Budyšin (CS/SN). Budyska hwězdarnja „Johannes Franz“ swjeći klětu 150. róčnicu wobstaća. Hinak hač sej poprawom myslachu, hodźi so jeje započatk dobroćelej Friedrichej Karlej Gustavej Stieberej (1801–1867) přiličić. Tón bě w swojim testamenće městu teleskop wotkazał, kotryž nastajichu najprjedy na zahrodu měšćanskeho gymnazija, dźens­nišeho Melanchthonoweho. To su šulerjo Serbskeho gymnazija we wobłuku slědźerskeho dźěła wotkryli. Do toho wšak z toho wuchadźachu, zo sahaja spočatki šulskeje hwězdarnje do lěta 1922.

Čłonojo spěchowanskeho towarstwa so hižo nětko na jubilej přihotuja. Wo­swjećić chcedźa jón ze wšelakimi za­rjadowanjemi cyłe lěto 2022. Jedyn z wjerškow budźe sympozij kónc meje, wěnowacy so temje šulska astronomija. Přeprošeny je mjez druhim prof. dr. ­Dieter Herrmann z Berlina. K jubilejej zestajeja tež němsko-serbsku nasćěnowu protyku ze šulerskimi dźěłami. W přihotach toho su wuměłstwowe kubłarki kaž dr. Sabine Kambach pomhali. Planowana je tohorunja wustajeńca w zhromadnym dźěle z filatelistiskim towarstwom w Budyskej „Krónje“.

Lejno (SN/MWj). Na njezjawnych zhromadźiznach zarjadniskeho zwjazka Při Klóšterskej wodźe ma so přichodnje dokładnišo na to kedźbować, štó smě so ­na nich wobdźělić a diskusiju sćěhować. Po wšěm zdaću je so w tym nastupanju 9. měrca zmylk stał, jako wjedźechu horcu diskusiju wo personalnych prašenjach. Tu kaž tež při wothłosowanju běchu někotři sobudźěłaćerjo zarjadniskeho zwjazka pódla, su wothłosowanje sobu sćěhowali a samo hišće komentowali. Za to je so předsyda zarjadniskeho zwjazka Měrko Domaška na wčerawšim zjawnym posedźenju gremija w Lejnjanskim hosćencu zamołwił. „To so hižo stać njebudźe“, wón přilubi.

Přihotuja so tež na interne wuradźowanje wo móžnej nowej pěstowarni

Njeswačidło (JK/SN). Wobnowjenje dweju komunalneju dróhow w Njeswačanskej gmejnje je rozsudźene. Na prioritnej lisćinje cyle horjeka stejacej hasy Při nowym hrodźe w Njeswačidle a Při kuble w Dobrošicach budźetej ponowjenej. Na wčerawšim posedźenju Njeswačanskeje gmejnskeje rady přepo­dachu nadawk za inženjerske planowanje dróhotwarskich naprawow Drježdźanskej firmje Communalconcept Peter Linke. Tak maja předwidźane, dróze z bitumenowym pokrywom skrućić kaž tež bankety wobnowić a wotwodźowanje dešćikoweje wody z dróhi wobnowić. Za to budźe komunje k dis­poziciji stejaca suma 69 000 eurow dosahać, kaž wčera zdźělichu. W tej sumje su tež wudawki za inženjerske dźěła zapři­jate. Kaž wupada, drje tuchwilu w gmejnje dźěłaca dróho­twarska firma Kutter z Plaue nadawk dóstanje mjenowanej hasy wobnowić. To pak gmejnscy radźićeljo hakle po tym, hdyž su inženjerske předdźěła wotzamknjene, roz­sudźa.