Krótkopowěsće (31.08.18)
Přihotuja nowy knižny rjad
Slepo. Towarstwo Kólesko přihotuje nowy rjad knihow. Wěnować chcedźa so w nich narodnym drastam Slepjanskeho regiona. Prěni dźěl ma kónc lěta wuńć, zdźěli předsyda Hartmut Hančo. Na 220 stronach rozłožuja mjez druhim zajimawosće wosom dźěćetkow Slepjanskeje wosady. Hłowna awtorka Elvira Rathner wopisuje w knize zdobom šiće drasty a kak so ju prawje zhotować.
Serbskosć sylnišo pokazować
Zły Komowrow. Serbskosć a dwurěčnosć města a měšćanskich dźělow Złeho Komorowa matej so sylnišo w zjawnosći jewić. Za to chce město zakładne wustawki změnić a zamołwiteho za serbske naležnosće powołać, zdźěla delnjoserbski rozhłós. Tučasnje wo tym we wuběrkach rěča, hač do 12. septembra chcedźa rozsudźić. Zły Komorow přisłuša wot lońšeho serbskemu sydlenskemu rumej.
Steinbach budźe nowy minister
Kórkowy seminar wopytali
Składnostnje 20 lětneho wobstaća swojeho wjesneho kluba Při winicy poda so minjenu njedźelu wjace hač 40 Smječkečanow na zhromadny wulět do Błótow. Po wobjedźe w Lubnjowje dachu so z čołmikomaj na Lědy wjezć. W tamnišim muzeju móžachu nazhonić, kak Błótowčenjo spočatk 19. lětstotka sydlachu. Na štyrjoch originalnych burskich statokach je předstajene, kajke bě žiwjenje bjez elektriskich nastrojow a bjez wody z honača. Wosebje za dźěći bě zajimawe, jako móžachu wuspytać w drjewjancach běhać a z pomocu šudrawy drastu płokać.
Wosebity wjeršk bě popołdnju wobdźělenje na „kórkowym seminarje“ pola Gizele Christloweje w Lubinje. W narodnej drasće předstaji Serbowka Smječkečanam z wjele humorom zajimawostki kołowokoło kórki. Pětr Brězan
Policija (30.08.18)
W kupnicy z winom mjetali
Běła Woda. Winowe jahodki na so mjetali su mužej w starobje 38 a 46 lět kaž tež 33lětna žona zawčerawšim w Běłowodźanskej kupnicy. Ze žorta pak bu chutna naležnosć, kotraž wuwjercholi w rozestajenju a skónčnje w bijeńcy. Tak dyrbješe policija zakročić a wobdźělenych změrować. Wšitcy třo změja so zranjenja ćěła dla zamołwić.
Šansy a rizika wotwažować
Měšćanska rada Biskopic chce pruwować, kak kulturny dom wužiwać
Biskopicy (UM/SN). Wo dalšich krokach nastupajo Biskopičanski kulturny dom je so zawčerawšim tamniša měšćanska rada dorozumiła. Tak chcedźa nětko nanajspěšnišo – ale hakle po zwěsćenju spěchowanskich móžnosćow – studiju zdźěłać, kak hodźał so dom dale wužiwać. „Zaměr je wotwažować, kotre šansy a rizika su z namjetom hospodarskeho spěchowanskeho towarstwa zwjazane dom na zarjadniski, konferencny a kulturny centrum přetworić“, rozłoži wyši měšćanosta Holm Große (njestronjan). W tym wobłuku chcedźa tohorunja wšelake wobhospodarjenske modele pruwować, samo tón, załožbu wutworić.
Na alpskim rohu so pospytali
Serbske kamuški na festiwalu
Na wobydlerjow a wopytowarjow sprjewineho města Budyšina čaka wot jutřišeho pjatka hač do njedźele nowosć. Prěni raz přewjedu tu staroměšćanski festiwal. Wón skići na mnohich městnach njeličomne poskitki. Mjez nimi budu tež někotre serbske, kotrež sej wobhladać so zadani.
Budyšin (SN). Na prěnim staroměšćanskim festiwalu wot jutřišeho hač do njedźele w Budyšinje, kotryž steji pod hesłom „Woda–wuměłstwo–swětło“, wobdźěli so mjez druhim Serbska kulturna informacija ze wšelakimi partnerami. Sobotu a njedźelu poskići wona na dworje Röhrscheidtoweje bašty wot 10 do 18 hodź. informacije k serbskej kulturje a mały wuběr wudźěłkow. Wopytowarjow zabawjeć chcedźa z cyle nowej zajimawosću, mjenujcy z pohladnjenjom přez wosebite 360°-nawoči na krótke wideja wo wšelakich serbskich nałožkach.
Probowy rěz hdys a hdys trěbny
Bjezbarjernosć dale wažny zaměr
Zhorjelc (AK/SN). Bjezbarjerne planowanje a twarjenje kaž tež bjezbarjerna mobilita su w Zhorjelskim wokrjesu dźeń a wažniše. To je Elvira Mirle, mjeztym dźewjeć lět hłownohamtsce zamołwita wokrjesa za naležnosće zbrašenych, na minjenym posedźenju wokrjesneho sejmika podšmórnyła. „Jeničce wot januara hač do junija 2018 sym 35 pisomnych stejišćow zhotowiła, k tomu přińdu terminy na městnje a telefoniske naprašowanja. Kontakty k planowarjam a architektam su přiběrali“, rozłoži něhdyša sportowa wučerka z Mikowa. Jako hłownohamtska społnomócnjena je wona Zhorjelskemu krajnemu radźe Berndej Lanzy (CDU) direktnje podrjadowana.
