Posedźenje najebać krizu
Rakečanska gmejnska rada so pod wuwzaćnymi wuměnjenjemi zetkała
Rakecy (JK/SN). Awla Pawołskeje šule spjelnješe předwčerawšim za posedźenje Rakečanskeje gmejnskeje rady wuměnjenja, kotrež maja so pod tuchwilnymi krizowymi poměrami dodźeržeć. Dosć wotstawka mjez sobu zaručichu we wulkim kole nastajene separatne blida a wjesnjanosta Swen Nowotny (CDU) rozdźěleše na spočatku posedźenja hišće k tomu škitne maski za hubu a nós, kotrež pak nichtó z přitomnych njewužiwaše.
Trěbne posedźenje bě, dokelž bě so po słowach wjesnjanosty dosć naležnosćow nahromadźiło, wo kotrychž by so měło w přitomnosći wšitkich radźićelow wuradźować. K zazběhej Nowotny radźićelow informowaše, kak je gmejnski zarjad w minjenym napjatym času dźěławosć a docpějomnosć za wobydlerjow zaručił. Dźěłaja tam z dwěmaj njewotwisnymaj mustwomaj, kotrejž běžne nadawki zarjadnistwa spjelnitej a kontakty k krajnoradnemu zarjadej w Budyšinje a k wobydlerjam a towarstwam wudźeržujetej, štož je dźakowano modernym komunikaciskim srědkam derje móžno.
Pomhaja zwěrjencam
Mały Wjelkow (SN). Kriza korony dla potrjechi njeličomne wobłuki. Tež wólnočasne zarjadnišća su hižo tydźenje zawrjene, tak zo jim dochody pobrachuja. Potrjecheny je tohorunja Małowjelkowski prazwěrjenc. „Chcemy pak w tymle ćežkim a njezwučenym času rady tych trochu podpěrać, kotřiž maja to sobu najbóle trěbne, mjenujcy coologiske zahrody a zwěrjency. Wone trjebaja nuznje pjenjezy za picu, skótneho lěkarja a za personalne wudawki“, praji Volker Bartko, jednaćel Budyskeje wobdźělenskeje a wobhospodarjenskeje towaršnosće (BBB), kotraž ma Małowjelkowski park na starosći.
Prazwěrjenc chce přichodne dny hornjołužiskim zwěrjencam w Zhorjelcu, Žitawje, Běłej Wodźe, Biskopicach a Wojerecach stajnje 5 000 eurow darić. „Naše prazwěrjata drje su runje tak samotne kaž druhe, wone pak ničo nježeru a tuž chcemy rady zwěrjata picować pomhać, kotrež maja to nuznje trjeba“, doda Volker Bartko z posměwkom. Wón so nadźija, zo móža Małowjelkowski park kaž tež zwěrjency a coologiske zahrody bórze zaso wočinić a wopytowarjow witać.
Policija (17.04.20)
Přewjele alkohola pił
Chrósćicy. Chwilu swojeho awta wzdać drje dyrbi so přichodnje muž, kotrehož lepi policija předwčerawšim wječor w Chrósćicach. Tam zadźeržachu 49lětneho wodźerja Škody na Pomnikowym puću. Z alkoholowym testom zastojnicy zwěsćichu, zo měješe wón 1,26 promilow alkohola w kreji. Dalša konsekwenca bě, zo dyrbješe potrjecheny krej wotedać. Nimo toho přizjewichu policisća delikt wopiłstwa w nadróžnym wobchadźe a sćazachu jězbnu dowolnosć.
Poradźuja telefonisce
Přidatny čas zmysłapołnje wužiłoj
Wuwzaćny staw wulki narok
Serbske Nowiny namołwjeja swojich čitarjow pod nadpismom „Wostanjemy doma!“ dopisować, što za čas koronakrizy doma abo w zahrodce tak činiće. Kak kreatiwni sće a što wam k přeprěčenju tohole ćežkeho časa do mysli přińdźe, z čimž móhli so zaběrać. Pisajće nam na . K tomu podajće prošu hesło „Wostanjemy doma!“. Čakamy na waše dopisy, wobrazy a rysowanki a wuprajamy hižo nětko wutrobny dźak. Anja Nowakowa ze Sernjan pisa:
W Mučowje pola Wojerec saněruje hłubokotwarska firma tuchwilu ...
Krótkopowěsće (17.04.20)
Dalšej wosobje zemrěłoj
Zhorjelc/Budyšin. W Nisčanskej hladarni je sej koronawirus póndźelu dalšej smjertnej woporaj žadał. Cyłkownje zemrě dotal w Zhorjelskim wokrjesu třinaće ludźi w zwisku z pandemiju. Wčera mějachu we wokrjesu 232 inficěrowanych (+6). W Budyskim bě jich 308 (+4). Ličba dotalnych pjeć zemrětych so tu njeje dale stopnjowała.
Busy zaso normalnje jězdźa
Budyšin. Wšitke zjawne busowe linije w Budyskim wokrjesu so wot póndźele, 20. apryla, zaso po normalnym, na šulskich dnjach płaćiwym jězbnym planje posłužuja, kaž krajnoradny zarjad informuje. Pasažěrojo w busach maja rjadowanja nastupajo wotstawk wobkedźbować a jězdźenki w předawarnjach kupić. Přez durje pódla šofera dale móžno njeje do busa zastupić abo wulězć.
Wirtuelne kino doma
Policija (16.04.20)
Zadobywarjo grat ležo wostajili
Hodźij. Njeznaći su so předwčerawšim wječor do wobchoda na Budyskej dróze w Hodźiju zadobyli. Woni łamachu so namócnje do běrowowych rumnosćow a spytachu tam trezor wočinić. Jako so jim to njeporadźi, woni ćeknychu, swój sobu přinjeseny grat pak wostajichu ležo. Alarmowana policija drje za skućićelemi pytaše, njemóžeše pak jich lepić. Načinjenu wěcnu škodu trochuja mějićeljo wobchoda na 5 000 eurow.
Seminar přez internet
Budyšin. Wobrazy lokalnych telewizijnych sćelakow z časa wot 1990 do 1995 budu hłowna tema webinara, potajkim seminara přez internet, kotryž wotměje so štwórtk, 23. apryla, we 18 hodź. Referentaj budźetaj prof. Rüdiger Steinmetz a dr. Judith Kretzschmar z Lipšćanskeho instituta za domizniske a transformaciske slědźenje. Po fachowym zawodźe pokazaja wurězki lokalnych sćelakow z Biskopic, Lubuša, Lipska, Zhorjelca a wot druhdźe. Na to móža wobdźělnicy wo swojich dopomnjenkach na čas politiskeho přewróta rěčeć. Projekt přewjedźe so hromadźe z Budyskim studijom SAEK. Štóž chce so w syći na webinarje wobdźělić, njech přizjewi so internetnje pod www.saek.de.
Pobrjóh jězora zawrjeny
Wojerecy. Koronoweje pandemije dla wostanje zapadny pobrjóh Šibojskeho jězora za kupanje zawrjeny. Tole zdźěli Wojerowske měšćanske zarjadnistwo. Jeli so kontaktne zakazy přichodne dny wolóža abo zběhnu, móhła so 15. meje lětuša kupanska sezona při Šibojskim jězoru zahajić. W minjenymaj lětomaj bě tam kupanje nachwilnje dowolene.
