Njepředzajeće a wćipnje sobu dźěłać
Swójbne korjenje Marcela Fröschla leža w Rachlowje. Jeho prawowka je hišće wšědnje serbsku narodnu drastu nosyła a tohorunja běžnje serbsce rěčała. Tež jeho wowka rozumješe a rěčeše serbsce. „Wjele njeje wjac wyše“, měni 45lětny Wojerowčan.
Za stronu AfD sedźi Marcel Fröschl we Wojerowskej měšćanskej radźe kaž tež w Budyskim wokrjesnym sejmiku. Za to bě so z konserwatiwnych a racionalnych přičin rozsudźił, kaž sam praji. Rodźeny Wojerowčan je jednaćel onlinoweho wikowanja za awtowy přisłušk. Prěni raz je Fröschl z čłonom přirady za serbske naležnosće města Wojerecy. W gremiju je druhi naměstnik předsydy a pisar. Swoje dźěćatstwo dožiwi 45lětny we Wojerecach. Prěnje lěta je tam tež do 23. wyšeje šule chodźił. Jeho staršej pak ćehnješe do zapada. W Bad Mergentheimje so hólčec hakle po času a chětro ćežko na nowe wobstejnosće zwuči. „Wěm, kak je, hdyž jako ćěkanc přichadźeš“, měni wón dźensa. W lěće 2004 załoži swójsku firmu a přesydli so z njej dwě lěće pozdźišo do Wojerec.
Serbscy młodostni znowa atakowani
Domowina nadźija so krutych chłostanjow
Šunow/Zhorjelc (SN/JaW). Minjeny pjatk su w Šunowje znowa serbskich młodostnych nadběhowali. To wobkrući Serbskim Nowinam prěni policajski wyši komisar a nawoda direkciskeho běrowa policije w Zhorjelcu André Schäfer.
Kaž Schäfer na naprašowanje dale zdźěli, bu „policija sobotu rano něhdźe w dwěmaj wo rozestajenjach a namócnosćach w Šunowje před hosćencom informowana“. Při tym so 20- a 21lětny muž lochce zraništaj. Nimo toho bu awto wobškodźene. „Wjacore jězdźidła Kamjenskeje policajskeje straže a z wobłuka Zhorjelskeje policajskeje direkcije běchu zasadźene.“
Po rešeršach SN wotměwaše so pjatk wječor w Šunowje kóždolětna póstnička Budyskeho Serbskeho gymnazija. Za čas tradicionalneho programa dwanatkow wšak je zarjadowanje zawrjene. Programej so přizamkowace reje pak su wšitkim zajimcam přistupne.
Krótkopowěsće (12.02.20)
Nowa kniha Diany Hickec wušła
Berlin. Pod titulom „Nach der Einsprachigkeit – Slavisch-deutsche Texte transkulturell“ je w rjedźe „Postcolonial Perspectives on Eastern Europe“ w Berlinskim nakładnistwje Peter Lang nowa kniha slawistki dr. Diany Hickec wušła. Mjez druhim zaběra so wona ze serbskej jako splećenej literaturu. Nimo toho je cyły kapitl specifiskej poetice Jurja Brězana w romanje „Krabat“ wěnowała.
Wukładnišćo za sakske namakanki
Drježdźany. Sakski krajny zarjad za archeologiju poskići nowu internetnu platformu, na kotrejž předstaja archeologiske namakanki. Jónkrótne w Němskej je, zo woni přirunujo z podobnymi prezentacijemi tam žane fota abo rysowanki njeprezentuja, ale 3D-modele. Studenća Drježdźanskeje fachoweje wysokeje šule su internetnu prezentaciju wuhotowali. Dotal 100 namakankow tam předstajeja.
Čěske wizumy požadane
Pjenjezy za wjesne wjerški zběrali
Prócuja so wo spěchowanje za porjeńšenje kupy
Ničo snadniše hač wuwiće wjesneje zhromadnosće steješe w srjedźišću njedawneho rozmołwneho wječora we Worklecach. Gmejnski zwjazk CDU je do hrodu maltezow přeprosył.
Worklecy (BWa/SN). Nimale 60 wjesnjanow a zamołwitych je njedawno we Worklečanskim hrodźe maltezow wo přichodźe wsy diskutowało. K tomu přeprosychu sej jako hosći Stephana Freiherra Spies von Büllesheim z rjadu maltezow a swojeho wjesnjana Carstena Šnajdera, kiž chce něhdyšu Worklečansku kupnicu přetwarić a jej nowy nadawk dać.
Wobydlerski serwis zachować
Wojerecy (AK/SN). Budyski wokrjes chce swój wobydlerski běrow na Wojerowskim Hrodowym naměsće w tuchwilnym wobjimje wobchować. To samsne přitrjechi za strowotniski zarjad, powšitkownu socialnu słužbu a přizjewjernju awtow. Tole přilubi přirjadnik krajneho rady Udo Wićaz na zašłym posedźenju Wojerowskeje měšćanskeje rady.
„Z dźensnišeho wida změjemy hač do lěta 2024 na Hrodowym naměsće dohromady 88 dźěłowych městnow, na Einsteinowej 110 a na Dillingerowej pjeć“, Wićaz rozłoži. „Kajke budźe wuwiće po 2025, njeje jasne“. Po wšěm zdaću budźe ličba sobudźěłaćerjow wokrjesa we Wojerowskim jobowym centrumje a w młodźinskim zarjedźe potom woteběrać. Porno tomu drje budźe wona w socialnym zarjedźe stupać. Móžno zo wokrjes swoju imobiliju na Einsteinowej zawrěje a wšitke posłužbowe wobłuki na Hrodowym naměsće koncentruje. „Chcemy je na kóždy pad tež po 2025 w połnym wobjimje zachować“, praji Wićaz.
Serbske blido w stolicy
Berlin. Přichodne Serbske blido w Berlinje budźe zajutřišim, štwórtk, 13. februara, w 16 hodź. w hosćencu EINSTEIN KAFFEE na Friedrichowej 206. Hosćenc je bjezposrědnje pódla bywšeho namjezneho přechoda Checkpoint Charlie. Zajimcy su wutrobnje witani.
Posołow nalěća sej wobhladać
Budyšin. Nic jeno za prózdninske dźěći je myslene zarjadowanje jutře, srjedu, we 18 hodź. w Budyskej hwězdarni. Tam móža sej zajimcy prěnich astronomiskich posołow nalěća wobhladać, kotrež su we hwězdnu lawa poněčim widźeć. Zastup płaći tři eura, swójbny lisćik pjeć.
Policija (11.02.20)
W gmejnskim domje pobyli
Němcy. Zawčerawšim dopołdnja dyrbjachu w Němcach zwěsćić, zo bě so tam w nocy do toho něchtó do gmejnskeho twarjenja při hłownym puću zadobył. Paduši běchu wšitke rumnosće přepytali a njeznatu sumu pjenjez sobu wzali. Wěcna škoda wučinja po informacijach policije něhdźe 2 000 eurow.
Dny stareho hosćenca su ličene
Kaž žane druhe twarske předewzaće minjenych lět w Pančicach-Kukowje budźe wottorhanje stareho hosćenca wonkowny napohlad wsy změnić. Na zašłym posedźenju gmejnskeje rady so z tejle temu hnydom wjacore razy zaběrachu.
Pančicy-Kukow (SN/MWj). Hač do kónca apryla ma stary hosćenc w Pančicach-Kukowje spotorhany być. Wulka hromada twaršćiznow drje potom hišće wotnjesena być njetrjeba, ale twarjenja maja takrjec spowalene być, zo njebychu hižo žane hnězdźenske móžnosće za njetopyrje abo ptački eksistowali. Tole zdźěli wjesnjanosta Markus Kreuz (CDU) na zašłym posedźenju gmejnskeje rady we Wotrowskej starej šuli. Tam jeho radźićeljo społnomócnichu, nadawk wottorhanja firmje přepodać.
Krótkopowěsće (11.02.20)
Žadaja sej wyšu mzdu
Budyšin. W Budyskim wokrjesu maja sobudźěłaćerjo fastfood-hosćencow dóstać wjace pjenjez. Dźěłarnistwo cyroba-požitk-hosćency (NGG) žada sej z aktualnych tarifowych jednanjow znajmjeńša dwanaće eurow na hodźinu jako „mzdu přećiwo chudobje“. Dotal běchu dźěłodawarjo čujomne zwyšenje mzdy blokowali. Sobudźěłaćerjo dóstawaja dotal na hodźinu zwjetša minimalnu mzdu we wysokosći 9,35 eurow.
Wutworja wukubłanišćo
Budyšin. Budyski předewzaćel Jörg Drews je připowědźił wutworić lětsa powołansko-kubłanski centrum za potrjebu w swójskim předewzaću. Wuchadźišćo za to bě lońši dźeń wotewrjenych duri, na kotrymž běštej předewšěm mnohostronskosć rjemjesła a předstajenje jako wukubłanski zawod zajimcow přiwabiłoj. Ličba sobudźěłaćerjow rosće runje tak kaž twarske projekty a wobrot.
Zaměstnja slědźenišćo
