Kermušna zabawa witana była
Dochodow lětsa tójšto mjenje
Kulow (AK/SN). Z přemysłoweho dawka změje město Kulow lětsa tójšto mjenje dochodow hač loni. To podšmórny měšćanosta Markus Posch (CDU) na zašłym posedźenju měšćanskeje rady. „W hospodarskim planje mějachmy spočatnje 2,3 miliony eurow zaplanowane. Mjezystaw dochodow z přemysłoweho dawka kónc septembra wučinješe něšto mjenje hač milion eurow“, Posch rozłoži. „Po našich nazhonjenjach njemóžemy w poslednich třoch měsacach lěta hižo z přewulkimi dochodami ličić.“
Swobodny stat Sakska komuny při wurunanju jich deficitow koronapandemije dla podpěruje. Kulow móže tak z něhdźe 500 000 eurami ličić. Prěnju sumu we wobjimje 250 000 eurow je město mjeztym dóstało. Markus Posch so nětko tež druheje połojcy nadźija.
Kulturny centrum ma nowy foyer
Slepo (JoS/SN). Mjeztym 23 lět wobsteji w Slepom Serbskim kulturny centrum (SKC) ze swojimi poskitkami. W běhu lět pokazachu tam njeličomne wustajeńcy a organizowachu najwšelakoriše zarjadowanja a tematiske wiki. Tež towarstwa a institucije maja tam swój domicil. Po tak dołhim času, praji nawodnica SKC Sylwija Panošina, bě na městnje, wo nowych konceptach rozmyslować.
Tak prezentuje so nětko zachodny foyer w nowych a čerstwych barbach. „Nastorki smy sej pola swojich partnerow zdobyli, Zeisigec blidarnja z Brězowki je nas při zwoprawdźenju podpěrała“, Sylwija Panošina powěda. W nowym foyeru tworja barby, swěca a funkcionalita jednotu. Nade wšěm steja horjeka wulkoformatowe fota z motiwami Slepjanskeho regiona, kotrež bě Frank Stein zapopadnył. Tež wabjenski material aktualnych turistiskich poskitkow je přewidnje prezentowany. Na integrowanej wobrazowce móža wopytowarjo kulturneho centruma krótke filmy widźeć, mjez druhim wot Rudija Krawca. Pjenježnu podpěru za nowy foyer dóstachu wot załožby Doma w Slepom, Rownom, Mułkecach.
Policija (19.10.20)
Přewjele alkohola piłoj
Kamjenc. Wulkeje hary dla wołachu w nocy na minjenu sobotu policiju na Klóštersku hasu w Kamjencu. Tam z jednoho bydlenja hudźba tak wótře ržeše, zo zastojnicy při durjach podarmo klinkachu a klepachu. Tuž dyrbjachu wohnjowi wobornicy přijěć a durje wočinić. W bydlenju ležeštej dwě wosobje, kotrejž najprjedy scyła njereagowaštej. Hakle jako nuzowy lěkar jeju přepytowaše, mužej w starobje 26 a 29 lět wotućištaj. Jeju dowjezechu do chorownje. Naměrichu pola njeju 1,90 resp. 1,94 promilow alkohola w kreji.
Pytaja požčonki
Njezměja hižo žadyn dobytk
Połoženje w lěsach Rakečanskeje gmejny runje tak napjate kaž druhdźe
Rakecy (JK/SN). To dyrbjachu Rakečanscy gmejnscy radźićeljo na swojim zašłym posedźenju zaso raz něšto dlěje wutrać. Hłownej temje běštej komunalny lěs kaž tež zastaranje z pitnej wodu a wotstronjowanje wopłóčkow.
Gmejna Rakecy wobsedźi 5,6 hektarow komunalneho lěsa, kotryž da wot statneho lěsniskeho zawoda Sachsenforst wobhospodarjeć. Za rewěr zamołwity hajnik, Wěteńčan Michał Zahon, poda radźićelam hromadźe ze swojim kolegu přehlad wo stawje sakskeho lěsa kaž tež wo wuwiću komunalneho Rakečanskeho lěsa. Wobaj skedźbništaj na napjatu situaciju w lěsach, zawinjenu přez wulke wichory zašłych lět, přez hižo tři lěta trajacu suchotu a nic naposledk tež přez skutkowanje lěsnych škódnikow kaž skórnika.
Saksku Šwicu zhromadnje wotkryli
Jury idejoweho wubědźowanja sakskeho fondsa „Čiń sobu!“ je we wosebitej kategoriji „Žiwa dwurěčnosć“ tež zapodaty projekt Symana Pöpela wuzwoliła, kotryž je dalekubłansku jězbu Serbow do Sakskeje Šwicy namjetował. Sobotu bě so tuž wulka ličba zajimcow do narodneho parka podała.
Prěni raz firmowanje w Róžeńće
To bě jónkrótne
Krótkopowěsće (19.10.20)
Dalše wobmjezowanja
Budyšin/Zhorjelc. W Budyskim wokrjesu je ličba schorjenych na koronu wo 33 na cyłkownje 856 rozrostła, zdźěli wokrjes wčera. Kaž bu znate, njejsu wotnětka w Chróšćanskim domje swj. Ludmile k škitej wobydlerjow a personala žane wopyty wjac dowolene. W dalšich starownjach wokrjesa wo tym rozmysluja. W Zhorjelskim wokrjesu zličichu wčera 21 schorjenjow wjac. Z tym su hranicu 50 inficěrowanych na 100 000 wobydlerjow w běhu sydom dnjow překročili. Wokrjes je dalše wobmjezowanja wukazał.
Z nowym předsydstwom
Budyšin. Budyski měšćanski zwjazk CDU je minjenu sobotu nowe předsydstwo wolił. Nowy předsyda je Christoph Mehnert, kiž je so přećiwo Arno Glauchej přesadźił. Jeho zastupjerjej staj Cindy Schütz a Wolfgang Zettwitz. Mehnert chce měšćanski zwjazk CDU bóle jako politisku móc etablěrować. Wón chce, zo zwjazk strukturnu změnu aktiwnje přewodźa.
Zwada wo wojerske financy
