Dom kamelijow wostanje zawrjeny
W Kinsporskim kamelijowym domje tuchwilu najstarša kamelija kćěje. Wobhladać pak sej ju njemóžemy. Wobmjezowanja korony dla tomu zadźěwaja. A tomu lětsa dale tak wostanje.
Kinspork (SN/MiR). Nimo najstaršeje kamelije wupřestrěwa tež jara rědka wisata kamelija swoje kćenja do wysoka, runje tak kaž wonjace družiny. Normalnje bychu tam ludźo dźensa po stach za zastupnym lisćikom stali – wosebje kónc tydźenja. Šulerjo Kinsporskeje zakładneje a wyšeje šule wodźachu stajnje w měrcu slepych po wustajenišću, pěstowarnjam poskićachu „bajkowy přewod“. Lětsa wostanje dom zawrjeny. Tamniše domizniske towarstwo chce pak ludźi přiwšěm zawjeselić. Tuž je zarjadował serwis za rozesłanje skazankow kaž tež za zajimcow, kotřiž chcedźa sej twory wotewzać. Nowy kamelijowy parfim kaž tež za njón wužiwane kćějace wonjace kamelije družiny „Minato no akebono“ su runje tak wosebite dary k jutram kaž młode rostlinki třoch najstaršich kamelijow družin „Alba Plena“ a „Althaeflora“ inkluziwnje certifikata ryzosće. Při wotewzaću je snadź tež móžno do kamelijoweho domu pokuknyć.
Wotstronjeja slědy dźiwich swini
Ličby RKI su měritko
Wolóženja a přiwótřenja koronanaprawow wot třoch faktorow wotwisne
Budyšin/Zhorjelc (SN/JaW). Wot dźensnišeho su tež we wokrjesomaj Zhorjelc a Budyšin nowe postajenja wo škiće před koronawirusom płaćiwe. Tak smě so nětko najwjac pjeć wosobow z dweju domjacnosćow zetkać, zběhnjene su tohorunja zakaz přebywanja zwonka bydlenja, wobmjezowanja wuchodźowanja a zakaz alkohola. Dale su wot dźensnišeho kniharnje zaso wočinjene, runje tak twaršćiznowe wiki, kwětkarnje a štomownje.
Žonjace akciske tydźenje zahajene
Krótkopowěsće (08.03.21)
Wobchody z click & meet
Budyšin. Aktualneje incidency pod 100 po Roberta Kochowym instituće (RKI) dla su w Budyskim a Zhorjelskim wokrjesu wobchody wotnětka po systemje click & meet wočinjene. W Budyskim wokrjesu zwěsćachu wot pjatka 140 koronanowoinfekcijow a tři smjertne pady. Incidenca bě po podaću wokrjesa 97, po RKI dźensa rano 98,1. We wokrjesu Zhorjelc bě wčera 26 nowonatyknjenjow a indicenca 82,30, po RKI je 66,9.
Hudźbne dny zaso přestorčene
Wojerecy. 55. Wojerowske hudźbne swjedźenske dny, kotrež běchu wot 11. apryla do 2. meje planowane, su zamołwići znowa wo lěto přestorčili. Kaž zdźěli nawoda Łužiskeje hale Dirk Rolka jako zarjadowar, su přičina połoženje korony dla a z tym zwisowace škitne naprawy. Njewěste dale je, hač smědźa so přeprošeni wukrajni wuměłcy wobdźělić. Zastupne lisćiki wostanu płaćiwe.
Matura bjez pruwowanjow?
Policija (05.03.21)
Z dróhi runu smuhu do jastwa
Budyšin. Na awtodróze A 4 pola Budyšina zwěsći policija tele dny při kontroli, zo bě šofer małotransportera bjez jězbneje dowolnosće po puću. Za 30lětnym hižo pytachu, dokelž njebě pokutu wjacorych stow eurow płaćił. Dokelž njemóžeše ju zapłaćić, dowjezechu jeho do jastwa.
Njerjad rěčku zanjerodźił
Budyšin. Wohnjowu woboru z wokoliny sprjewineho města su wčera rano na Budyski puć Při Špitałskich łukach wołali. Tam běchu wobydlerjo wolij na Albrechtowce wuhladali. Přičina bě wočiwidnje preč ćisnjeny njerjad pod mostom při zaliwje do rěčki. Wobornicy připrawichu wotpowědnu zawěru. Pad zanjerodźenja policija nětko přepytuje.
Ze stipendijom do Čěskeje
Budyšin. Rěčny centrum WITAJ ma za zajimcow a zajimče, kotrež chcyli čěšćinu nawuknyć, wosebity poskitk. Tak poruča młodym a staršim Serbam měsačny rěčny kurs w susodnym kraju. Jedyn ma so wotměć w Českich Budějovicach wot 15. awgusta do 6. septembra, tamny w Praze wot 23. julija do 19. awgusta. Štóž ma lóšt, so nimo rěčneje kwalifikacije tež ze stawiznami a kulturu susodneje Čěskeje zaběrać, njech přizjewi so hač do 15. měrca w RCW. Dalše informacije namakaće na stronje www.witaj-sprachzentrum.de pod „rěčne kursy – čěšćina“.
Pjeriznu škitać
Němske Pazlicy. Při hatach wokoło Němskich Pazlic su 25. februara wjacore zahinjene kołpje našli. Dźewjeć z nich bě z A-wirusom H5N8 (pjeriznowa mrětwa) inficěrowane, kaž Friedricha Löfflerowy institut wčera zwěsći. Dalše we wokrjesu namakane dźiwje ptaki tam nětko přepytuja. Zwěsćeneje wudyrjeneje mrětwy dla dyrbja mějićeljo pjerizny sewjernje awtodróhi A 4 w Budyskim wokrjesu nětko swoje kurjency a podobne zawrjene wostajić.
Posudk za Sprjewine wrota předleži
Budyšin (SN/MiR). Diskusija wo tym, hač nad Sprjewju w Budyšinje móst twarja, njewoteběra. Skerje wona mjeztym generacije wobydlerjow zaběra. Wšako bě so tudyša měšćanska rada hižo srjedź 1990tych lět prěni króć z ideju zaběrała, powjaznicu (Seilbahn) za přeprěčenje sprjewineho doła twarić. Njeboh měšćanski radźićel Gunther Schober bě projekt namjetował a trěbne rysowanki kaž tež wobličenja zapodał. Tehdy bu projekt imensnych kóštow dla wotpokazany, a měšćanska rada njewědźeše z wiziju wobchadźeć, zo móhła tajka powjaznica wunošna być.
Wosebita krjepjeńčka w cyrkwi
Hłosaj přećiwo demokratiji
Wjetšina čłonow financneho wuběrka so za projekty wuprajiła
Budyšin (CS/SN). Financny wuběrk města Budyšina wuradźowaše wutoru wo třoch projektach we wobłuku spěchowanskeho programa zwjazkoweho knježerstwa „Demokratiju pěstować“. Krajny zwjazk Dźěłaćerskeho dobroćelstwa chce idejowu konferencu młodźiny wuhotować. 200 młodostnych ma so w pjeć dźělach města zetkać, zo bychu na neutralnym městnje diskutowali a ideje za dobru zhromadnosć w měsće wuwiwali. Projekt dyrbjeli dorosćeni moderěrować, zo by so komunikacija mjez młodostnymi a politiku kaž tež zarjadnistwom města polěpšiła. Za projekt su wo 20 000 eurow prosyli. Wjetšina čłonow wuběrka, mjenujcy pjećo, je so za próstwu wuprajiła, dwaj přećiwo njej. Přećiwnej hłosaj běštaj z frakcije AfD. Sieghard Albert wupraji swoje njezrozumjenje, runje w tuchwilnym času pjenjezy wudawać za něšto, štož ma so organizować, a nic za něšto, štož hižo je. Wón namjetowaše pjenjezy druhdźe zasadźić. Financny měšćanosta dr. Robert Böhmer pak wujasni, zo „njeje móžno srědki hinak wužiwać hač za poprawny wotmysł.
