Popłatk za stejnišća we wobłuku festiwala zwyšeny
Chrósćicy (aha/SN). Poslednja zhromadźizna gmejnskeje rady Chrósćicy we wólbnej dobje 2014 do 2019 započa a zakónči so minjeny štwórtk z njezjawnym dźělom. Mjeztym zo so radźićeljo po bywšej šuli rozhladowachu, kotruž na gmejnske a kulturne srjedźišćo přetwarjeja, rozłožowaše wjesnjanosta Marko Kliman (CDU) mjez druhim, zo njebudu kaž předwidźane wo rjadowanju twarskich naležnosćow wokoło Chróšćanskeje Měroweje dróhi w zjawnym, ale njezjawnym dźělu rěčeć.
Radźićeljo rozjimachu wjacore předłohi, kotrež wšitke jednohłósnje schwalichu. Naćisk lětušeho hospodarskeho plana z jeho přiłohami bě wot 2. do 10. meje zjawnje wupołoženy. Pisomne abo ertne znapřećiwjenja z ludnosće žane njeběchu.
Wšitcy Horjenjo swjeća
Hory. Wjes Hory w gmejnje Halštrowska Hola pohosći lětsa zastupjerjow sydom dalšich wsow z němskim mjenom Bergen, ležacych we wosom zwjazkowych krajach Němskeje. Su to Bergen na kupje Rujany w Mecklenburgsko-Předpomorskej, Bergen we wokrjesu Celle a Bergen nad rěku Dumme w Delnjej Sakskej, Bergen w Posaarskej, Bergen nad rěku Nahe w Porynsko-Pfalcy, Bergen-Enkheim w Hessenskej a chiemgauski Bergen w Bayerskej. Wot 30. meje do 2. junija chcedźa woni zhromadnje swjećić. 1. junija budźe na jewišću zabawny program. Mjez druhim předstajitej so tam Židźinska drastowa skupina kaž tež šulska a domizniska stwa Ptačecy.
Wotkryja Wincarjec studnju
Meju mjetali a zhromadnje spěwali
Zdźěla dołhe rynki před wólbnymi lokalemi
Rakecy (SN/MkWj). Cyłkownje 1 882 wólbokmanych je so w Rakecach na wčerawšich wólbach gmejnskeje rady wobdźěliło, štož wotpowěduje 65,8 procentam. Při tym je Rakečanske Swobodne wolerske zjednoćenstwo z 45,6 procentami jako najsylniša móc wušło. CDU je sej ze 26,2 procentomaj druhe městno wudobyła. Prěni króć budźe AfD (13,6 proc.) z jednym zapósłancom w nowym gmejnskim parlamenće zastupjena. Porno tomu je Lěwica swojeho dotalneho radźićela přisadźiła. Jenož 2,7 procentow bě za tutu stronu hłosowałoj, za Zelenych 2,6 procentow.
Njeswačidło (SN/BŠe).
Policija (27.05.19)
W lěsu so awto paliło
Běła Woda. K njewšědnemu zasadźenju wołachu minjeny pjatk wječor wobornikow w Běłej Wodźe. Tam bě 24lětny z Renaultom po lěsnym pućiku jěł. Jako zawěra dalšu jězbu po pućiku znjemóžni, chcyše ju młody muž wobjěć, wosta pak z awtom na pjenku wisajo. Při pospyće so wuswobodźić, so wupuch wottorhny, tak zo so lěsna póda palić započa a płomjenja na Renault přeskočichu. Prjedy hač alarmowani wobornicy přijědźechu, so tón hižo dospołnje paleše a so skónčnje wupali. Wěcnu škodźe na awće trochuja na něhdźe 7 000 eurow. Škoda w lěsu je porno tomu ze sto eurami snadna.
Krótkopowěsće (27.05.19)
Wjace pjenjez za poskitki
Drježdźany. Sakske kultusowe ministerstwo chce wjace pjenjez za cyłodnjowske poskitki na šulach nałožić. Za šulske lěto 2019/2020 je to 46 milionow eurow na dobro něhdźe 328 000 šulerjow. „To je nimale 19 milionow eurow wjace hač w aktualnym šulskim lěće“, zdźěli dźensa sakski statny minister za kultus Christian Piwarz (CDU).
Wjetšina za kulturnu stolicu
Žitawa. Paralelnje k europskim a komunalnym wólbam mějachu wobydlerjo wo požadanju města Žitawy jako europska kulturna stolica w lěće 2025 wothłosować. Na wobydlerskim rozsudźe wobdźěli so wjace hač połojca wólbokmanych, a woni su namjet ze 74,2 procentomaj přiwzali. Nětko chcedźa iniciatorojo kampanju zesylnić a nimo toho tež čěskich a pólskich susodow zapřijeć.
Přichod zawoda zaručeny
Policija (24.05.19)
Partnerstwo z wuměłstwom
Budyšin. Krótko po měrliwej rewoluciji běchu třo mužojo z Heidelberga prěnje zwiski do Budyšina nawjazali. Pozdźišo wuwi so z toho měšćanske partnerstwo. Lětuše 150. wobstaće Muzeja Budyšin su za wuměłcow z wobeju městow přičina, wuhotować 1. junija we wustajenišću ekspoziciju pod hesłom „Kontekst & kontrowersa“. Mjez wosom wuměłcami je Iris Brankačkowa.
Tež w Hórkach meja padnje
Hórki. Hórčanska młodźina a wjesne towarstwo Při skale přeprošatej jutře, 25. róžownika wot 15.30 hodź na mejemjetanje. Po zhromadnym kofejpiću předstaja wjesne dźěći mały program. Potom chcedźa wone kaž tež młodostni wokoło meje rejować a so wo mejski wjeršk wubědźować. Po tradiciji ma tež kěrluš „Nět meja nazeleni“ zaklinčeć. Dźěći změja zabawu na wulkim skakanskim hrodźe. Młodostni a dalši zajimcy wjesela so na „spěwny wječor“ z Donatec bratrami.
Gmejna zaso w planje
Wuměnjenja za wjacore twarske naprawy w Delanach nětko wutworjene
Róžant (JK/SN). Za zjawny dźěl wčerawšeho posedźenja gmejnskeje rady Ralbicy-Róžant njetrjebachu radźićeljo wjele časa. To je hladajo na to, zo so do wólbow posledni raz zetkachu, dosć přijomne za nich było.
Zajimawy bě jim wuslědk pruwowanja zahajenskeje bilancy gmejny k 31. decembrej 2013. Nimo někotrych hišće trěbnych wudospołnjenjow je bilanca w porjadku. Trěbne a za gmejnu wažne dodawki budu po słowach komornicy Franciski Čapikoweje w naslědnych bilancach zakótwjene. Kaž wona radźićelam zdźěli, je Budyski krajnoradny zarjad gmejny namołwił, njedlić so ze zahajenskimi bilancami naslědnych lět, ale je zaměrnje přewjesć a zakónčić, zo hodźa so pruwować dać. To za komuny rěka, dale wjele prócy za nastajenje bilancow nałožić, štož so runje pozitiwnje na zarjadniske dźěło gmejnow njewuskutkuje.
