Sakskeho fondsa „Čiń sobu!“ mytowane? W serialu Serbskich Nowin je předstajamy.
Mjez cyłkami, kotrež su so wo spěchowanje prócowali, je tež Serbska lajska dźiwadłowa skupina Chrósćicy. Towarstwo chce přizwolenu sumu 1 500 eurow za nowu techniku nałožić. „Připrawy za zwuk a wobswětlenje, kotrež tučasnje wužiwamy, aktualnemu stawej techniki wjace njewotpowěduja. W minjenych lětach dyrbjachmy sej tuž prawidłownje wěcy wupožčeć. Tohodla smy so na wubědźowanju wobdźělili a so nadźijeli, zo dóstanjemy trěbne srědki za narunanje. Nětko so wězo jara wjeselimy, zo móžemy sej nowe nastroje kupić a tak zdobom kwalitu poskićeć, kajkuž su naši přihladowarjo zwučeni. Cyle připódla nam spěchowanje při tym pomha, lajske dźiwadło na wsy zachować a jeho přichod zaručić“, rozłožuje předsyda lajskeje skupiny Tobias Bulank.
Krótkopowěsće (27.11.19)
Nowe towarstwo załožili
Mały Wjelkow. 26 wosobow je minjenu sobotu w Małym Wjelkowje nowe towarstwo „Sotrowni Mały Wjelkow“ załožiło. Ochranowska bratrowska jednota jako mějićelka bě to iniciěrowała. Na iniciatiwu dr. Lubiny Malinkoweje je do wustawkow tež serbski aspekt zapisany. Mnohe Serbowki běchu we 18. lětstotku sotrowni sobu natwarili. Předsydka towarstwa je Katrin Böhme z Małeho Wjelkowa.
Wědomostna rada so schadźuje
Choćebuz/Budyšin. Čłonojo wědomostneje přirady Serbskeho instituta so dźensa a jutře schadźuja. Po wopyće Choćebuskeje wotnožki dźensa rano su so popołdnju z Budyskimi sobudźěłaćerjemi rozmołwjeli. Rozžohnować chcedźa prof. dr. Konrada Köstlina, kiž bě załoženje a dalewuwiće instituta sobu přewodźał, kaž tež nětčišeho předsydu rady prof. dr. Winfrieda Müllera.
Tež we Łužicy demonstruja
Tež serbscy młodostni witani
Budyšin (SN/mwe) Po přewšo wuspěšnych zarjadowanjach minjenych lět přeprošeja Budyske kluby Lions, Lusatia, Leo, Rotary a Club Soropotimist Budyšina třeći króć na dohodowne beneficne koncerty. Prěni adwentny kónc tydźenja wotměja so wot přichodneho pjatka do njedźele hnydom tři koncerty w swjedźenskim ambienće Budyskeho Kamjentneho domu. Pod titlom „Swingin’ Santa“ je něhdźe 30 młodych hudźbnikow a spěwarjow z Budyšina a regiona kaž tež z partnerskeho města Budyšina, Jelenjeje Góry, hižo w nazymskich prózdninach něhdźe połdrahodźinski program jako projekt probowało. Nazwučowali su němske a mjezynarodne dohodowne a hodowne štučki. Planowany serbski spěw dyrbjachu chorosće dla krótkodobnje z repertoira šmórnyć.
Dochody koncertow su za dobry skutk. Zastup drje je darmotny, organizatorojo pak proša wopytowarjow wo pjenježny dar.
Zakłady za dźěło połožić
Projekt pěstowarnje gmejnsku radu k rozmyslowanju pohnuł
Róžant (JK/SN). Gmejna Ralbicy-Róžant je na wulke wužadanje, nowotwar Ralbičanskeje pěstowarnje, přihotowana. Na minjenym posedźenju gmejnskeje rady předstajeny planowanski projekt budźe gmejnu njesnadnu sumu pjenjez płaćić. Tež, hdyž budźe projekt spěchowany, wšojedne w kotrej wysokosći, dyrbi gmejna swójski podźěl sama zwjesć. A wostanje-li při tuchwilnym trochowanju cyłkownych wudawkow 4,3 milionow eurow a při 75procentowskim spěchowanju, wučinja podźěl gmejny přeco hišće nahladne 1,07 milionow eurow. Wjesnjanosta Hubertus Ryćer (CDU) wšak je optimistiski a ma sumu w planowanju gmejnskeho etata přichodnych lět kruće zakótwjenu. To podšmórny tež komornica zarjadniskeho zwjazka Při Klóšterskej wodźe Franciska Čapikowa, kotraž je radźićelam na samsnym posedźenju staw lětušeho gmejnskeho hospodarskeho plana rozłožiła. Z wida zarjadniskeho zwjazka kaž tež gmejny tón hubjeny njewupada a gmejnska kasa je najebać wudawki běžneho lěta derje pjelnjena, tak zo wjesnjanosće jeho optimizm wotkupiš.
