Policija (08.04.21)
Paducha w haće zajeli
Delni Wujězd. 24lětneho muža, kiž bě předwčerawšim w Ottendorfje-Okrilli Audi A 6 w hódnoće 27 000 eurow pokradnył, su něšto hodźin pozdźišo w Delnim Wujězdźe zajeli. Jako policisća tam awto wuhladachu, ćekny skućićel najprjedy po pólnym puću, wosta pak na kromje hata tčacy. Wón spyta hišće do hata wućeknyć, ale kački so na to wustróžichu a muža přeradźichu. Wobsadka helikoptera zastojnikow na zemi dokładnje k 24lětnemu wjedźeše, tak zo móžachu jeho skónčnje zajeć.
Na nazhonjenja nawjazać
Chcedźa dale wot spěchowanja w regionje profitować
Trjebin (AK/SN). Gmejna Trjebin přisłuša dale k spěchowanskemu regionej Leader za Łužisku jězorinu. Tole su gmejnscy radźićeljo na swojim wčerawšim posedźenju jednohłósnje schwalili. Z tym nawjazaja na dotal dobre nazhonjenja ze spěchowanskeje praksy. Hakle loni móžachu projekt słónčneje płachty za Trjebinsku pěstowarnju „Lutki“ zwoprawdźić. „Spěchowanski region Łužiska jězorina wobsteji wot lěta 2007. Prěnja spěchowanska doba sahaše hač do lěta 2013, druha hač do 2020. Doba je nětko hač do 2022 podlěšena. Přichodna ma so w januaru 2023 započeć“, praji nawodnica hłowneho zarjada Slepjanskeje zarjadniskeje zhromadnosće Marion Mudra. „Jako nowe komuny přidružić chcedźa so Mužakow, Krušwica, Jabłońc a Wuskidź.“
Nasyp při rěkomaj nětko saněruja
Na kromje Wojerec su Krajne zarjadnistwo rěčnych zawěrow Swobodneho stata Sakskeje (LTV), město a jeje zastaranske zawody (VBH) wulki zhromadny projekt zahajili. Tón je do wjacorych wotrězkow rozdźěleny.
Wojerecy (SN/MWj). Při Čornym Halštrowje a Wojerowskej Čornicy su po jutrach prawy nasyp saněrować započeli. Nasyp njebě hižo wěsty dosć, tak zo nětko do njeho železnu murju zatwarja a jón na te wašnje zesylnja. Z tejle naprawu polěpša škit před wulkej wodu wokoło Gondeloweho hata a we Wojerowskim nowym měsće. Je to zhromadny projekt Krajneho zarjadnistwa rěčnych zawěrow, města Wojerecy a tamnišich zastaranskich zawodow. Dźěła maja w nazymje 2022 wotzamknjene być a płaća 2,2 milionaj eurow, zdźěli rěčnica LTV Katrin Schöne w nowinskim wozjewjenju.
Prjedy hač móža nasyp samy saněrować, dyrbja zastaranske zawody nimale 400 metrow dołhi nowy wodowód kłasć a přizamknyć. Stara roła wjedźeše mjez železniskimi kolijemi a starym Čornym Halštrowom direktnje při nasypje a pochadźa z 1950tych lět. Nowa roła powjedźe zwonka nasypa. Tónle wotrězk płaći 403 000 eurow.
Wojerowska kulturna fabrika móže nětko za swoje dźěło tak ...
Parkowa železnica wita zaso hosći
Krótkopowěsće (08.04.21)
Incidenca woteběra
Budyšin. Po aktualnym podaću RKI je incidenca korony w Budyskim wokrjesu na 97,7 spadła. Wčera su tu 39 nowoinfekcijow zwěsćili, dohromady je 893 inficěrowanych ludźi. Mjeztym je nimale 14 000 ludźi dwójce šćěpjene. W Zhorjelskim wokrjesu je aktualna incidenca 118,3. Wot 122 nowych inficěrowanych je tam wosom dźěći. Dalša wosoba w starobje 91 lět je zemrěła. Wjace hač 17 000 ludźi je kompletnje šćěpjene.
Nowe Płomjo je online
Budyšin. Aprylske wudaće dźěćaceho časopisa „Płomjo“ je wot wčerawšeho online, zdźěla redaktor Pětr Šołta. Na stronach Rěčneho centruma WITAJ pod www.witaj-sprachzentrum.de čitaja zajimcy mjez druhim wo mumijach, wo prawobydlerjach Ameriki a wo kajkosćach čłowjekow. Dalšej temje stej twórba swětoweje literatury „Mały princ“ a kak su Indianojo w Americe dźensa žiwi.
Wubědźowanja přestorčene
Policija (07.04.21)
Drogi při sebi a w kreji měł
Wojerecy. Młodeho muža, kiž pod wliwom drogow ze swojim Toyota jědźeše, je policija we wčerawšich rańšich hodźinach we Wojerecach lepiła. Při wobchadnej kontroli reagowaše test pola 23lětneho pozitiwnje na wšelakej družinje drogow, mjenujcy na tak mjenowane opiaty a amfetaminy. Tuž jemu zastojnicy dalšu jězbu zakazachu a přikazachu, zo ma krej wotedać. Nimo toho přepoda młody muž zastojnikam plastikowej titce z konopjowym kćenjom kaž tež ze zbytkami kristalineje maćizny.
Filmowa premjera online
Adresu njezabyć!
Budyšin. Hnydom po jutrach su wčera prěnje wuhódanja jutrowneje křižowki Serbskich Nowin do redakcije dóšli. Při tym bě zwěsćić, zo wulki dźěl wotpósłarjow swoju adresu připisał njeje. Tohodla prosy redakcija wo to, zo njech potrjecheni čitarjo swoje wuhódanje hišće raz a z adresu do redakcije pósćelu. Hewak jich dopisy při wulosowanju bohužel wobkedźbować njemóžemy.
30 ławkow k jubilejej
Wojerecy. Na swoje 30lětne wobstaće zhladuje lětsa Wojerowska bydlenjotwarska towaršnosć. Při tej składnosći chcedźa na terenje města dohromady 30 nowych ławkow nastajić. Wobydlerjo su nětko namołwjeni, swoje najlubše městna zapodać, hdźež móhli ławki pozdźišo raz stać. Móžno je to mjez druhim na internetnej stronje www.wh-hy.de. Tam nadeńdu zajimcy kartu města, na kotrejž móža wotpowědnu městnosć nakřižować.
Jutry pod Čornobohom swjećili
Wuježk (MaK/SN/bn). Mjeztym hižo dźewjeć lět pěstuja ewangelscy serbscy wěriwi z Wuježka a wokoliny znowa wožiwjeny, prěnjotnje w lěće 1858 nowinarsce dokumentowany nałožk rańšeho jutrowneho spěwanja. Tež lětsa zetkachu so minjenu njedźelu krótko do schadźenja słónca něhdźe 30 ludźi – nimale telko kaž w zašłych lětach – wšěch generacijow mjez druhim z Bukečanskeje wosady a z Budyšina na ze swěčkami a wohenčkom rozswětlenym Pawlikec statoku pod Čornobohom, zo bychu zrowastanjenje Jezusa ze serbskimi kaž tež z němskimi kěrlušemi swjećili. Tuchwilnym hygieniskim předpisam wotpowědujo dodźeržachu wšitcy přitomni wěstotny wotstawk a wužiwachu škitne nahubniki.
Wuježčanskemu spěwanju přizamkny so serbsce wuhotowana nutrnosć. Friedhard Krawc ze Słóńcy (Großschweidnitz) čitaše z 1. lista japoštoła Pawoła Korinćanam. Epistla namołwja wěriwych, zrowastanjenje Zbóžnika wobstajnje wobswědčeć: „To je naše poselstwo a to je wěra, kotruž sće přiwzali.“
