Za dwurěčne wuswědčenja

Podstupim. Šulerska rada wokrjesa Sprjewja-Nysa je iniciatiwu za dwurěčne němsko-serbske wuswědčenja nastorčiła. Jeje předsyda Justin Pigol je ju dźensa na posedźenju Rady za naležnosće Serbow w Podstupimje předstajił. Šulerska rada bě zwěsćiła, zo jenož w Delnjoserbskim gymnaziju Choćebuz a w Bórkowskej šuli „Mina Witkojc“ braniborske zarjadniske postajenje nastupajo dwurěčne wuswědčenja na kubłanišćach ze serbskej wučbu dodźerža.

Dalšu infekciju zwěsćili

Budyšin. Mjez 46 testami su w Budyskim wokrjesu wčera dalšu infekciju z koronawirusom zwěsćili. Cyłkowna ličba­ natyknjenych je wot wčerawšeho dale 501. Po dźensnišim stawje su tři wosoby schorjene. Aktualnje je 45 wosobow w karantenje.

Rekordne wobydlerstwo

Wiesbaden. Zwjazkowy statistiski zarjad­ je rekordnu ličbu wobydlerjow Němske­je zwěsćił. Loni zličichu dohromady 83,2 milionaj ludźi, štož je něhdźe 15 000 wjace hač lěto do toho. Najwjetši bě rozrost w Berlinje, porno tomu je so lič­ba wobydlerstwa w Durinskej, Saksko-Anhaltskej a Posaarskej najbóle pomjeńšiła.

Składnosć znjewužiwali

Kamjenc. Njeznaći su předwčerawšim w Kamjencu njekedźbliwosć wobsedźerja wosoboweho awta, kiž bě wokno na ­prawym boku jězdźidła jeno přizačinjene wostajił, šamale znjewužiwali. Skućićeljo sahnychu přez wokno a wotamknychu durje. Na to spakosćichu ručnu ­tobołku, w kotrejž běchu 60 eurow, ­wupokaz a dalše wosobinske wěcy wobsedźerja. W tym zwisku policija na to skedźbnja, zo je minjeny čas wjacekróć k tajkim ­deliktam dóšło. Šoferojo a sobujěducy měli na to kedźbować, zo w awće žane hódnotne wěcy widźomnje ­ležo njewostaja.

Chcedźa sportowe zarjadowanje při Třižonjanskim jězoru tež lětsa přewjesć

Łaz (AK/SN). Lětuše triatlonowe wubědźowanje KnappenMan při Třižonjanskim jězoru chcedza korony dla z wobmjezowanjemi a krutymi postajenjemi po móžnosći 29. a 30. awgusta přewjesć. To zdźěli Łazowski wjesnjanosta Thomas ­Leberecht (CDU) předwčerawšim ­ Łazowskim gmejnskim radźićićelam na posedźenju. Po tuchwilnych planach přewjedu zarjadowanje w mjeńšej formje. Njebudźe pak žanoho wubědźowanja za dźěći, kaž su je hewak poskićeli. Jenož dorosćeni sportowcy sami smědźa so w tak mjenowanym nutřkownym wobłuku ­pohibo­- wać. Wopytowarjo dyrbja za ­zašlahanjemi wostać. Nimo toho nje­změja žane pře­dawanišća zakuskow a napojow za přihladowarjow. „Smy dobreje mysle“, rjekny Leberecht, kiž přihoty z wjacorymi partnerami wobstajnje wothłosuje.

Rakecy (JK/SN). Dobre hospodarjenje minjenych lět po konsolidaciji w Rakečanskej gmejnje so wuskutkuje. Na wčerawšim posedźenju gmejnskeje rady, znowa w awli Pawołskeje šule, su nětko šćežku za ponowjenje zakładneje šule runali. ­Hižo loni běchu tam tepidła a wodowody saněrowali, za lětsa je předwidźane, tepjensku připrawu přetwarić a garderoby wobnowić. Nastupajo tepjenje radźićeljo wčera wobzamknychu, šulske kubłanišćo přichodnje ze zemskim płunom tepić. K tomu předstaji sobudźěłaćer energijoweho předewzaća ENSO projekt, kotryž změje za gmejnu njemało lěpšin.

Nimo toho, zo ENSO wšitko instaluje a w přichodnych 20 lětach tež hlada a wobhospodarja, budźe gmejna za tepjenje čujomnje mjenje pjenjez trjebać. Za nowe 300 kilowattow sylne tepjenje dyrbja hišće hač k šuli płunowód połožić. Trěbne 100 metrow rołow za to ENSO zwoprawdźi, a hišće do noweje tepjenskeje sezony ma wšitko hotowe być. Wudawki gmejna za nowe tepjenje žane njezměje, jeno přetrjebany płun dyrbi wona přichodnje płaćić.