Kaž w druhich hosćencach móža sej wobydlerjo tež w Choćebuskej „Běrnjacej kisće“ na Grodkowskej jědź skazać a wotewzać – tule přihotuje kuchar Silvio Klose runje „rězk to go“. Sobudźěłaćerjo mějachu ideju, z kóždej zličbowanku něšto za tych přinošować, kotřiž maja socialne njelěpšiny a su na pomoc pokazani. Tak su Choćebuskej tafli na wšě 2 000 eurow přepokazali. Móžno to jenož bě, dokelž ludźo poskitk, sej jědźe kónc tydźenja wotewzać, lěpje přijimuja, hač běchu sej to w „Běrnjacej ­kisće“ myslili. Mustwo hosćenca so tuž wšitkim podpěraćelam dźakuje a so nadźija, zo móže wopytowarjow bórze zaso w hosćencu posłužować. Foto: Michael Helbig

Zymsku periodu z temperaturami hač do 18 stopnjow zmjerzka naslěduje miłe, samo nalětnje wjedro. Tak so tež sněh a lód z Łužicy pominjetej.

Drježdźany (SN/JaW). Sakski krajny centrum za wulku wodu krajneho zarjada za wobswět, ratarstwo a geologiju (LfULG) liči z „moderatnym taćom sněha. Temperatury pohibuja so hač do štwórtka jeničce w jednocyfrowym wobłuku a wjetše mnóstwo spadkow tež njewočakujemy“, rěka w nowinskej zdźělence. Z přezcyłnej wulkej wodu w Sakskej tuž njeliča.

W rěkach, kotrež wužórleja so w horinach, pegele jako prěnje na taće sněha a lodu reaguja. W našej kónčinje potrjechi to předewšěm přitoki srjedźneho Łobja, kaž mjez druhim Čorny Halštrow a Sprjewju. „Tam móže při mjeńšich rěčkach k mjeńšim přepławjenjam dochadźeć. Zdźěla móža staw wody alarmowy schodźenk 1 překročić“, z Drježdźan rěka. W běhu dalšeho tydźenja liča potom tohorunja ze zwyšenymi pegelemi w dalšich łužiskich rěkach, kaž w Běłym Halštrowje a Nysy.

Budyšin (SN/JaW). Hłowni kantorojo a zamołwići křižerskich procesionow su wčera wo jutrach 2021 wuradźowali. W přitomnosći Radworskeho fararja Bena Jakubaša je Budyski tachantski farar Wito Sćapan wo swojej njedawnej rozmołwje ze sakskej statnej kencliju nastupajo křižerske procesiony „rysował předstawy kenclije a na čo měli my dźiwać. Zasadnje móžeše wón rjec, zo směmy samo­zrozumliwje jěchać a zo směmy tež spěwać. Přiwšěm pak móže njelubozne wuwiće nastupajo koronu krótko do jutrow to zaso na hrački stajić. To su dekanej Sćapanej jasnje prajili“, zdźěli na naprašowanje farar Jakubaš. Kaž dekan Sćapan wčera informowaše, su so přitomni dojednali, zo ma „zamołwity Drježdźansko-Mišnjanskeho biskopstwa za serbske naležnosće dekan Sćapan hygienisko-škitne naprawy a koncept wotpowědnemu zarjadej Budyskeho wokrjesa zapodać“. Zdobom ma kóždy křižerski procesion za sebje hygieniski koncept za jutry zdźěłać. Wšako su wuměnjenja na městnje chětro rozdźělne. Mjez druhim njebudu w Ralbicach a Kulowje žane zhromadne kemše a nyšpory křižerjow móžne.

Karantena podlěšena

Budyšin/Zhorjelc. Karantena za pozitiwnje na koronu testowanych podlěši so wot dźesać na 14 dnjow – runja telko kaž za tak mjenowane kontaktne wosoby. W Budyskim wokrjesu potrjechi to aktualnje 780 ludźi. Hač do wčerawšeho zwěsćichu tu 30 dalšich natyknjenych, incidenca wu­činješe 84,66. W Zhorjelskim wokrjesu běchu to 30 infekcijow a štyri smjertne pady, incidenca tam bě 76,76.

Planuja wulět ze swjedźenjom

Drježdźany. Na wulět srjedź awgusta do Čornochołmčanskeho Krabatoweho młyna su so wobdźělnicy njedawneho Serbskeho blida towarstwa Stup dale internetnje dorozumili. W Čornym Chołmcu chcedźa Drježdźanjenjo wuhotować za sebje a za zajimcow mały swjedźeń poezije, ze serbskimi awtorkami a awtorami kaž tež z rejkami Drježdźanskich dźěći w narodnej drasće.

Loni wjele mjenje hosći měli