Zarjadniski zwjazk zawrjeny
Pančicy-Kukow/Budyšin (SN/JaW). Zarjadniski zwjazk w Pančicach-Kukowje wostanje hač do 3. nowembra zawrjeny. To zdźěli wčera našemu wječornikej předsyda zarjadniskeho zwjazka Měrko Domaška. Přičina je, zo dyrbjachu so wjacori sobudźěłaćerjo zarjada do škitneje karanteny podać. Kaž Domaška dale rjekny, móže zarjad tuž jenož digitalne naprašowanja a serwisowe nadawki wobdźěłać.
Wot wčerawšeho płaća we wokrjesu Budyšinje sylneho rozrosta nowych infekcijow dla razniše wobmjezowanja zjawneho žiwjenja. „Naprawy su bohužel trěbne, zo móhli našemu strowotniskemu zarjadej dale kontrolu nad wuwićom infekcijow zmóžnić“, rjekny Budyski krajny rada Michael Harig (CDU), kiž nowe naprawy wita. „Prošu wšitkich wobydlerjow, so po postajenjach měć, zo bychmy zhromadnje dalšemu lockdownej zadźěwali.“
Krótkopowěsće (26.10.20)
Digitalna zhromadźizna
Budyšin/Flensburg. Europski parlament chce so hišće lětsa z wobydlerskej iniciatiwu Minority SafePack rozestajeć a rezoluciju wobzamknyć. To připowědźi prezident Federalistiskeje unije europskich narodnych mjeńšin FUEN Loránt Vincze, kotryž je sam zapósłanc w Brüsselu, sobotu na digitalnej delegatnej zhromadźiznje FUEN. Wobzamknyli su wjacore rezolucije wo škiće narodnych mjeńšin.
Filmowy přinoški zapodać
Wulke Hendrichecy. Za 18. Nysowy filmowy festiwal, planowany klětu wot 18. do 23. měje w němsko-pólsko-čěskim třikrajowym róžku pytaja zarjadowarjo wubědźowanske přinoški za kategorije hrajny film, krótkofilm a dokumentaciski film. Hač do 31. decembra móža filmowcy swoje přinoški zapodać. Produkowane dyrbja wone być 2020 abo 2021 w jednym z třoch festiwalowych krajow.
Politiske wuměłstwo
Policija (23.10.20)
Wotpadki wotbyć chcyła
Brězowka. Swědk wobkedźbowaše srjedu při Brězowčanskim jězoru, kak chcyše žona runje štyri měchi połne wotpadkow ilegalnje wotbyć. Wón zazwoni policiju. Zastojnicy zwěsćichu w awće 65lětneje dalši měch. Žona dyrbješe wšitko zaso sobu wzać a změje so za to zamołwić.
Předstaja nowu knihu
Budyšin. „Swjate su mi twoje hona“ rěka kniha Christiana Kessnera, kotruž předstaja štwórtk, 29. oktobra, w 19 hodź. w Budyskej Smolerjec kniharni. W knize spyta awtor wotmołwić na prašenje, što docyła je to typiske serbske, hdyž hladaš na to z duchowno-dušinych korjenjow. Tutón wječor budźe składnosć, so z awtorom wo tymle prašenju rozmołwjeć. Zajimcy su wutrobnje přeprošeni, maja pak so do toho w Smolerjec kniharni přizjewić.
Žane wopyty w chorownjomaj
Dom kata zachowaja
Historiske twarjenje na Lišej Horje klětu na nowym městnje natwarja
Liša Hora (SN/MWj). Njeswačanske towarstwo přećelow kultury a domizny zwoprawdźa nětko projekt, wo kotryž so hižo dlěši čas prócuja. Nimale dźesać wosobow wopřijaca dźěłowa skupina towarstwa tele dny tak mjenowany dom kata (Scharfrichterhaus) na Lišej Horje kamjeń po kamjenju a hrjadu po hrjedźe wotnjese. Wšón material w suchim składuja. Klětu něhdźe w měrcu abo aprylu chcedźa historiske twarjenje na nowym městnje zaso natwarić, a to při Chasowskim wětrniku, rozłoži předsyda Njeswačanskeho towarstwa Dieter Petschel.
SLA cirkusowy projekt podpěrał
Prěni tydźeń nazymskich prózdnin zmysłapołnje wužiwali su dźěći a młodostni, kotřiž wobdźělichu so hač do dźensnišeho na cirkusowej dźěłarničce na Wojerowskej dźěćacej a młodźinskej farmje.
Wojerecy (KD/SN). Tydźenske cirkusowe dźěłarnički na Wojerowskej dźěćacej a młodźinskej farmje Křesćansko-socialneho kubłanskeho skutka (CSB) tam hižo dlěši čas wobstajnje organizuja. Zo pak móžachu tajki poskitk tež w prěnim prózdninskim tydźenju wotměć, hdyž bě zarjadnišćo poprawom zawrjene, dokelž tam nowu wučbnu kuchnju z projektowej rumnosću zatwarja, bě jeno z wjele partnerami móžno.
Krótkopowěsće (23.10.20)
Nowe postajenja
Budyšin/Zhorjelc. Sylnje přiběraceje ličby natyknjenych z koronawirusom dla chce wokrjes Budyšin nowe postajenja wukazać, kotrež maja wot jutřišeho płaćić. Wčera zličichu 62 nowych infekcijow. 31 ludźi je zaso wustrowjenych. Ličba nowych infekcijow na 100 000 wobydlerjow w běhu sydom dnjow wučinja 80. W Zhorjelskim wokrjesu zličichu 67 nowych natyknjenych. Kwota na 100 000 wobydlerjow je 90 překročiła.
Myto opoziciji w Běłoruskej
Brüssel/Minsk. Nahladne myto Sacharowa za čłowjeske prawa Europskeho parlamenta spožča lětsa opoziciji w Běłoruskej. Zastupnicy opozicije symbolizuja wšědny bój wo čłowjeske prawa a swobodu měnjenja, rjekny prezident parlamenta EU David Sassoli w plenumje w Brüsselu. Parlament EU je prěnja institucija, kotraž protesty w Běłoruskej z mytom hódnoći. Tole ma ludźi dale pohonjować.
Historiske přinoški přistupne
Policija (22.10.20)
Młodostny trójce napadnył
Wojerecy. Z njepowučomnym paduchom dyrbješe so předwčerawšim policija we Wojerecach hnydom trójce w běhu popołdnja zaběrać. 18lětneho lepichu najprjedy we wobchodźe na Curiejowej, hdźež chcyše žiwidła za dwaj euraj spakosćić. Hodźinu pozdźišo měrješe so wón w kupnicy na Łužiskim naměsće na słódčizny za dwaj euraj. Něhdźe we 18 hodź. młodostny znowa na Łužiskim naměsće napadny, dokelž spytaše chipsy a napoje za 13 eurow pokradnyć.
