Za město a komuny budźe přichodny čas přiběrajcy ćežko wurunane hospodarske plany zdźěłać a předpołožić. ­To pokazuje so nětko tež na přikładźe města Budyšina.

Budyšin (CS/SN). Hižo wot lěta 2017 so pokazuje, zo je pozitiwne hospodarske wuwiće města Budyšina nimo. Tehdy scyła hišće na koronu myslić njebě. To rjekny na wčerawšim posedźenju Budyskeje měšćanskeje rady financny měšćanosta dr. Robert Böhmer, jako hospodarske połoženje města posudźowaše. Korona pak komplikowane połoženje zjawnych kasow hišće přiwótřa. Hinak hač stat njemóže Budyšin pjenjezy z ničeho brać. Bohužel je tu diferenca mjez dochodami a wudawkami dźeń a wjetša. Na město čakaja słabše wuhotowanje komunalnych financow, woteběrace dochody z dawkow a demografiske efekty kaž přestarjenje wobydlerstwa. Na tamnym boku poćežuja je předewšěm stupace personalne wudawki, tarifowe zwyšenja, kóšty w pěstowarnjach, wokrjesny wotedawk a wotpisanja. Ale tež posłužby Budyskeje wobdźělenskeje a wobhospodarjenskeje towaršnosće a přiražki za dźiwadło dyrbja płaćene być.

Serbske gmejny njejsu ćežišćo

Budyšin. Incidencna hódnota w Budyskim wo­krjesu je znowa zwyšena. Po wozjewjenju RKI wučinja wona 155,5. Wčera zličichu 157 dalšich natyknjenjow, jedna wosoba je zemrěła. W serbskich a dwurěčnych gmejnach je mało infekcijow. Zwjetša maja tam pod dźesać pozitiwnymi padami – Worklecy, Njebjelčicy a Pančicy-Kukow samo wjacore dny za sobu scyła žadyn. W Zhorjelskim wokrjesu zličichu wčera 105 nowoinfekcijow, incidencu podawa RKI ze 183,2.

Portugal klětu hóstny kraj wikow

Lipsk. Wotprajenja Lipšćanskich wikow 2021 dla přestorča za lětsa planowany wustup hóstneho kraja Portugala na klětu. We wobłuku zarjadowanja „Lipsk čita ekstra“ wot 27. do 30. meje prezentuje so Portugal hižo z digitalnymi a analognymi zarjadowanjemi. Lětsa wuńdźe něhdźe 50 knihow z Portugala a portugizišćinu rěčacych krajow w němskej rěči.

Přihotuje modelowe projekty

Wojerowski serwisowy běrow komuny nadrobnje poradźuje

Wot awgusta 2019 dźěła na Drježdźanskej dróze we Wojerecach „Serwisowy běrow za serbsku rěč w komunalnych naležnosćach“ w Domowinskim domje Wojerowskeje župy „Handrij Zejler“. Nošer běrowa je třěšny zwjazk serbskich towarstwow Domowina, rozłožuje sobudźě­łaćer běrowa Jan Kral.

Jan Kral a jeho kolegina Franciska Grajcarekec wukonjataj bjezpłatne pře­łožowanske a poradźowanske posłužby za 42 komunow w serbskim sydlenskim rumje wokrjesow Budyšin a Zhorjelc, ­kotrež maja so po wukazach wustawy a serbskeho zakonja Sakskeje wo sylnišu dwurěčnosć w zjawnym rumje starać. Wobaj sobudźěłaćerjej serwisoweho běrowa staj jako maćernorěčnaj Serbaj dwurěčnje wotrostłoj. Tak so tež w němskim rěčnym rumje doma čujetaj, Jan Kral wuswětla. Wón bě někotre lěta w redakciji serbskeho wječornika Serbske ­Nowiny jako redaktor sobu dźěłał a bě tež wědomostno-techniski sobudźěłaćer w Budyskim Serbskim instituće. Franciska Grajcarekec je na Instituće za sorabistiku Lipšćanskeje uniwersity serbšćinu studowała.

Jězdźerjej smjertnje znjezbožiłoj

Bjezdowy. Tragiski wukónc měješe jězba motorskeho wčera připołdnju pola Wojerec. Krótko do 13 hodź. bě 38lětny na statnej dróze S 234 při wotbóčce do Bjezdowow wjacore před nim jěduce awta přesćahnył. Na to zajědźe jeho Yamaha w lěwej křiwicy na prawy bok jězdnje ­a zrazy do štoma. K městnu njezboža wołachu wuchowanske mocy, wjacore wohnjowe wobory a helikopter. Muža najprjedy na městnje reaniměrowachu a dowjezechu jeho do chorownje. Tam pak wón na sćěhi swojich zranjenjow zemrě.

Dalši wodźer motorskeho je wčera krótko do 19 hodź. pola Niederoderwitza žiwjenje přisadźił. Tam přijědźe jemu VW napřećo, kotrehož wodźer je 49ětneho najskerje při přesćehnjenju dalšeho awta přewidźał. Wodźer motorskeho na městnje zražki wudycha. 21lětneho šofera VWja dowjezechu do chorownje.

Atest falšowany był