Krótkopowěsće (16.06.20)
Dalšu infekciju zwěsćili
Budyšin Mjez 59 testami, kotrež su w Budyskim wokrjesu přewjedli, zwěsćichu wčera dalši pad koronainfekcije. Ličba natyknjenych wučinja nětko dohromady 500. Aktualnje je dźesać schorjenych, pjatnaćo su w karantenje. 471 wosobow je so mjeztym wustrowiło, 19 pacientow je zemrěło.
Pomoc za sakske pomniki
Berlin/Drježdźany. Z 826 000 eurami spěchujetej Zwjazk a Sakska w zwisku z programom „Narodne hódne kulturne pomniki“ štyri sakske pomniki. Z pjenjezami chcedźa židźanu tapetu chinskeho kabineta na hrodźe Wildenfels a špundowanje w modlerni Ochranowskeje bratrowskeje wosady wobnowić. Dale maja so w Drježdźanach narowne pomniki na ewangelskim Janskim a Eliasowym kaž tež na bywšim kěrchowje cyrkwje Našeje knjenje zwuporjedźeć.
Šupy a nercy třěleć dowolene
Smjertnej woporaj njezboža
Ludowy dom a dalše pomniki chcedźa zachować
Běła Woda (AK/SN). Historiske twarjenja w Běłej Wodźe – tak něhdyša Gelsdorfec hěta jako najstarša škleńčernja města, ludowy dom a škleńčerska fachowa šula – měli so nuznje před rozpadom zachować. To žadaše sej předsyda pomnikoweje komisije města Karl-Heinz Melcher w swojej rozprawje na zašłym posedźenju měšćanskeje rady. „Přirunujo ze Zhorjelcom, Žitawu a Lubijom mamy wjele mjenje pomnikow. Dyrbjeli pak z tym, štož mamy, čućiwje wobchadźeć. Jako pomnikowa komisija chcemy so za to zasadźeć“, jeje předsyda rjekny.
Policija (15.06.20)
Muža z blešu zranił
Wojerecy. K namócnemu rozestajenju dóńdźe sobotu we Wojerowskim dejnerowym wobchodźe. Tam je so 29lětny muž z rozbitej blešu do 50lětneho dał a jeho na ruce zranił. Rany dyrbjachu w bliskim klinikumje lěkarsce zastarać. Přiwołani policisća skućićela najprjedy raz zajachu. Pola njeho naměrichu 1,82 promilow alkohola w kreji. Po tym zo su wšitke trěbne policajske naprawy zakónčili, 29lětneho zaso pušćichu.
Znowa do „Sundownera“
Budyšin. Na zahrodźe Serbskeho ludoweho ansambla změja tež lětsa baru „Sundowner“. Chcedźa ju w juliju a awgusće pod hesłom „Dobra kapka woła, hdyž so słónco chowa“ wopytowarjam spřistupnić. Zarjadowar Beno Brězan je zrěčenje z SLA mjeztym podpisał a chce so z partnerami na poskitki dojednać.
Durje wirtuelnje wotewru
Bohata hasa budźe twarnišćo
Po žadanju wikowarjow a hosćencarjow dźěła na nazymu přestorčili
Budyšin (SN/MWj). Wot spočatka septembra hač do kónca oktobra budźe na Budyskej Bohatej hasy milinowe zastaranje ponowjene. Kaž ze zdźělenki měšćanskeho zarjadnistwa wuchadźa, dyrbja to činić, dokelž bě w zašłosći časćišo k wupadam miliny we wobłuku zarjadowanjow dóšło. Nimo toho je potrjeba za milinu dźensa wjetša dyžli před lětami.
Ekokonto, kotrež so zadani
Njebjelčanska gmejna z pomocu eko-konta tójšto na nohi staja. Zo je to tež po něšto lětach přeco hišće njezwučene a zo z tym te abo tamne prašenje zwisuje, je zašłe posedźenje gmejnskich radźićelow pokazało.
Njebjelčicy (JK/SN). Štóž ma njebjesa na zemi, tomu so derje dźe a tón ničo wustać nima. Podobnje dźe so Njebjelčanskej gmejnje, kotraž hižo někotre lěta projekt „Njebjesa“ njedaloko Miłočanskeje žaby pěstuje. Tón chcedźa nětko dale wukmanić, zo by so z woprawdźitym žohnowanjom za wokolinu a tamniši teren stał. Komuna planuje tam hromadźe z fachowcami permakultury a přirodoškita hat připrawić, kotryž nima jenož krajinu wobohaćić, ale změje nimo ekologiskeje funkcije jako biotop tež nadawk nastupajo škit před wulkej wodu.
We wobłuku akcije wotewrjenych zahrodowych durčkow běchu wčera w ...
Krótkopowěsće (15.06.20)
W Braniborskej AfD wobkedźbuja
Podstupim. Braniborski wustawowy škit po dlěšim pruwowanju dospołnu AfD wobkedźbuje. To zdźěli nutřkowne ministerstwo powěsćerni dpa dźensa w Podstupimje. Rozsud zwisuje z wuwićom po wuzamknjenju krajneho a frakciskeho šefa Andreasa Kalbitza ze strony, mjez druhim ze změnu jednanskeho porjada frakcije krajneho sejma, zo móhł Kalbitz jej dale přisłušeć.
Myto Brücke-Most do Israela
Zhorjelc. Bywšu wonkownu ministerku Israela Tzipi Livi počesća z lětušim Mjezynarodnym mytom Brücke-Most europskeho města Zhorjelca-Zgrorzeleca. Wo tym je towaršnosć za spožčenje myta wčera informowała. Politikarka je znata za swobodniske myslenje, demokratiju, wotewrjenosć a čłowjeskosć, z čimž sćělesnja ideju za mytom Brücke-Most.
Serbski knižny kófer zaso po puću
Policija (12.06.20)
Hobbyjowy nurjak w nuzy pomhał
Wojerecy. Zo hodźi so nurjenska technika tež za hinaše zaměry wužiwać, je předwčerawšim muž we Wojerecach dopokazał. Wobydlerka wjaceswójbneho domu je tam cokorowy sirup wariła a po wšěm zdaću na hornc zabyła, tak zo so z njeho chětro kurić započa. Kuražěrowany susod a hobbyjowy nurjak dźěše na to ze swojej nurjenskej techniku do bydlenja žony a donjese hornc won. Žana wěcna škoda tuž njenasta, a zranił so tež nichtó njeje. Alarmowani wohnjowi wobornicy móžachu swoje zasadźenje spěšnje skónčić. Zasadnje pak policija radźi, w padźe wohenja na kóždy pad wohnjowu woboru informować a njewustajić so sam móžnemu strachej. Přiwšěm so kameradojo zmužitemu wobydlerjej za jeho njesebične jednanje dźakuja.
