Móst při pućowanskej šćežce gmejnu starosći
Njeswačidło (JK/SN). Wokoło Njeswačidła je tójšto přirodnych zajimawostkow. K mnohim z nich přińdźeš po přijomnych pućowanskich šćežkach, kotrež so po krajinje wija. Jedna tajka wjedźe po Łučnym puću ze wsy won do směra na Mały Holešow. Tam dyrbja pućowarjo přez móst nad Čornicu. A runje tón móst gmejnje starosće načinja. Wokomiknje drje hodźi so hišće wužiwać, ale w zajimje wěstoty by lěpje było, jón z nowymi platami pokłasć a tak na wjele lět zaso za wěste wužiwanje wukmanić. Hižo dlěši čas prócuje so komuna wo wotpowědnje hodźace so betonowe platy, kotrež móhli tam ležace, chětro přetrjebane, narunać. Wšitke naprašowanja we wokolnych zawodach abo ratarskich předewzaćach běchu bjez wuspěcha.
Proba chóra njebudźe
Konjecy. Kedźbu spěwarjo Serbskeho muskeho chóra Delany! Kaž nam Měrko Korjeńk z předsydstwa chóra zdźěli, zwučowanja chóra w přichodnymaj tydźenjomaj aktualneho wuwića choronawirusa dla wupadnu. Ručež połoženje hižo tak napjate njebudźe, dalše informacije wozjewimy.
Zarjadowanja wotprajene
Kamjenc. Hladajo na aktualne wuwiće w zwisku z coronawirusom je Kamjenski Muzej zapadneje Łužicy hač do 19. apryla wšitke zjawne zarjadowanja wotprajił. Hižo wčera wupadny tak mjenowana časowa jězba do kamjentneje doby, 10. apryla njebudźe debjenje jutrownych jejkow z Zobelec swójbu, a přednošk wo Njeswačanskej ptakoškitnej staciji z dr. Winfriedom Nachtigallom 14. apryla je tohorunja wotprajeny. Přiwšěm wostanje muzej dale wotewrjeny, tež muzejowopedagogiske programy budu, za nje pak maja so zajimcy přizjewić.
Policija (16.03.20)
Do awta so zadobyli
Kulow. Na ničo złeho njemyslo je Kulowčan minjeny pjatk wječor swoje wosobowe awto typa Ford Focus na Kamjenskej dróze w Kulowje wotstajił. Jako so sobotu dopołdnja k jězdźidłu wróći, dyrbješe wón zwěsćić, zo bě so w nocy něchtó do njeho zadobył. Cuzy je nabóčne wokno rozbił a móšnju pokradnył. W njej bě po informacijach wobsedźerja 175 eurow. Wěcna škoda wučinja 300 eurow.
Nowe ideje za wsy prašane
Mysla dale hač jenož k přichodnym naprawam přećiwo coronje
Njebjelčicy (BG/SN). Nimale 30 zajimcow je minjeny pjatk do Njebjelčanskeho gmejnskeho centruma přišło, zo bychu so zeznajomili z akciju „Zhromadnje we wsy – myslić, wuknyć, wuwić, činić“. Wćipnota wopytowarjow bě runjewon pytnyć. Woni so prašachu, kotre móžnosće so z nowym programom gmejny, wokrjesa a wokrjesneje ludoweje uniwersity skića. Wšako chce tale akcija nowe ideje za wuwiće jednotliwych wsow zrodźić a zwjazać.
Ale kaž wšudźe w tychle dnjach dyrbjachu tež tele zetkanje w Njebjelčicach po krótkim času přetorhnyć a skónčić. Coronawirus sej tež w tymle padźe swój tribut žadaše, a wopytowarjo so zaso rozeńdźechu. Přiwšěm knježeše dobra nalada, přetož zahajenski signal bě takrjec wuprudźeny, a ludźo mějachu zaćišć, zo zarjadowarjo dale mysla hač jenož k přichodnym naprawam přećiwo coronje. Snano někotryžkuli z wobdźělnikow přichodny čas bjez zarjadowanjow za to wužiwa, wo nowych idejach rozmyslować.
Prěni grandprix dwójneje hłójčki
Zahorjenych kartyplacarjow po wšěm zdaću ani coronawirus wot jich hobbyja wotdźeržeć njemóže. Tónle zaćišć znajmjeńša sy minjeny pjatk w Nowoslicach měł.
Nowoslicy (rd/SN). Prěni serbski grandprix w dwójnej hłójčce su minjeny pjatk w Nowoslicach wuspěšnje zakónčili. Dohromady je 31 zahorjenych kartyplacarjow do kulturneho domu přijěło, tež hdyž wobsteješe riziko infekcije z coronawirusom. Turněr zahajili běchu w Pěskecach. Dalše stacije běchu Konjecy, Smječkecy, Sernjany a Chrósćicy.
W finalnym kole w Nowoslicach bě hišće raz wulka koncentracija trěbna. Bjez dźiwa, zo sy napjatosć mjez hrajerjemi runjewon přimnyć móhł. Přijěli njeběchu jeno starši hrajerjo, ale tež trochu młódši kaž Michał Wowčer z Kozarc. Wón bě najmłódši hrajer wječora a praji sam, zo jemu to ničo njewučinja. Wšako ma při kartyplacanju swoje wjeselo.
Najebać coronawirus je Chróšćanske wjesne towarstwo Domizna ...
Krótkopowěsće (16.03.20)
Žane kursy a seminary
Budyšin. Kursy a seminary Budyskeje ludoweje uniwersity (KVHS) po „zarjadniskim postajenju znajmjeńša hač do 9. apryla wupadnu“, rěka na internetnej stronje KVHS. Hač a hdy su poskitki znowa přistupne, tuchwilu hišće jasne njeje.
Zawru statne muzeje
Drježdźany. Sakske ministerstwo za kulturu a turizm zdźěla, zo su wšitke muzeje w nošerstwje swobodneho stata wotnětka zawrjene. Naprawa ma „spomalenju rozšěrjenja wirusa covid-19 polěkować“ a płaći „najprjedy raz hač do kónca jutrownych prózdnin 19. apryla.“ Tež krajna centrala za politiske kubłanje je w tym zwisku w mjenowanym času wšitke zarjadowanja wotprajiła.
Nachwataja mytowanje klětu
Lipsk. Kuratorij Lipšćanskeho knižneho myta za europske dorozumjenje, zestajany ze zastupjerjow Swobodneho stata Sakskeje, města Lipska, bursoweho towarstwa němskich knižnych wikowarjow a Lipšćanskich wikow, je so z lětušim lawreatom Lászlóm L. Földényijom na to dojednał, mytowanje klětu nachwatać. Zjawna swjatočnosć lětsa wotprajenych knižnych wikow dla wupadnje.
Młode wino w starych kožancach – abo nawopak?
Smochćicy (CRM/SN). Symboliske słowo biblije wo składowanju młodeho wina w starych kožancach (Lederschläuche) wusuny so minjenu póndźelu při witanju na druhi wječor póstneho seminara w Smochčanskim Domje biskopa Bena čłonej předsydstwa TCM runje nawopak, mjenujcy: stare wino w nowych kožancach chować. Přitomni wšak to z humorom přiwzachu. Budyski kapłan Przemek Kostorz mjenowaše w swojich zawodnych duchownych słowach samo hišće dalšu wersiju: nowe kožancy z młodym winom pjelnić. Tak so wón z rěču sej hrajkajo a poprawne wuprajenje na hłowu stajejo, prašeše, hač drje so stare kožancy njepuknu, hdyž w nich młode wino zrawi a wěko překruće sedźi.
Wažny měznik runostajenja
Prěnju dwurěčnu taflu při busowym zastanišću wotkryli
Wojerecy (SiR/SN). Swjedźenska nalada knježeše wčera připołdnju při Wojerowskej Łužiskej kupjeli. Přičina bě, zo su tam prěnju taflu při busowym zastanišću wotkryli, kotraž nětko serbsko- a němskorěčnje na wotpowědne zastanišćo pokazuje.
Nowe tafle w měšćanskim a regionalnym busowym wobchadźe su nuznje trěbne. Dotalne su hižo starše hač 30 lět a modernym žadanjam wjace njewotpowěduja. Na tamnym boku město Wojerecy we wobłuku swojich měšćanskich wustawkow přijomnu winowatosć chutnje bjerje, serbsku rěč a kulturu dale spěchować. Ćim bóle so wyši měšćanosta Stefan Skora (CDU) wjeseleše, zo „město tež w tym nastupanju takrjec pioněrsku rólu we wokrjesu wukonja. Sym wjesoły, zo dwurěčne wuhotowanje taflow, kotrež wšak smy hižo z mnohich druhich zarjadnišćow zwučeni, tež w busowym wobchadźe zaćehnje.“
Policija (13.03.20)
Po njezbožu so zminył
Běła Woda. Zo na parkowanišću njewotpohladnje do druheho awta storčiš, móže so kóždemu stać, a zwjetša hodźi so škoda spěšnje zrjadować. Hdyž pak prosće wotjědźeš, je to hórje. Předwčerawšim sta so tajki pad w Běłej Wodźe. Tam je so wodźer VWja z městna njezboža zminył, njeje pak žanu informaciju wo sebi abo zražce zawostajił. Policija muža wuslědźi a jeho w bydlenju wopyta. Přećiwo njemu přepytuja nětko njedowoleneho wotsalenja z městna njezboža dla – a to 50 eurow škody dla.
