Chcedźa deponiju dale powjetšić
Wurunanske naprawy tež w gmejnomaj Njeswačidło a Bóšicy trěbne
Bóšicy (SN/MiR). Deponiju za wotpadki, kotraž wupřestrěwa so hižo nětko po honach Njeswačanskeje a Bóščanskeje gmejny, chcedźa perspektiwisce powjetšić. Nowu jamu, „hłowne polo“ připrawja mjez ležownosćemi, kotrež hižo nětko deponiju wučinjeja. W běhu přichodnych 55 lět nastanje tam hora, kotraž potom jednotliwe jamy zwjaza. Wo tym zhonichu gmejnscy radźićeljo Bóščanskeje gmejny minjenu srjedu na swojim prěnim posedźenju po lětnjej přestawce.
Wuchodne polo deponije je hižo dlěje napjelnjene a zakryte. To rěka, zo je wjace njewužiwaja. Nětko dźe wo to, płoninu rekultiwować. Kotre rostliny maja ju přichodnje pokrywać, wo tym tuchwilu diskutuja. Póda ma z połdrametrowskeje woršty wobstać, tak zo móža tam potom předewšěm kerki a mjeńše štomy rosć.
Najwažniša inwesticija do přichoda
Wojerecy (KD/SN). Po wjacorych lětach planowanja a twarskeho časa su minjeny pjatk Wojerowsku nowu centralnu wyšu šulu oficialnje přepodali. Hižo prěni dźeń noweho šulskeho lěta, póndźelu, běchu do njeje zaćahnyli, pjatk slědowaše oficialna swjatočnosć. Na njej wobdźěli so sakski ministerski prezident Michael Kretschmer (CDU), kiž bě „wulce zahorjeny wo tym, štož je tule nastało“. Wón chce samo Lipšćanskim studentam pedagogiki poručić, sej kubłanišćo z jeho za Saksku jónkrótnymi móžnosćemi wuknjenja wobhladać.
Předchadne twarjenje noweho kubłanišća běchu wot lěta 1959 jako šulu wužiwali. Hač do 2002 bě tu Zusowy gymnazij zaměstnjeny. Po tym bě dom prózdny. 2016 bě měšćanska rada wobzamknyła, pod pomnikoškitom stejace twarjenje jako nowu wyšu šulu wožiwić. „Přetwar a saněrowanje domu je najwjetša a najwažniša inwesticija do přichoda našeho města, přetož kubłanje je centralna tema w zwisku ze strukturnej změnu“, rjekny Wojerowski wyši měšćanosta Stefan Skora (CDU). Projekt płaćeše dohromady 13 milionow eurow.
Wohnjowoborne awto ponowja
Trjebin (AK/SN). Za 40 000 eurow chce gmejna Trjebin swoje wohnjowoborne awto ponowić. To je gmejnska rada na swojim zašłym posedźenju wobzamknyła. Pjenjezy bjeru po informacijach wjesnjanosty Waldemara Locki (CDU) z pawšale Swobodneho stata Sakskeje k sylnjenju wjesneje kónčiny. Z 5 000 litrami wody je wone najwjetše tankowe hašenske jězdźidło na terenje Slepjanskeje gmejny.
„Jězdźidło je 27 lět stare“, rozłoži nawoda gmejnskeje wobory Bernd Kowalick. Awto ponowić pak je wjele tuńše, hač nowe kupić, štož by něhdźe 450 000 eurow płaćiło. Ponowić dyrbja mjez druhim klumpy a módre signalowe swěcy, to je jasne. Ale kak dołho awto potom hišće funguje, prašeše so radźićel Carsten Heinz. Wón chcyše dale wědźeć, čehodla je ponowjenje módreje swěcy ze 6 000 eurami tak drohe. „Hdyž žno awto ponowimy, potom činimy to porjadnje“, Bernd Kowalick znapřećiwi. Po jeho słowach dyrbi awto wěste być a fungować. K tomu słušeja tež signalowe swěcy.
Dalše koło za rozsud trěbne
Kandidat SPD Torsten Ruban-Zeh je drje prěni přechod wčerawšich wólbow wo zastojnstwo Wojerowskeho wyšeho měšćanosty dobył, přiwšěm dyrbja Wojerowčenjo 20. septembra hišće raz wolić. Žadyn z pjeć kandidatkow a kandidatow njebě trěbnu wjetšinu hłosow dóstał, kaž z nachwilneho wólbneho wuslědka wuchadźa.
Wojerecy (SN/JaW). Torsten Ruban-Zeh je prěnje koło wólbow Wojerowskeho wyšeho měšćanosty dobył, nažnjawši 31,8 procentow. Njestronska kandidatka wólbneho zwjazka Lěwicy, Zwjazka 90/ Zelenych a zwjazka Aktiwne Wojerecy Dorit Baumeister dósta 27,8 procentow, Marco Gbureck wot AfD dósta 18,5 procentow, kandidatka CDU Claudia Florian 11,7 procentow a njewotwisny jednotliwy kandidat Dirk Nasdala 10,2 procentaj. Za wuspěch maja wobdźělenje na prěnim kole wólbow. Z cyłkownje 52,9 procentami je jasnje wjac ludźi woliło hač před sydom lětami. Tehdy wobdźěli so na prěnim wólbnym přechodźe jeno 38,7 procentow wólbokmanych.
Krótkopowěsće (07.09.20)
AfD dale rozrostuje
Podstupim. Ličba potencielnych prawicarskich ekstremistow w Braniborskej je – tež podhladnych padow AfD dla – wot 1 675 w lěće 2018 na loni 2 765 rozrostła a dotal najwyši staw docpěła. To wuchadźa z rozprawy wustawoškita, kotruž staj nutřkowny minister Michael Stübgen (CDU) a šef zarjada Jörg Müller dźensa w Podstupimje předstajiłoj.
Komisija za přichod ratarstwa
Berlin. Knježerstwowa komisija, kotraž ma po dołhej zwadźe konsens za přichod ratarstwa w Němskej namakać, je so dźensa připołdnju w Berlinje prěni raz schadźowała. Předewšěm dźe jej tež wo wjace přirodoškita, wo lěpše wuměnjenja w chlěwach a hródźach wo mjenje boja nastupajo płaćizny žiwidłow. Ratarski zwjazk wočakuje konstruktiwne zhromadne dźěło w gremiju.
Zeleni za dalewobstaće Miłoraza
Finisaža dźěłarnički
Miłoćicy. Z předfinisažu jutře, sobotu, wot 17 hodź. a z finisažu njedźelu wot 10 hodź. skónči so 14. mjezynarodna rězbarska dźěłarnička při Miłočanskej skale. Tam móža sej zajimcy na woběmaj dnjomaj wobhladać, što je šěsć wuměłcow minjeny čas stworiło. K tomu poskića hudźbu, akcije za dźěći a dalše programowe dypki. Tež wo ćělne derjeměće wopytowarjow budźe postarane.
Koncertujetaj na dworje
Budyšin. Gitarist Tim McMillan a wiolinistka Rachel Snow koncertujetaj jutře wot 20 hodź. na dworje Budyskeho Kamjentneho domu. Wonaj předstajitaj njewšědny miks stilow kaž celtic rock, folk, metal a jazz. Při wječornej kasy płaći zastup sydom eurow. Hdyž so dešćuje, budźe koncert na žurli Kamjentneho domu.
Na kermušny kofej
Policija (04.09.20)
Zhubjeneho namakali
Stróža. Po nimale štyrjoch tydźenjach su wčera popołdnju w Olbje pola Stróže w Malešanskej gmejnje pytanje za zhubjenym mužom skónčić móhli. Wokoło 14 hodź. nurjerjo jeho ćěło nańdźechu. Wone ležeše něhdźe 150 metrow wot přibrjoha zdalene we hłubokosći 21 metrow. 10. awgusta bě so 44lětny hromadźe z mandźelskej k sportowemu płuwanju na jězor podał. Na poł puća měješe wón najskerje strowotny problem a chcyše wróćo k přibrjohej płuwać. Wot toho dnja policisća a wohnjowi wobornicy za zhubjenym pytachu. Zasadźili su tohorunja nurjerjow, policajske psy, helikopter a na kóncu trut za nurjenje. Policija chcyše dźensa nadrobniše informacije wozjewić.
Awto z partnerskeje gmejny
Pěskečanscy wohnjowi wobornicy dóstanu jězdźidło, ale nic nowe
Miłoćicy (SN/MWj). Dokelž ničo wěčnje njedźerži, je tež raz hašenske jězdźidło wohnjoweje wobory dodźeržane a dyrbja z hinašim narunać. Nowe financować pak je zwjetša komplikowana naležnosć. Wšako dóstawaja komuny při płaćiznach mjez 200 000 a 400 000 eurami jeno dźěl spěchowany, tak zo trjebaja šwarny swójski podźěl. Tohodla je mjeztym z wašnjom, zo wobstaruja sej trjebane jězdźidło. Tak čini to nětko tež Njebjelčanska gmejna za Pěskečanskich wohnjowych wobornikow.
Krótkopowěsće (04.09.20)
Hotuja so na europeadu
Pančicy-Kukow. Zamołwići serbskeju koparskeju wubrankow su wčera wo dalšich přihotach na přichodnu europeadu wuradźowali. Signale ze stron zarjadowarja su jasne, zo přewjedu europski mjeńšinowy turněr klětu srjedź junija w Korutanskej, dalokož to situacija koronapandemije dla dowoli. Najebać chětro połne hrajne plany w ligach planujetej wubrance nazymu wjacore zetkanja.
Kontaktnej wosobje pozitiwnej
Budyšin. Znowa stej so dwě kontaktnej wosobje w Budyskim wokrjesu natyknyłoj, jeju koronatestaj běštej pozitiwnej, kaž strowotniski zarjad dźensa zdźěli. Aktualnje je 19 schorjenych. 80 wobydlerjow (+15) dyrbi w karantenje wostać. W Budyskim wokrjesu běchu w běhu minjenych sydom dnjow w jědnaće padach koronawirus zwěsćili.
Praktiske prašenje rozjimali
Policija (03.09.20)
Wjetšu plantažu planowali
Budyšin. Kedźbliwi zastojnicy kriminalneje słužby su předwčerawšim w Budyšinje konopjowu plantažu wuslědźili. Rostliny stejachu na balkonje wjaceswójbneho domu. Na přepytowanju bydlenja, wot hamtskeho sudnistwa přikazanym, njenamakachu jenož wone šěsć rostlin na balkonje, ale tež štyri dalše k sušenju powěsnjene. Dale bě w bydlenju wjetše mnóstwo konopjoweho symjenja. Kaž wobydlerjo policistam sami powědachu, chcychu konop na wjetšej plantaži dołhodobnje plahować. Z toho nětko ničo njebudźe, přetož zastojnicy wšitko sćazachu. Město toho změja so potrjecheni na sudnistwje za swoje přeńdźenje zamołwić.
