Z awtom do kerkow a płotu
Dobropisy předawać započeli
Komuny spytaja swojim wobchodnikam dalokož móžno pomhać, zo bychu ćežki čas koronapandemije přetrali. W Kamjencu maja nětko dobropisy, kotrymž město swój dźěl přida.
Kamjenc (SN/MWj). Podobnje kaž Kulow a dalše komuny tež město Kamjenc wikowarjow, hosćencarjow a posłužbarjow podpěruje. Woni dźě su sobu najsylnišo wot wobmjezowanjow koronapandemije dla potrjecheni. Tohodla je Kamjenska měšćanska rada spočatk februara po swojich móžnosćach wobzamknyła, kak móhła předewzaćelam pomhać. Stać ma so to z dobropisami, kiž Lessingowe město zdźěla sobu płaći a kotrež móža wobydlerjo pola lokalnych předewzaćelow zaměnić.
Ličba dobropisow je na tysac wobmjezowana, rěka w nowinskej zdźělence radnicy. Zajimc móže sej tajki dobropis za 20 eurow kupić. Hač do 30. junija město kóždemu dobropisej dalše dźesać eurow přida, tak zo je cyłkownje 30 eurow hódny. Za tule hódnotu hodźa so potom twory abo posłužby pola wobdźělenych Kamjenskich wikowarjow kupić, kotřiž su so za tónle poskitk přizjewili.
Policija (17.03.21)
Paduch so sam přeradźił
Budyšin. Dokelž njeje lěpje na swoju móšeń kedźbował, je drje so 24lětny muž předwčerawšim po padustwje sam přeradźił. Wón bě dopołdnja w kupnicy na Budyskej Kamjentnej hasy wšelake twory spakosćił a na to ćeknył. Sobudźěłaćer drje spyta jeho zadźeržeć, cuzy pak so jemu wutorhny. Při tym zhubi swoju móšeń, w kotrejž bě mjez druhim personalny wupokaz. Tak je paduch policiji tójšto dźěła zalutował.
Takrjec nowych podružnikow ma wot njedawna Hórčanski Młynkec ...
Krótkopowěsće (17.03.21)
Incidenca zaso pod 100
Budyšin. Budyski wokrjes je wčera wo zwěsćenych dwanaće natyknjenjach z koronu informował. Ličba smjertnych padow rozrosće wo jedyn na 781. Strowotniski zarjad mjenowaše incidencu 109,33, RKI dźensa 83,4. Zhorjelski wokrjes rozprawješe wčera wo 71 nowoinfekcijach, wo dwěmaj smjertnymaj padomaj wot spočatka februara a wo incidency 119,20. RKI poda dźensa 97,3.
Chcedźa čěšćinu nawuknyć
Budyšin. Za lětnjej rěčnej kursaj čěšćiny w Praze a Českich Budějovicach je tuchwilu pjeć serbskich zajimcow. Štyrjo z nich měješe loni hižo připrajenje, jich kurs pak bě korony dla wupadnył. Tak chcedźa so lětsa wobdźělić. Jim přidruži so dalša požadarka, kaž Jadwiga Kaulfürstowa z Rěčneho centruma WITAJ zdźěli. Šesta wosoba ma tuchwilu status narunanskeje kandidatki.
Stela za Marju Grólmusec
Dalše srědki za digitalizaciju
Budyšin (SN/MWj). Runje tak njewšědnu kaž zajimawu předstawu móhli nětko w Budyšinje zwoprawdźić. Tu móžeš bórze nimale 400 lět do zašłosće pohladać a čitać, wo čim běchu čłonojo měšćanskeje rady na přikład na swojim posedźenju w měrcu 1624 rěčeli a što běchu tehdy wobzamknyli. Za to njetrjebaš ani staroněmske pismo wobknježić a móžeš něhdźe po puću abo tež doma być. Wšo to zmóžnjeja spěchowanske srědki Zwjazka k zwoprawdźenju digitalneju projektow, wo kotrež je so Budyski archiwny zwjazk prócował a mjeztym přizwolene dóstał, kaž w nowinskej zdźělence tudyšeho měšćanskeho zarjadnistwa rěka. Jónu jedna so wo to, spřistupnić historiske radne protokole z časa wot lěta 1623 do 1832 přez swobodnu internetnu stronu Read & Search. Tamny projekt je digitalizować a online spřistupnić protokole posedźenjow měšćanskich radźićelow w času wot 1945 do 1990.
Teksty starych radnych protokolow spóznać radźi so z technologiju „Transkribus“, wuwitej we wobłuku projektow Europskeje unije. Wo jeje wudźeržowanje stara so Uniwersita Innsbruck.
Wirtuelnje zhromadnje warili
Policija (16.03.21)
Žona njemdrje zachadźała
Hermanecy. Po wšěm zdaću měšeńca alkohola a drogow je předwčerawšim zasadźenje policije w Hermanecach we Łazowskej gmejnje wuskutkowała. 37lětna žona w swojim bydlenju hewrjekaše, ćisny piwowu blešu do dalšeje žony a randalěrowaše w bydlenju. Jako policisća zakročichu, so njemdra tež do nich da, tak zo dyrbjachu ju z domu wjesć. W bydlenju namakachu marihuanu, pola žony naměrichu 2,6 promilow alkohola.
Kriminalita chětro rozdźělna
Zhorjelska policajska direkcija statistiku za lěto 2020 wozjewiła
Zhorjelc/Budyšin (SN/MWj). Z dokładnje 33 333 padami w lěće 2020 hiba so ličba kriminelnych deliktow we wobłuku Zhorjelskeje policajskeje direkcije dale na niwowje zašłych lět. Wot lěta 2014, jako registrowachu 41 000 padow, ličba wobstajnje woteběra. To wuchadźa ze statistiki lońšeho lěta za Budyski a Zhorjelski wokrjes, kotruž su tele dny wozjewili. Něhdźe dwě třećinje wšěch deliktow móžachu wujasnić. To je pjeć procentow wjace hač w sakskim přerězku, zdźěli policajski prezident Manfred Weißbach. Ćežišćo w najwuchodnišej policajskej direkciji Sakskeje bě wobsydstwowa kriminalita.
We woběmaj wokrjesomaj bě kriminalita loni znowa chětro rozdźělna. Byrnjež w Budyskim wokrjesu z 300 000 wobydlerjemi nimale 50 000 wjace bydliło, hač w Zhorjelskim, bě tu ličba zwěsćenych deliktow wjele mjeńša. Mjeztym zo bě jich w Budyskim wokrjesu 14 470 padow, zličichu w Zhorjelskim 18 863. Wotpowědnje rozdźělnje běchu wobydlerjo potrjecheni. Objektiwniša je ličba njeskutkow, přeličena na 100 000 wobydlerjow. Ta wučinješe w Budyskim wokrjesu 4 827, w Zhorjelskim pak 7 464.
Radźićeljo so schadźuja
Ralbicy. We wobłuku zarjadniskeho zwjazka Při Klóšterskej wodźe změja zajutřišim, štwórtk, hnydom tři gmejnske rady swoje posedźenje. We 18.30 hodź. schadźuja so radźićeljo Ralbic-Róžanta w Ralbičanskej sportowej hali. Na jich dnjowym porjedźe steji mjez druhim wobhospodarjenje wodźiznow druheho rjadu přez firmu Stowasser. Nimo toho chcedźa wutworić poradźowanski gremij za nakup komunalneje techniki.
Pančicy-Kukow. Poł hodźiny pozdźišo, w 19 hodź., započnje so posedźenje gmejnskeje rady Pančic-Kukowa, a to znowa na Wotrowskej starej šuli. Jedna z hłownych temow budźe dalše saněrowanje Pančičanskeje Šule Ćišinskeho. Za to chcedźa twarske nadawki w dohromady šěsć wšelakich losach rozdawać, mjez druhim za sanitarnu instalaciju, milinu a woclotwar.
